ଭାରତୀୟ ସେୟାର ବଜାର ପାଇଁ ବ୍ଲାକ ଫ୍ରାଇଡେ । ଆଜି ଅଚାନକ ସେନସେକ୍ସ ୧୦୦୦ ପଏଣ୍ଟରୁ ଅଧିକ ହ୍ରାସ ପାଇବା ଫଳରେ ସେୟାର ମାର୍କେଟରେ ଝଡ ସୃଷ୍ଟି ହୋଇଥିଲା । ବିଏସଇ ସେନସେକ୍ସ ପ୍ରାୟ ୧୧୨୭.୫୮ ପଏଣ୍ଟ ହ୍ରାସ ପାଇ ୩୬,୪୮୫.୮୪ ପଏଣ୍ଟରେ ପହଞ୍ଚିଥିଲା । ତେବେ ସେନସେକ୍ସ ହଠାତ ହ୍ରାସ ପାଇ ଅଳ୍ପ ସମୟ ମଧ୍ୟରେ ନିଜକୁ ସୁଧାରି ନେଇଥିଲା । କେବଳ ସେନସେକ୍ସ ନୁହେଁ ନ୍ୟାସନାଲ ଷ୍ଟକ ଏକ୍ସଚେଞ୍ଜର ନିଫଟୀ ମଧ୍ୟ ପ୍ରାୟ ୪୦୦ ପଏଣ୍ଟ ହ୍ରାସ ପାଇ ୧୧ ହଜାର ପଏଣ୍ଟ ତଳକୁ ଖସିଯାଇଥିଲା । ଆଉ ସେୟାର ବଜାରର ଏଭଳି ଅବସ୍ଥା କେବଳ ଗୋଟିଏ ଗୁଜବ ଯୋଗୁଁ ଦେଖାଦେଇଥିଲା ।
Kanak News is now on WhatsApp
Join and get latest news updates delivered to you via WhatsApp
ସୂଚନା ଅନୁଯାୟୀ, ସେୟାର ମାର୍କେଟ ଚାଲୁଥିବା ବେଳେ ଆଜି ହଠାତ୍ ଦୀବାନ ହାଉସିଂ ଫାଇନାନ୍ସ ଲିମିଟେଡ(DHFL)ର ଦେବାଳିଆ ସ୍ଥିତି ଉପୁଜିଛି ବୋଲି ଏକ ଗୁଜବ ଉଠିଥିଲା । ଆଉ ଏହି ଗୁଜବ ଏଭଳି ଭାବରେ ବ୍ୟାପିଥିଲା ଯେ, ସେୟାର ମାର୍କେଟରେ ଚହଳ ସୃଷ୍ଟି ହୋଇଥିଲା । ଏହି ଗୁଜବ ପରେ କମ୍ପାନିର ସେୟାରରେ ୬୦ ପ୍ରତିଶତ ହ୍ରାସ ହୋଇଥିଲା । ଯାହାଫଳରେ ଗୋଟିଏ ମିନିଟ ମଧ୍ୟରେ କମ୍ପାନିର ୧୧ ହଜାର କୋଟି ଟଙ୍କା କ୍ଷତି ହୋଇଥିଲା । ତେବେ ପରବର୍ତ୍ତୀ ସମୟରେ ଏହାର ସତ୍ୟତା ସାମ୍ନାକୁ ଆସିବା ପରେ କମ୍ପାନିର ସେୟାର ମୂଲ୍ୟରେ ବୃଦ୍ଧି ଦେଖିବାକୁ ମିଳିଥିଲା ।
ଏହି ଗୁଜବ ପରେ କେବଳ ଡିଏଚଏଫଏଲ ନୁହେଁ ବରଂ ହୋମ ଫାଇନାନ୍ସ, ଏଲଆଇସି ହାଉସିଙ୍ଗ ଫାଇନାନ୍ସ ଓ ଇଣ୍ଡିଆ ବୁଲ୍ସ ହାଉସିଙ୍ଗ ଫାଇନାନ୍ସର ସେୟାର ମୂଲ୍ୟରେ ମଧ୍ୟ ହ୍ରାସ ହୋଇଥିଲା । ସେହିଭଳି ୟସ ବ୍ୟାଙ୍କ ଓ ଜେଟ ଏୟାରୱେଜର ସେୟାର ମୂଲ୍ୟରେ ହ୍ରାସ ଫଳରେ ନିବେଶକାରୀଙ୍କ ହୃତସ୍ପଦନ ବଢାଇ ଦେଇଥିଲା । ତେବେ କିଛି ସମୟ ପରେ ପୁଣିଥରେ ଟ୍ରାକକୁ ଫେରିଥିଲା ସେୟାର ମାର୍କେଟ ଓ ଆଶ୍ୱସ୍ତି ପାଇଥିଲେ ନିବେଶକାରୀ ।