ସ୍ଲେଜିଂରେ ଅଷ୍ଟ୍ରେଲିଆ ଖେଳାଳୀଙ୍କୁ ମାତ୍ ଦେଲେ ରିଷଭ ପନ୍ଥ ! ଷ୍ଟମ୍ପ୍ ମାଇକରେ କଏଦ ହେଲା ପ୍ରତ୍ୟେକ ବଲର କାହାଣୀ ।
ଚର୍ଚ୍ଚାରେ ରିଷଭ ପନ୍ଥଙ୍କ ୱିକେଟ୍ କିପିଂ । ଆଡିଲେଡରେ ଭାରତ ଏବଂ ଅଷ୍ଟ୍ରେଲିଆ ମଧ୍ୟରେ ଖେଳାଯାଇଥିବା ପ୍ରଥମ ଟେଷ୍ଟ ମ୍ୟାଚରେ ବାଜି ମାରିଛି ବିରାଟ ବାହିନୀ । କିନ୍ତୁ ଏହି ମ୍ୟାଚ ପରେ ଯୁବ ତାରକା ତଥା ଭାରତୀୟ ଦଳର ୱିକେଟ୍ ରକ୍ଷକ ରିଷଭ ପନ୍ଥ ଏବେ ଚର୍ଚ୍ଚାର କେନ୍ଦ୍ରବିନ୍ଦୁ ପାଲଟିଛନ୍ତି । ତେବେ ଚର୍ଚ୍ଚା ତାଙ୍କ ବ୍ୟାଟିଂ କିମ୍ବା ୱିକେଟ୍ କିପିଂକୁ ନେଇ ନୁହେଁ ବରଂ ୱିକେଟ୍ ପଛରେ ତାଙ୍କ କମେଣ୍ଟ୍ରିକୁ ନେଇ ।
Kanak News is now on WhatsApp
Join and get latest news updates delivered to you via WhatsApp
ତେବେ ପ୍ରକୃତ ଘଟଣା ହେଉଛି, ପ୍ରଥମ ଟେଷ୍ଟ ମ୍ୟାଚ୍ ସମୟରେ ଅଷ୍ଟ୍ରେଲିଆର ବ୍ୟାଟିଂ ଚାଲିଥିବା ବେଳେ କ୍ରିଜରେ ଥିଲେ ସନ ମାର୍ସ ଏବଂ ଟିମ୍ ପେନ୍ । ସନ୍ ମାର୍ସ ଅର୍ଦ୍ଧଶତକୀୟ ପାଳି ଖେଳି କ୍ରିଜରେ ଉପସ୍ଥିତ ଥିଲେ । ମ୍ୟାଚ ଚାଲୁଥିବା ବେଳେ ଏକ ସମୟରେ ଭାଷ୍ୟକାର ଚୁପ୍ ରହିଯାଇଥିବା ବେଳେ ରିଷଭ ପନ୍ଥଙ୍କ କମେଣ୍ଟ୍ରି ଶୁଣିବାକୁ ମିଳିଥିଲା । ଏହି ସମୟରେ ରିଷଭ ୱିକେଟ ପଛରେ ରହି ବ୍ୟାଟ୍ସମ୍ୟାନ ମାନଙ୍କୁ ଉତ୍ତେଜିତ କରିବା ପାଇଁ ଚିଡାଉଥିବାର ଦେଖିବାକୁ ମିଳିଥିଲା ।
ବ୍ୟାଟ୍ସମ୍ୟାନଙ୍କୁ ଚିଡାଉଥିବାର ସେହି ଦୃଶ୍ୟ ଏବେ ସୋସିଆଲ୍ ମିଡିଆରେ ଭାଇରାଲ ହେବାରେ ଲାଗିଛି । ଯେଉଁଥିରେ ସ୍ପଷ୍ଟ ଭାବେ ଶୁଣିବାକୁ ମିଳୁଛି ଯେ, ପନ୍ଥ ବ୍ୟାଟ୍ସମ୍ୟାନଙ୍କୁ ଉତ୍ତେଜିତ କରାଇବା ପାଇଁ ଚିଡାଉଛନ୍ତି । ଭାରତୀୟ ବୋଲର ରବିଚନ୍ଦ୍ରନ ଅଶ୍ୱିନୀ ବୋଲିଂ କରୁଥିବା ବେଳେ କଙ୍ଗାରୁ ଦଳର ବ୍ୟାଟ୍ସମ୍ୟାନ ଠିକ୍ ଭାବେ ତାଙ୍କୁ ସାମ୍ନା କରିପାରୁନଥିଲେ । ଆଉ ଏହାର ଫାଇଦା ନେଇ ରିଷଭ ପନ୍ଥ ନିଜ ଶବ୍ଦ ବାଣ ଛାଡିବା ଆରମ୍ଭ କରିଦେଇଥିଲେ । ଏହି ଭିଡିଓରେ ଶୁଣିବାକୁ ମିଳୁଛି ଯେ, ରିଷଭ ପନ୍ଥ ବ୍ୟାଟ୍ସମ୍ୟାନଙ୍କୁ ଛକା ମାରିବା ପାଇଁ ଉତ୍ତେଜିତ କରୁଛନ୍ତି । ପନ୍ଥ ଆହୁରି କହିଛନ୍ତି ଯେ, ଏଠାରେ ତିଷ୍ଠି ରହିବା ଏବଂ ଖେଳିବା ସହଜ ନୁହେଁ । କିନ୍ତୁ ବ୍ୟାଟ୍ସମ୍ୟାନ ପନ୍ଥଙ୍କ କଥାକୁ ଧ୍ୟାନ ନଦେଇ ନିଜ ଖେଳ ଜାରି ରଖିଥିଲେ ।