କିଏ ଜିତିବ ଉତ୍ତର ପୂର୍ବ ! ତ୍ରିପୁରା, ନାଗାଲାଣ୍ଡ, ମେଘାଳୟ ଆଜି କହିବ ଦେଶର ମୁଡ, ୩ ରାଜ୍ୟର ବିଧାନସଭା ଭୋଟ୍ ଗଣତି ଆରମ୍ଭ
କନକ ବ୍ୟୁରୋ: ଆଜି ନାଗାଲାଣ୍ଡ, ମେଘାଳୟ ଓ ତ୍ରିପୁରାରେ କଡା ସୁରକ୍ଷାରେ ବିଧାନସଭା ନିର୍ବାଚନର ଭୋଟ ଗଣତି । ସକାଳ ୮ଟାରୁ ଭୋଟ ଗଣନା ଆରମ୍ଭ ହୋଇଛି । ବିଧାନସଭା ନିର୍ବାଚନ ପାଇଁ ଫେବୃୟାରୀ ୧୮ତାରିଖରେ ତ୍ରିପୁରା ଏବଂ ଫେବୃୟାରୀ ୨୭ରେ ନାଗାଲାଣ୍ଡ ଓ ମେଘାଳୟରେ ମତଦାନ ହୋଇଥିଲା । ଅନ୍ୟପଟେ ଉତ୍ତରପୂର୍ବାଂଚଳର ଫଳାଫଳ ଦେଶର ରାଜନୀତିକୁ ମଧ୍ୟ ପ୍ରଭାବିତ କରିବ ବୋଲି ବିଶେଷଜ୍ଞ ମତ ଦେଉଛନ୍ତି । ବିଜେପି ଦେଶର ସମସ୍ତ ଅଂଚଳରେ ଶାସନ ଅକ୍ତିଆର କରିବା ଯୋଜନାରେ ଏହା ଏକ ମାଇଲଖୁଂଟ ହେବ । ଭୋଟ ଗଣତିକୁ ଦୃଷ୍ଟିରେ ରଖି ଭାରତ-ବାଂଲାଦେଶ ସୀମାରେ ସୁରକ୍ଷା ବଢାଇ ଦିଆଯାଇଛି । ଗଣତି କେନ୍ଦ୍ରରେ ମଧ୍ୟ ବ୍ୟାପକ ସୁରକ୍ଷା କର୍ମୀ ମୁତୟନ ହୋଇଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଏକଜିଟ୍ ପୋଲ ଅନୁସାରେ, ତ୍ରିପୁରାରେ ଗତ ୨୫ ବର୍ଷ ଧରି ଶାସନରେ ଥିବା ବାମ ସରକାରଙ୍କ ପତନ ହେବ ଏବଂ ପ୍ରଥମ ଥର ଶାସନ ହାତେଇବ ବିଜେପି । ତ୍ରିପୁରାରେ ଶାସନରେ ଥିବା ସିପିଏମ ଓ ବିଜେପି ମଧ୍ୟରେ କଡା ମୁକାବିଲା ହେଉଛି । ଏଠାରେ ଥିବା ୬୦ ବିଧାନସଭା ଆସନରୁ ୫୯ ଆସନରେ ମତଦାନ ହୋଇଛି । ତ୍ରିପୁରାରେ ଫେବୃଆରୀ ୧୮ ତାରିଖରେ ହୋଇଥିବା ମତଦାନରେ ମୋଟ ୯୨ ପ୍ରତିଶତରୁ ଅଧିକ ଭୋଟିଂ ହୋଇଛି । ଏହା ନିର୍ବାଚନ ଇତିହାସରେ ଏକ ରେକର୍ଡ ସୃଷ୍ଟି କରିଛି । ତେବେ ଦେଶର ନଜରରେ ରହିଛି ତ୍ରିପୁରା । ଏଠାରେ ଦୀର୍ଘ ୨୫ ବର୍ଷ ଧରି ବାମମେଂଟ କ୍ଷମତାରେ ରହିଛି । ମାଣିକ ସରକାର ଏଠାରେ ଶାସନରେ ଅଛନ୍ତି । ତେବେ ବାମମେଂଟ ପୁଣି କ୍ଷମତାକୁ ଆସିବାକୁ ଦାବି କରିଥିବା ବେଳେ ବିଜେପି ବି କ୍ଷମତାକୁ ଆସବ ବୋଲି ଆଶା ରଖିଛି । ତ୍ରିପୁରାର ବିଜେପି କ୍ଷମତାସୀନ ହେବ ବୋଲି ଦୁଇଟି ସର୍ଭେ ପୂର୍ବାନୁମାନ କରିଛି । ତ୍ରିପୁରାରେ ବିଜେପି ହାରିଲେ କେବଳ ଗୋଟିଏ ରାଜ୍ୟ କେରଳ ହିଁ ବାମମେଂଟ ହାତରେ ରହିବ ।
ବହୁ ଅସ୍ଥିର ପରିସ୍ଥିତିରେ ନାଗାଲାଣ୍ଡରେ ବିଧାନସଭା ପାଇଁ ମତଦାନ ହୋଇଛି । ବହୁ ସଂଗଠନ ନିର୍ବାଚନକୁ ବହିଷ୍କାର କରିଥିଲେ । ଏହା ସହ ମୋଟ ୬୦ଟି ବିଧାନସଭା ଆସନ ଥିବା ବେଳେ କଂଗ୍ରେସ ସମସ୍ତ ଆସନରେ ପ୍ରାର୍ଥୀ ଦେଇପାରି ନଥିଲା । ଅନ୍ୟପଟେ ବିଜେପିର ସହଯୋଗୀ ଦଳ ଏନପିପି ମଧ୍ୟ ଦୁଇ ଭାଗ ହୋଇଗଲା । ବିଦ୍ରୋହୀ ଏନପିପି ଗୋଷ୍ଠୀ ସହ ବିଜେପି ମେଂଟ କରି ନିର୍ବାଚନ ଲଢିଥିବା
ତେବେ ନାଗାଲାଣ୍ଡରେ ମୋଟ ୬୦ଟଇ ବିଧାନସଭା ଆସନରୁ ୫୯ ଆସନରେ ମତଦାନ ହୋଇଥିଲା । ଗୋଟିଏ ଆସନରେ ନବଗଠିତ ନ୍ୟାସନାଲିଷ୍ଟ ଡେମୋକ୍ରାଟିକ ପ୍ରୋଗେସିଭ ପାର୍ଟି, ଏନଡିପିପିର ମୁଖ୍ୟ ନିଫ୍ୟୁ ରିଅ ଗୋଟିଏ ଆସନରେ ନିଦ୍ୱର୍ନ୍ଦରେ ନିର୍ବାଚିତ ହୋଇସାରିଛନ୍ତି । ଏଠାରେ ବିଜେପି ଏନଡିପିପି ସହ ମେଂଟ କରି ନିର୍ବାଚନ ଲଢୁଛି । ବିଭିନ୍ନ ସର୍ଭେରେ ବିଜେପି-ଏନଡିପିପି ମେଂଟ ସରକାର ଗଢିବ ବୋଲି ପୂର୍ବାନୁମାନ କରାଯାଇଛି । ବିଜେପି ୨୦ ଆସନରେ ଓ ଏନଡିପିପି ୪୦ ଆସନରେ ନିର୍ବାଚନ ଲଢୁଛନ୍ତି । ନାଗାଲାଣ୍ଡରେ ବର୍ତମାନ ନାଗା ପିପୁଲସ ଫ୍ରଂଟ ସରକାରରେ ଅଛି ।
ସେପଟେ ମେଘାଳୟରେ କଂଗ୍ରେସ ପାଇଁ ନିଜ ଗଡ ବଂଚାଇବା ଏକ ବଡ ଚ୍ୟାଲେଂଜ ସୃଷ୍ଟି ହୋଇଛି । ଏଠାରେ ନିର୍ବାଚନ ହାରିଗଲେ ଦେଶରେ କଂଗ୍ରେସ ଆଉ ଏକ ରାଜ୍ୟରୁ ସଫା ହୋଇଗଲା ବୋଲି ବାର୍ତା ଯିବ ବୋଲି ବିଶେଷଜ୍ଞ ମତ ଦେଇଛନ୍ତି । ଏହା ବିଜେପିର କଂଗ୍ରେସ ମୁକ୍ତ ଭାରତ ନାରାକୁ ଅଧିକ ଶକ୍ତିଶାଳୀ କରିବ । ଫଳରେ ୨୦୧୯ ନିର୍ବାଚନରେ ଏହାକୁ ଏକ ବଳିଷ୍ଠ ପ୍ରସଙ୍ଗ ବିଜେପି କରିବ ବୋଲି କୁହାଯାଉଛି । ଏକ୍ଜିଟ୍ ପୋଲ ଅନୁସାରେ ଏଠାରେ ଥିବା ମୋଟ ୬୦ ବିଧାନସଭା ଆସନରୁ ପ୍ରାୟ ୩୦ଟି ଆସନରେ ବିଜେପି ଓ ସହଯୋଗୀ ବିଜୟ ହେବା ସମ୍ଭାବନା ଅଛିା ଏହାସହ କଂଗ୍ରେସର ବିଦ୍ରୋହୀ ଗୋଷ୍ଠୀ ସମେତ ଅନ୍ୟ ଛୋଟ ଛୋଟ ଦଳ ମଧ୍ୟ ବିଜେପିକୁ ସମର୍ଥନ କରୁଛନ୍ତି ।
ମେଘାଳୟରେ କଂଗ୍ରେସ ଦୀର୍ଘ ୧୦ ବର୍ଷ ଧରି ଶାସନ କ୍ଷମତାରେ ରହିଛି । ଗତ ନିର୍ବାଚନରେ କଂଗ୍ରେସ ଏଠାରେ ୬୦ ଆସନକୁ ୨୯ ଆସନରେ ଜିତିଥିଲ।। କିନ୍ତୁ ଏଥର ଝୁଲା ବିଧାନସଭା ହୋଇପାରେ ବୋଲି ଅନେକ ସର୍ଭେ ପୂର୍ବାନୁମାନ କରିଛନ୍ତି । ଆସାମ, ମଣିପୁର ଓ ଅରୁଣାଚଳ ପ୍ରଦେଶରେ ବିଜୟ ପରେ ମେଘାଳୟ ଉପରେ ନଜର ରଖିଛି ବିଜେପି । ରାଜ୍ୟରେ ବିଜେପି ଏକ ବଡ ଶକ୍ତି ଭାବେ ଉଭା ହେବ ବୋଲି ଆକଳନ କରାଯାଇଛି । କଂଗ୍ରେସ ୫୯ ଆସନରେ ପ୍ରାର୍ଥୀ ଦେଇଥିବାବେଳେ ବିଜେପି ୪୭ ଟି ଆସନରେ ପ୍ରାର୍ଥୀ ଦେଇଛି । ମେଘାଳୟରେ କଂଗ୍ରେସ ହାରିଲେ କେବଳ ୪ଟି ରାଜ୍ୟ ହିଁ କଂଗ୍ରେସ ଦଖଲରେ ରହିବ । ପଞ୍ଜାବ, କର୍ଣ୍ଣାଟକ, ମିଜୋରମ ଓ ପୁଡୁଚେରୀରେ ହିଁ କଂଗ୍ରେସ ସରକାର ରହିବ ।