ପ୍ରଶାସନ ଶୁଣିଲାନି, ପ୍ରତିବାଦ ଜଣାଇବାକୁ ରାସ୍ତାରେ ଧାନଗଛ ଲଗାଇଲେ ଲୋକେ ।
କନକ ବ୍ୟୁରୋ : ଖାଲଖମା ରାସ୍ତାରେ ଜମିରହୁଛି ଆଣ୍ଠୁଏ ପାଣି । ଆଉ ପାଣି ଛାଡିଗଲେ ରାସ୍ତା ସାରା କାଦୁଅ ପଚପଚ । ଚାଲିବା ତ ଦୂରର କଥା ପାଦ ରାସ୍ତାରେ ପାଦ ପକାଇବା ମଧ୍ୟ କଷ୍ଟକର । ଏନେଇ ଗ୍ରାମବାସୀ ବାରମ୍ବାର ପ୍ରଶାସନ ନିକଟରେ ଫେରାଦ ହୋଇଥିଲେ ମଧ୍ୟ ଫଳ ଶୂନ । ତେଣୁ ପ୍ରଶାସନର ଦୃଷ୍ଟି ଆକର୍ଷଣ କରିବା ପାଇଁ ରାସ୍ତା ଉପରେ ଧାନ ଗଛ ରୋଇବାକୁ ବାଧ୍ୟ ହେଲେ ଗ୍ରାମବାସୀ । ଏଭଳି ଘଟଣା ଅସ୍ତରଙ୍ଗର ନୂଆଗଡ ଅଞ୍ଚଳରେ ଦେଖିବାକୁ ମିଳିଛି ।
Kanak News is now on WhatsApp
Join and get latest news updates delivered to you via WhatsApp
୧୦ଟି ୱାର୍ଡକୁ ନେଇ ଗଠିତ ହୋଇଥିବା ନୂଆଗଡ ଗ୍ରାମ ପଞ୍ଚାୟତର ରାସ୍ତା ଅବସ୍ଥା ଦେଖିଲେ ଆପଣ ମୁଣ୍ଡରେ ହାତ ଦେବେ । ଗାଁ ରାସ୍ତା ଗୁଡିକର ଅବସ୍ଥା ଏପରି ହୋଇଛି ଯେ ଗମନାଗମନ ସମ୍ପୂର୍ଣ୍ଣ ଭାବେ ଠପ୍ ହୋଇଯାଇଛି । ଖାସକରି ଏହି ଗ୍ରାମ ପଞ୍ଚାୟତ ଅଧିନରେ ଆସୁଥିବା ସୀତାରରମପଡା, ରେଡକ୍ରସ ରୋଡ ଓ ମାଙ୍କଡିଆରେ ଗମନାଗମନ ସେବା ସମ୍ପୂର୍ଣ୍ଣ ଭାବେ ବିପର୍ଯ୍ୟସ୍ତ । ତେବେ ରାସ୍ତା ମରାମତି ନେଇ ପ୍ରଶାସନ ନିକଟରେ ବାରମ୍ବାର ଗୁହାରି କଲେ ମଧ୍ୟ ଏହାର କୌଣସି ସୁଫଳ ମିଳିନଥିଲା । ତେଣୁ ବାଧ୍ୟ ହୋଇ ଗ୍ରାମବାସୀ ନିଆରା ଉପାୟରେ ପ୍ରତିବାଦ ଜଣାଇଥିଲେ ।
ଗ୍ରାମବାସୀ ମାନେ ଏକାଠି ହୋଇ କାଦୁଅ ଭର୍ତ୍ତି ଥିବା ଗାଁ ରାସ୍ତାରେ ଧାନ ରୋଇବା ସହ ପ୍ରଶାସନର ଦୃଷ୍ଟି ଆକର୍ଷଣ କରିଥିଲେ । ତେବେ ଏନେଇ ଅସ୍ତରଙ୍ଗ ବିଡିଓ କହିଛନ୍ତି ରାସ୍ତା ମରାମତି ପାଇଁ ଅର୍ଥ ମଞ୍ଜୁର ହୋଇଛି । ତେବେ କିଛି ବିବାଦ ଯୋଗୁଁ ଏହା ହୋଇ ପାରୁନାହିଁ । ତେଣୁ ଖୁବଶୀଘ୍ର କିପରି ରାସ୍ତା ମରାମତି ହେବ ସେନେଇ ପ୍ରଶାସନ ଧ୍ୟାନ ଦେବ ବୋଲି କହିଛନ୍ତି ଅସ୍ତରଙ୍ଗ ବିଡିଓ ।