କନକ ବ୍ୟୁରୋ : ପ୍ରଖ୍ୟାତ ଶିଶୁ ସାହିତ୍ୟିକ ରସ୍କିନ୍ ବଣ୍ଡଙ୍କ ଅନୁଭୂତିରେ ଓଡିଶାର ପ୍ରମୁଖ ପର୍ଯ୍ୟଟନସ୍ଥଳୀ କୋଣାର୍କ ସୂର୍ଯ୍ୟ ମନ୍ଦିର । ବିଦେଶୀ କହି ଅଧିକ ପ୍ରବେଶ ଦେୟ ଆଦାୟ କରିଥିଲେ ଗେଟରେ ଥିବା କର୍ମଚାରୀ । ସେହିପରି ବିଦେଶୀ ବୋଲି ମିଳିଲାନି ପୁରୀ ଜଗନ୍ନାଥ ମନ୍ଦିରକୁ ପ୍ରବେଶ ଅନୁମତି । ନିଜ ଆତ୍ମଜୀବନୀ- ଲୋନ ଫକ୍ସ ଡ୍ୟାନ୍ସିଂରେ ନିଜ ଓଡିଶା ଅନୁଭୂତିକୁ କିଛି ଏହିଭଳି ଢଙ୍ଗରେ ବଖାଣିଛନ୍ତି ପଦ୍ମ ପୁରସ୍କାର ପ୍ରାପ୍ତ ଏହି ପ୍ରଖ୍ୟାତ ଲେଖକ । ‘ଗତବର୍ଷ ମୁଁ ପୁରୀ ଓ କୋଣାର୍କ ବୁଲି ଆସିଥିଲି । ମୋତେ ବିଦେଶୀ କହି ଜଗନ୍ନାଥ ମନ୍ଦିରକୁ ପ୍ରବେଶ ଅନୁମତି ମିଳିଲାନି । ତେଣୁ କାରରେ ମୁଁ ପ୍ରାୟ ୩ ଘଂଟା ବସି ଓଡିଆ ଇତିହାସ ଉପରେ ଜେ.ପି ଦାସଙ୍କ ଲିଖିତ ଏକ ବହି ପଢିଲି ।’
Kanak News is now on WhatsApp
Join and get latest news updates delivered to you via WhatsApp
‘କୋଣାର୍କରେ ମୋତେ ବିଦେଶୀ ବୋଲି କୁହାଗଲା ଏବଂ ଅଧିକ ପ୍ରବେଶ ଦେୟ ଦେବାକୁ ପଡିିଲା । କିନ୍ତୁ ମୋ ପଛରେ ଛିଡା ହୋଇଥିବା ଜଣେ ବିଦେଶୀ ଶିଖ ଯୁବକଙ୍କୁ ଭାରତୀୟ କହି ପ୍ରବେଶ ଅନୁମତି ମିଳିଲା । ମୋ ସହିତ ଥିବା ରାକେଶ ଓ ବୀଣା ଏହାର ପ୍ରତିବାଦ କଲେ ବି ମୁଁ ଭାରତୀୟ ବୋଲି ଗେଟରେ ଥିବା କର୍ମଚାରୀ ଗ୍ରହଣ କରିନଥିଲେ । ମୋତେ ବିଦେଶୀଙ୍କ ପାଇଁ ଧାର୍ଯ୍ୟ ପ୍ରବେଶ ଦେୟ ଦେବାକୁ ପଡିଥିଲା ।’
କେବଳ ରଙ୍ଗ ସଫା ହୋଇଥିବାରୁ ପ୍ରଖ୍ୟାତ ସାହିତ୍ୟିକ ରସ୍କିନ୍ ବଣ୍ଡଙ୍କୁ ବିଦେଶୀ ବୋଲି କହିବା ସହ ଅଧିକ ଫି ଆଦାୟ କରାଗଲା । ଏଭଳି ତିକ୍ତ ଅନୁଭୂତି ସଂପର୍କରେ ତାଙ୍କ ଆତ୍ମଜୀବନୀରେ ଉଲ୍ଲେଖ କରିବା ପରେ ଓଡିଶା ପର୍ଯ୍ୟଟନ ଶିଳ୍ପ ଉପରେ ଏକ ବିରାଟଚ ପ୍ରଶ୍ନ ଚିହ୍ନ ସୃଷ୍ଟି ହୋଇଛି ।
ବାପା, ମାଆ ବ୍ରିଟିଶ ହୋଇଥିଲେ ମଧ୍ୟ ହିମାଚଳ ପ୍ରଦେଶର କସଉଲିରେ ତାଙ୍କର ଜନ୍ମ । ଇଂରାଜୀରେ ଲେଖାଲେଖି କରୁଥିଲେ ବି ସେ ସଂପୂର୍ଣ୍ଣ ଭାରତୀୟ । ଶିଶୁ ସାହିତ୍ୟକୁ ତାଙ୍କର ଅବଦାନ ପାଇଁ ତାଙ୍କୁ କେନ୍ଦ୍ର ସାହିତ୍ୟ ଏକାଡେମୀ ସମ୍ମାନଠୁ ଆରମ୍ଭ କରି ପଦ୍ମଶ୍ରୀ ଓ ପଦ୍ମଭୂଷଣ ସମ୍ମାନରେ ମଧ୍ୟ ସମ୍ମାନିତ କରିଛନ୍ତି ଭାରତ ସରକାର । ହେଲେ ସେ ଭାରତୀୟ ବୋଲି ଓଡିଶାର ଏକ ପ୍ରମୁଖ ପର୍ଯ୍ୟଟନସ୍ଥଳୀର କର୍ମଚାରୀ ଗ୍ରହଣ କରିବାକୁ ନାରାଜ ।
ଏଭଳି ଏକ ସମ୍ବେଦନଶୀଳ ଅନୁଭୂତିକୁ ରସ୍କିନ୍ ବଣ୍ଡ୍ ତାଙ୍କ ଆତ୍ମଜୀବନୀରେ ସ୍ଥାନିତ କରିବା ପରେ ଚାରିଆଡୁ ସମାଲୋଚନା ଆରମ୍ଭ ହୋଇଛି । ପର୍ଯ୍ୟଟନ ଶିଳ୍ପର ବିକାଶ ପାଇଁ ରାଜ୍ୟ ସରକାର ଅନେକ ଯୋଜନା କରୁଥିବାବେଳେ ପର୍ଯ୍ୟଟକଙ୍କୁ କର୍ମଚାରୀଙ୍କ ବ୍ୟବହାର ପାଇଁ ସମାଲୋଚିତ ହେଉଛି କୋଣାର୍କ ସୂର୍ଯ୍ୟମନ୍ଦିର ପରି ଏକ ଐତିହାସିକ କୀର୍ତିରାଜି ।