ଗୁଜବ ପାଇଁ ରାତିସାରା ଦୀପ ଜାଳିଲେ ସଧବା ମହିଳା !
ତାରିଣୀ ପୀଠକୁ ନେଇ ବଡ ଗୁଜବ । ମନ୍ଦିର ପ୍ରଶାସନ କହିଲା ସମ୍ପୂର୍ଣ୍ଣ ମିଛ
କନକ ବ୍ୟୁରୋ : ରାତି ତମାମ ଠାକୁରଙ୍କ ପାଖରେ ଜଳିଲା ଦୀପ । ସୋସିଆଲ ମିଡିଆରେ ଭାଇରାଲ ହୋଇଥିବା ଏକ ଖବର ପଛରେ ଧାଇଁଲା ସାରା ଓଡିଶା । ରାଜ୍ୟର ଅଧିକାଂଶ ସ୍ଥାନରେ ସଧବା ମହିଳାମାନେ ରାତିରେ ଅଳତା ସିନ୍ଦୁର ପିନ୍ଧି ଠାକୁରଙ୍କ ପାଖରେ ଦୀପଟିଏ ଜାଳିବାର ଚିତ୍ର ସାମନାକୁ ଆସିଛି । ଖୋଳତାଡ କରିବା ପରେ ଜଣାପଡିଛି, ଏକ ଗୁଜବକୁ ନେଇ ଏଭଳି କରିଛନ୍ତି ମହିଳାମାନେ ।
Kanak News is now on WhatsApp
Join and get latest news updates delivered to you via WhatsApp
ହଠାତ୍ ଏକ ଖବର ବ୍ୟାପିବାକୁ ଲାଗିଲା ଯେ ଘଟଗାଁର ପ୍ରସିଦ୍ଧ ମାଆ ତାରିଣୀଙ୍କ ପୀଠରେ ଲିଭି ଯାଇଛି ଅଖଣ୍ଡ ଦୀପ । ଏପରିକି ମାଆଙ୍କ ଶାଢୀ ପୋଡିଯାଇଥିବା ନେଇ ଗୁଜବ ମୋବାଇଲରୁ ମୋବାଇଲକୁ ଘୂରିବାକୁ ଲାଗିଲା । ମେସେଜରେ କୁହାଗଲା ରାତିରେ ସଧବା ମହିଳାମାନେ ଠାକୁରଙ୍କ ପାଖରେ ଦୀପଟିଏ ନଜାଳିଲେ ପରିବାର ପ୍ରତି ଅନିଷ୍ଟ ହେବ । ବାସ୍ ଏହି ଗୁଜବ ପଛରେ ଧାଇଁଲା ସାରାଓଡିଶା । ଆଉ ରାତିରେ ସଧବା ମହିଳାମାନେ ସଜ ହୋଇ ଠାକୁରଙ୍କ ପାଖରେ ଦୀପ ଜାଳିବାକୁ ଲାଗିଲେ । ଏକବିଂଶ ଶତାବ୍ଦୀରେ ଯେତେବେଳେ ସମସ୍ତଙ୍କ ହାତରେ ଏକ ସ୍ମାର୍ଟ ଫୋନ୍ ରହିଛି ଠିକ୍ ସେତିକିବେଳେ ଜଙ୍ଗଲର ନିଆଁ ପରି ବ୍ୟାପି ଯାଉଛି ଏକ କପୋଳକଳ୍ପିତ ଖବର । ଖବରର ସତ୍ୟତା ନଜାଣି ଅନ୍ଧ ଭଳି ତା ପଛରେ ଧାଉଁଛନ୍ତି ସଚେତନ ନାଗରିକ ।
ଏଭଳି ଖବର ବ୍ୟାପିବା ପରେ ଆମେ ଘଟଗାଁ ତାରିଣୀ ପୀଠ ସହ ଯୋଗାଯୋଗ କରିଥିଲୁ । ଆଉ ଆମକୁ ଯେଉଁ ସୂଚନା ମିଳିଲା ତାହା ସମସ୍ତଙ୍କୁ ଚକିତ କଲାଭଳି । ତାରିଣୀ ମନ୍ଦିର ପ୍ରଶାସନ ପକ୍ଷରୁ ସ୍ପଷ୍ଟ କରାଯାଇଛି ଯେ, ଏହି ଖବର ସମ୍ପୂର୍ଣ ମିଛ ଏବଂ କପୋଳକଳ୍ପିତ । ଘଟଗାଁ ତାରିଣୀ ମନ୍ଦିରରେ ଅଖଣ୍ଡ ଦୀପ ଜାଳିବା ଭଳି କୌଣସି ବିଧି ନାହିଁ । ସେହିପରି ମାଆଙ୍କ ଶାଢୀ ପୋଡିଯିବା ଭଳି କୌଣସି ଅଘଟଣ ଘଟିନାହିଁ । ତେଣୁ ସ୍ପଷ୍ଟ ହୋଇଯାଇଥିଲା ସୋସିଆଲ ମିଡିଆରେ ବ୍ୟାପିଥିବା ଏହି ଖବର ସମ୍ପୂର୍ଣ୍ଣ ଗୁଜବ । ଆଉ ଏଭଳି ଗୁଜବରୁ ଦୁରେଇ ରହିବାକୁ ମନ୍ଦିର ପ୍ରଶାସନ ପକ୍ଷରୁ ଭକ୍ତ ମାନଙ୍କୁ ଅନୁରୋଧ କରାଯାଇଛି ।