ମନି ଲଣ୍ଡରିଂ ମାମଲାରେ ରବର୍ଟ ଭଦ୍ରାଙ୍କୁ ୬ ଘଣ୍ଟା ଜେରା କଲା ଇଡି । ଆଜି ପୁଣି ଜେରା ହେବେ ଭଦ୍ରା
ମନି ଲଣ୍ଡରିଂ ମାମଲାରେ ରବର୍ଟ ଭଦ୍ରାଙ୍କୁ ୬ ଘଣ୍ଟା ଜେରା କଲା ଇଡି
କନକ ବ୍ୟୁରୋ : ମନି ଲଣ୍ଡରିଂ ମାମଲାରେ ପ୍ରବର୍ତନ ନିର୍ଦେଶାଳୟ (ଇଡି) ସୋନିଆ ଗାନ୍ଧୀଙ୍କ ଜ୍ବାଇଁ ରବର୍ଟ ଭଦ୍ରାଙ୍କୁ ପ୍ରାୟ ୬ ଘଣ୍ଟା ଧରି ଜେରା କରିଛି। କିନ୍ତୁ ସେ କୌଣସି ଆର୍ଥିକ ହେରଫେର କରି ନାହାନ୍ତି କିମ୍ବା ଳଣ୍ଡନରେ କୌଣସି ସଂପତ୍ତି କିଣି ନାହାନ୍ତି ବୋଲି ଭଦ୍ରା କହିଛନ୍ତି। ରାଜନୈତିକ ଆକ୍ରୋଶ ରଖି ତାଙ୍କୁ ହଇରାଣ କରାଯାଉଛି ବୋଲି ସେ ଅଭିଯୋଗ କରିଛନ୍ତି। ଲଣ୍ଡନରେ ଭଦ୍ରା ୪ଟି ବିଳାସପୂର୍ଣ୍ଣ ଘର କିଣିଛନ୍ତି ବୋଲି ମିଳିଥିବା ତଥ୍ୟକୁ ଆଧାର କରି ଇଡି ତାଙ୍କୁ ଜେରା କରିଛି। ଏଥିମଧ୍ୟରୁ ଦୁଇଟି କୋଠାର ମୂଲ୍ୟ ହେଉଛି ୮୩ କୋଟି। ୨୦୦୫ରୁ ୨୦୧୦ ମଧ୍ୟରେ ଏହି କୋଠା କିଣିଥିବା କୁହାଯାଉଛି।
Kanak News is now on WhatsApp
Join and get latest news updates delivered to you via WhatsApp
ଏତେ ଅର୍ଥ ସେ କେଉଁଠୁ ଆଣିଲେ ଏବଂ କେମିତି କିଣିଲେ ବୋଲି ଇଡି ଅଧିକାରୀମାନେ ତାଙ୍କୁ ପାଖାପାଖି ୬ ଘଣ୍ଟା ଧରି ପଚରାଉଚରା କରିଥିଲେ। ମନୋଜ ଆରୋରାଙ୍କ ସହିତ ତାଙ୍କର ସଂପର୍କ କ’ଣ ବୋଲି ମଧ୍ୟ ପ୍ରଶ୍ନ ହୋଇଥିଲା। କିନ୍ତୁ ସେ ତାଙ୍କୁ ଜାଣନ୍ତି ନାହିଁ ବୋଲି ରବର୍ଟ କହିଥିଲେ। ଆଜି ତାଙ୍କୁ ପୁଣି ଜେରା କରାଯିବ। ମନୋଜ ଆରୋରା ହେଉଛନ୍ତି ସ୍କାଇଲାଇଟ ହସପିଟାଲିଟି ନାମକ ଏକ ସଂସ୍ଥାର ଅଧିକାରୀ। ଉକ୍ତ ସଂସ୍ଥା ସହିତ ରବର୍ଟଙ୍କ ସଂପର୍କ ରହିଛି ବୋଲି ଅଭିଯୋଗ ହେଉଛି। କେବଳ ଏତିକି ନୁହେଁ ବିଦେଶରେ ରବର୍ଟଙ୍କ ସଂପତ୍ତି ସଂପର୍କରେ ମନୋଜଙ୍କ ପାଖରେ ସବୁ ତଥ୍ୟ ରହିଛି ବୋଲି କୁହାଯାଉଛି।
ରବର୍ଟ ଭଦ୍ରାଙ୍କ ଇଡି ଜେରାକୁ ନେଇ ବିଜେପି ଏବଂ କଂଗ୍ରେସ ମୁହାଁମୁହିଁ ହୋଇଥିବା ବେଳେ କଂଗ୍ରେସ ସାଧାରଣ ସଂପାଦିକା ପ୍ରିୟଙ୍କା ଗାନ୍ଧୀ କହିଛନ୍ତି ଯେ ସେ ତାଙ୍କ ସ୍ବାମୀଙ୍କ ପଛରେ ଛିଡ଼ା ହୋଇଛନ୍ତି। ଇଡି ପକ୍ଷରୁ କରାଯାଇଥିବା ଅଭିଯୋଗକୁ ରବର୍ଟ ଅସ୍ବୀକାର କରି ଆସୁଛନ୍ତି। ରାଜନୈତିକ ମନ୍ଦ ଉଦ୍ଦେଶ୍ୟ ରଖି ତାଙ୍କୁ ହଇରାଣ କରାଯାଉଛି ବୋଲି ସେ କହୁଛନ୍ତି। ରବର୍ଟ ଏହି ମାମଲାରେ ଆଗୁଆ ଜାମିନ ଆବେଦନ କରି ଦିଲ୍ଲୀ ହାଇକୋର୍ଟର ଦ୍ବାରସ୍ଥ ହୋଇଥିଲେ। ହାଇକୋର୍ଟ କିନ୍ତୁ ତାଙ୍କୁ ଲଣ୍ଡନରୁ ଫେରିବା ପରେ ବୁଧବାର ଇଡିରେ ହାଜର ହେବା ପାଇଁ କହିଥିଲେ। କୋର୍ଟ ଆସନ୍ତା ୧୬ ତାରିଖ ପର୍ଯ୍ୟନ୍ତ ରବର୍ଟଙ୍କୁ ଗିରଫ କରାଯାଇ ପାରିବ ନାହିଁ ବୋଲି ନିର୍ଦେଶ ଦେଇଛନ୍ତି।