ଭୁବନେଶ୍ୱର ବ୍ୟୁରୋ, କନକ ନ୍ୟୁଜ୍ : କଳାଧନକୁ ଧଳା କରିବାକୁ ଯୋଜନା । ସାମ୍ନାକୁ ଆସିଛି କଳାଧନ ଜମାକାରୀଙ୍କ ମାଷ୍ଟରପ୍ଲାନ୍ । ତେବେ କଳାଧନକୁ କିଭଳି ଧଳା କରାଯାଉଛି , କିଏ ସାଜୁଛି ଏହାର ମାଧ୍ୟମ । କନକ ନ୍ୟୁଜ କ୍ୟାମେରାରେ ଧରାପଡିଛି ଏଭଳି ଏକ ଦୃଶ୍ୟ ଯାହା ଆପଣଙ୍କୁ ଆଶ୍ଚର୍ଯ୍ୟ କରିଦେବ ।
Kanak News is now on WhatsApp
Join and get latest news updates delivered to you via WhatsApp
ଅନୁସନ୍ଧାନରୁ ସାମ୍ନାକୁ ଆସିଛି ଭୁବନେଶ୍ୱରର ଏକ ପ୍ରତିଷ୍ଠିତ ଶିକ୍ଷାନୁଷ୍ଠାନ ପରିସରରେ ଥିବା କେତେକ ବ୍ୟାଙ୍କ୍ ଆଗରେ ଲାଗିଥିବା ଲମ୍ବା ଧାଡିର ଦୃଶ୍ୟ । ଯେଉଁଠି ଧାଡିରେ ଅଛନ୍ତି ଅନେକ ଦିନ ମଜୁରିଆ । ପୁରୁଷ ଓ ମହିଳା ଶ୍ରମିକ । ଆପଣଙ୍କ ମନରେ ପ୍ରଶ୍ନ ଉଠିପାରେ, ସେମାନଙ୍କ ପାଖରେ କ’ଣ ଏତେ ପୁରୁଣା ନୋଟ୍ ଥିଲା ଯେ ସେମାନେ ବାରମ୍ବାର ଧାଡିରେ ଆସୁଛନ୍ତି? ମାତ୍ର ପ୍ରକୃତ କଥା ତାହା ନୁହେଁ ।
ଜଣେ ଦିନ ମଜୁରିଆ କୁହନ୍ତି- ପୁରୁଣା ୫ଶହ ଓ ହଜାରେ ଟଙ୍କିଆ ନୋଟ୍ ଦେଇ ଥରକୁ ସେ ୪ ହଜାର ଟଙ୍କା ବଦଳ କରୁଛନ୍ତି । ଏହି କାମ ପାଇଁ ଦିନକର ମଜୁରି ମିଳୁଛି । କଳାଧନ ଉପରେ ଲଗାମ ଲଗାଇବା ପାଇଁ ଗତ ୮ ତାରିଖରେ ମୋଦି ସରକାର ପୁରୁଣା ୫ଶହ ଓ ହଜାରେ ଟଙ୍କିଆ ନୋଟ୍ ରଦ୍ଦ କରିଥିଲେ । କିନ୍ତୁ କଳା ଟଙ୍କାକୁ ଧଳା କରିବା ପାଇଁ ଏଭଳି ଏକ ରାସ୍ତା ଆପଣେଇଛନ୍ତି କିଛି ଅନୁଷ୍ଠାନ ଓ ଠିକାଦାର କମ୍ପାନୀ ।
ଏହି ଦିନମଜୁରିଆଙ୍କ ପାଇଁ ସଂସ୍ଥାଗୁଡ଼ିକ ଫର୍ମ ପୂରଣ କରି ସେମାନଙ୍କ ହାତକୁ ଧରାଇ ଦେଇଛନ୍ତି । ସେମାନଙ୍କୁ ଆଧାର କାର୍ଡ ନେଇ ଧାଡିରେ ଛିଡ଼ା ହେବାକୁ କହିଛନ୍ତି । ଥରକୁ ୪ ହଜାର ଟଙ୍କାର ୫ ଶହ ଓ ୧୦୦୦ ଟଙ୍କାର ପୁରୁଣା ନୋଟ୍ ବଦଳ କରିବାକୁ କୁହାଯାଇଛି । ଜଣେ ଦିନ ମଜୁରିଆ ଦିନକୁ ୨/୩ଟି ବ୍ୟାଙ୍କ୍ ଚାଲିଗଲେ ୮ ହଜାରରୁ ୧୨ ହଜାର ପର୍ଯ୍ୟନ୍ତ ନୂଆ ଟଙ୍କା ମିଳିଯାଉଛି । ଦିନକର ମଜୁରି ଜାଗାରେ କେତେକ ଜାଗାରେ ଶ୍ରମିକଙ୍କୁ ଆଉ ୨୦୦/୪୦୦ ଅଧିକ ବି ମିଳୁଛି । ଏ ସବୁ କାମ କରାଉଥିବା କିଛି ସୁପରଭାଇଜର୍ ବି ଏଭଳି କାମ ପାଇଁ ଟାର୍ଗେଟ୍ ନେଇଛନ୍ତି ।
କଳା ଟଙ୍କା ଉପରେ ରୋକ୍ ଲଗାଇବା ପାଇଁ ସରକାର ପଦକ୍ଷେପ ନେବା ଆରମ୍ଭ କରିଛନ୍ତି । ଆଉ ଏତିକି ବେଳେ ଅନେକ ବ୍ୟକ୍ତି ଓ ସଂସ୍ଥା କଳାକୁ ଧଳା କରିବା ପାଇଁ ଏଭଳି ବେଆଇନ ବାଟ ବାଛି ନେଉଥିବା ଦେଖାଯାଉଛି ।