ଦେବଦୂତ ସାଜିଲେ କନଷ୍ଟେବଳ ! ଚଳନ୍ତା ଟ୍ରେନର ତଳେ ପଡିଯାଉଥିବା ବ୍ୟକ୍ତିଙ୍କୁ ଉଦ୍ଧାର କଲେ
କନକ ବ୍ୟୁରୋ : ଠିକ ସମୟରେ ଆସି ଜୀବନ ବଂଚାଇଦେଲେ କନଷ୍ଟେବଳ । ଚଳନ୍ତା ଟ୍ରେନର ତଳେ ପଡିଯାଉଥିବା ବ୍ୟକ୍ତିଙ୍କୁ ଉଦ୍ଧାର କଲେ ଆରପିଏଫ କନେଷ୍ଟବଳ । ଚଳନ୍ତା ଟ୍ରେନର ଜେନେରାଲ ବଗିକୁ ଉଠିବା ପାଇଁ ଚେଷ୍ଟା କରୁଥିବା ବେଳେ ଯାତ୍ରୀ ଜଣଙ୍କର ଗୋଡ ଖସି ଯାଇଥିଲା । ଏହି ସମୟରେ ସାହସିକତାର ସହ ବ୍ୟକ୍ତି ଜଣକୁ ଉଦ୍ଧାର କରିଥିଲେ ଆରପିଏଫ କନଷ୍ଟେବଳ ସୁମନ । ଘଟଣାଟି ଘଟିଛି ସୋମବାର ଦିନ ଚେନ୍ନାଇର ଏଗମୋରା ରେଳ ଷ୍ଟେସନରେ । ରାମେଶ୍ୱରମରୁ ଫୈଜାବାଦ ଯାଉଥିବା ଶ୍ରଦ୍ଧା ସେତୁ ଏକ୍ସପ୍ରେସ ସୋମବାର ଦିନ ଗୋଟିଏ ବେଳେ ପ୍ଲାଟଫର୍ମରୁ ଯାତ୍ରା ଆରମ୍ଭ କରୁଥିବା ସମୟରେ ଏହି ଘଟଣା ଘଟିଛି ।
Kanak News is now on WhatsApp
Join and get latest news updates delivered to you via WhatsApp
ଏହି ସମୟରେ ଯାତ୍ରୀ ଜଣକ ଚଳନ୍ତା ଟ୍ରେନର ଜେନେରାଲ ବଗିକୁ ଉଠିବା ପାଇଁ ପ୍ରୟାସ କରୁଥିବା ବେଳେ ତାଙ୍କ ଗୋଡ ଖସିଯାଇଥିଲା ଏବଂ ସେ ଚଳନ୍ତା ଟ୍ରେନ ଓ ପ୍ଲାଟଫର୍ମ ମଧ୍ୟରେ ଥିବା ଫାଙ୍କା ସ୍ଥାନକୁ ଖସିପଡିଥିଲେ । ଠିକ୍ ଏହି ସମୟରେ ସେଠାରେ ଉପସ୍ଥିତ ଥିବା କନଷ୍ଟେବଳ ସୁମନ ସାହସିକତାର ସହ ବ୍ୟକ୍ତି ଜଣଙ୍କ ହାତକୁ ଧରି ସେଠାରୁ ଟାଣି ତାଙ୍କୁ ସୁରକ୍ଷିତ ଭାବେ ଉଦ୍ଧାର କରିଥିଲେ ।
ତେବେ ଏହି ଦୃଶ୍ୟ ରେଳ ଷ୍ଟେସନରେ ଲାଗିଥିବା ସିସିଟିଭି କ୍ୟାମେରାରେ କଏଦ ହୋଇଛି । କନଷ୍ଟେବଳ ସୁମନ ବ୍ୟକ୍ତି ଜଣକୁ ଉଦ୍ଧାର କରିବା ପରେ ସେ କିଛି ସମୟ ଧରି କିଛି କହିପାରିନଥିଲେ । ଏବଂ ଷ୍ଟେସନରୁ ବାହାରକୁ ଚାଲିଯାଇଥିଲେ । ଆରପିଏଫ କନଷ୍ଟେବଳ ସୁମନଙ୍କ ଏହି ସାହସିକତାର ଭିଡିଓ ଏବେ ସୋସିଆଲ ମିଡିଆରେ ଭାଇରାଲ ହୋଇଛି । ଏହାସହ ଲୋକେ ସୁମନଙ୍କ ସାହସିକତାକୁ ପ୍ରଶଂସା କରୁଛନ୍ତି ।