ବିହାରରେ ଭାଙ୍ଗିଲା ମହାମେଂଟ! ନୀତିଶ କୁମାର ଏନଡିଏର ସମର୍ଥନ ନେବା ପରେ ଆଜି ବିଶ୍ୱାସଘାତକ ଦିବସ ପାଳନ କରୁଛି ଆରଜେଡି
କନକ ବ୍ୟୁରୋ : ବିହାରରେ ମହାମେଂଟ ଭାଙ୍ଗିବା ପରେ ଏବେ ରାଜରାସ୍ତାକୁ ଓହ୍ଳାଇଛି ଆରଜେଡି । ନୀତିଶ କୁମାର ଏନଡିଏର ସମର୍ଥନ ନେବା ପରେ ଆଜି ବିଶ୍ୱାସଘାତକ ଦିବସ ପାଳନ କରୁଛି ଆରଜେଡି । ନୀତିଶ କୁମାର ତାଙ୍କ ସ୍ୱାର୍ଥ ପାଇଁ ମହାମେଂଟ ଭାଙ୍ଗି ବିଶ୍ୱାସଘାତକତା କରିଛନ୍ତି ବୋଲି ଆରଜେଡି କହିଛି । ସାରା ରାଜ୍ୟ ସମେତ ପାଟନାର ମହାତ୍ମା ଗାନ୍ଧୀ ସେତୁ ନିକଟରେ ଆରଜେଡି ବିକ୍ଷୋଭ ପ୍ରଦର୍ଶନ କରିଛି ।
Kanak News is now on WhatsApp
Join and get latest news updates delivered to you via WhatsApp
ସେପଟେ ବିଜେପି ସହ ମେଂଟ କରି ନୀତିଶ କୁମାର ମୁଖ୍ୟମନ୍ତ୍ରୀ ଭାବେ ଶପଥ ନେବା ପରେ ଆରଜେଡି ମୁଖ୍ୟ ଲାଲୁ ପ୍ରସାଦ ଯାଦବ ପ୍ରତିକ୍ରିୟା ରଖିଛନ୍ତି । ମୋଦି ଓ ନୀତିଶଙ୍କ ଉପରେ ବର୍ଷିଛନ୍ତି ଲାଲୁ । ସେ କହିଛନ୍ତି, ନୀତିଶ ବିହାରକୁ ଧୋକ୍କା ଦେଇଛନ୍ତି । ସେ ସୁବିଧାବାଦୀ ବୋଲି ପୁଣି ଥରେ ପ୍ରମାଣିତ ହେଲା । ସେ ସାଂପ୍ରଦାୟିକ ଶକ୍ତି ସହ ହାତ ମିଳାଇବେ ନାହିଁ ବୋଲି କହିଥିଲେ । ମୋଦିଙ୍କ ଉପରେ ଲାଲୁ ବର୍ଷିଛନ୍ତି । ବିଜେପି ସହ ସେ କେବେ ବି ହାତ ମିଳାଇବେ ନାହିଁ ବୋଲି କହିଛନ୍ତି ଆରଜେଡି ମୁଖ୍ୟ । ଏହାସହ ନୀତୀଶ ଉପରେ ହତ୍ୟା ଅଭିଯୋଗ ଆଣିଛନ୍ତି ଲାଲୁ ପ୍ରସାଦ ଯାଦବ ।
ବୁଧବାର ଏକ ନାଟକୀୟ ଘଟଣାକ୍ରମରେ ବିହାର ମୁଖ୍ୟମନ୍ତ୍ରୀ ନୀତିଶ କୁମାର ତାଙ୍କ ପଦରୁ ଇସ୍ତଫା ଦେଇଥିଲେ । ଏହାସହିତ ଠିକ୍ ତିନି ବର୍ଷ ପୂର୍ବେ ଲାଲୁ ଯାଦବଙ୍କ ଆରଜେଡି ଏବଂ କଂଗ୍ରେସ ସହ ମିଶି ଗଢ଼ିଥିବା ମହାମେଣ୍ଟରୁ ଓହରିଯାଇଛନ୍ତି । ବୁଧବାର ସନ୍ଧ୍ୟା ୭ଟାରେ ରାଜ୍ୟପାଳଙ୍କୁ ଭେଟି ନୀତିଶ ଇସ୍ତଫା ଦେବାର ୪ ଘଣ୍ଟା ଭିତରେ ବିହାରର ରାଜନୈତିକ ଦୃଶ୍ୟପଟ୍ଟ ସଂପୂର୍ଣ୍ଣ ଓଲଟପାଲଟ ହୋଇଯାଇଥିଲା । ଯେଉଁ ମୋଦିଙ୍କୁ ବିରୋଧ କରି ୨୦୧୩ରେ ବିଜେପି ଛାଡ଼ିଥିଲେ ସେହି ବିଜେପି ସହ ମେଣ୍ଟ କରିବାକୁ ସ୍ଥିର କରିଛନ୍ତି ନୀତିଶ ।
ନୀତୀଶ ଇସ୍ତଫା ଦେବା କ୍ଷଣି ମୋଦି ଟ୍ଵିଟ୍ କରି ତାଙ୍କୁ ଅଭିନନ୍ଦନ ଜଣାଇଲେ । ଏପରିକି ରାତି ୧୦ଟାରେ ବିଜେପିର ଅନେକ ନେତା ଓ ବିଧାୟକ ନୀତିଶଙ୍କ ଘରେ ପହଂଚି ବୈଠକ କରିଥିଲେ । ବୈଠକ ସରିବା ପରେ ବିଜେପିର ଏକ ପ୍ରତିନିଧି ଦଳ ୧୦ଟା ୩୦ରେ ରାଜଭବନ ଯାଇ ନୀତିଶଙ୍କ ସପକ୍ଷରେ ସମର୍ଥନ ପତ୍ର ଦେଇଥିଲେ । ଏହାର ଘଣ୍ଟାଏ ପରେ ନୀତିଶ କୁମାର ରାଜ୍ୟପାଳଙ୍କୁ ଭେଟି ବିଜେପି ସହ ମିଶି ସରକାର ଗଠନ କରିବାକୁ ଦାବି ଜଣାଇଥିଲେ ।