ଗଜପତିଙ୍କ ମୁହଁରେ ଦୁଇଟି କଥା: ପୁରୀ ପାଇଁ ମୁଖ୍ୟମନ୍ତ୍ରୀ ନେଉଥିବା ପଦକ୍ଷେପରେ ଆଶ୍ଚର୍ଯ୍ୟ ପ୍ରକଟ କଲେ ଗଜପତି । କହିଲେ, ନବୀନ ବାବୁ କେମିତି ନେଲେ ଏତେ ବଡ଼ ପଦକ୍ଷେପ ?
କନକ ବ୍ୟୁରୋ: ରାଜ୍ୟ ସରକାରଙ୍କୁ ନେଇ ଦୁଇଟି କଥା କହିଛନ୍ତି ଗଜପତି । ଶ୍ରୀକ୍ଷେତ୍ର ପୁରୀ ପାଇଁ ରାଜ୍ୟ ସରକାର ସବୁଠାରୁ ବଡ ପ୍ୟାକେଜ ଘୋଷଣା କରିବା ପରେ ଗଜପତି ମହାରାଜ ଦିବ୍ୟସିଂହ ଦେବଙ୍କ ପ୍ରଥମ ପ୍ରତିକ୍ରିୟା ରଖିଛନ୍ତି । ତେବେ ପ୍ରଥମ ପ୍ରତିକ୍ରିୟାରେ ଗଜପତି ରାଜ୍ୟ ସରକାରଙ୍କୁ ତାତ୍ସଲ୍ୟ କରିଥିବା ବେଳେ ଦ୍ୱିତୀୟ ପ୍ରତିକ୍ରିୟାରେ ସରକାରଙ୍କୁ ପ୍ରଶଂସାରେ ପୋତି ପକାଇଛନ୍ତି । ତେବେ ରାଜ୍ୟ ସରକାରଙ୍କୁ ନେଇ ଗଜପତିଙ୍କ ମୁହଁରେ ଦୁଇଟି କଥା ବାହାରିବା ପରେ ତାକୁ ନେଇ ଜୋର ଧରିଛି ଚର୍ଚ୍ଚା ।
Kanak News is now on WhatsApp
Join and get latest news updates delivered to you via WhatsApp
ରବିବାର ପୁରୀରେ ଜଗନ୍ନାଥ ଚେତନା କାର୍ଯ୍ୟକ୍ରମରେ ଯୋଗଦେଇ ଗଜପତି ରାଜ୍ୟ ସରକାରଙ୍କୁ ନେଇ ଯେଉଁ କଥା କହିଛନ୍ତି ତାହା କଟାକ୍ଷ କଲା ଭଳି ଶୁଣାଯାଉଥିଲେ ହେଁ ମିଡିଆ ଆଗରେ ପ୍ରଶଂସା କରିଛନ୍ତି ଗଜପତି । ତେବେ ଗଜପତି କହିଥିଲେ କି, ‘ଯାହା ହେଉ ଉତ୍କଳ ପ୍ରଦେଶ ହେବା ପରଠାରୁ କୌଣସି ସରକାର ଶ୍ରୀମନ୍ଦିର ପାଇଁ, ପୁରୀ ପାଇଁ ଚିନ୍ତନ କରି ନଥିଲେ । ହେଲେ ନବୀନ ବାବୁଙ୍କ ମୁଣ୍ଡରେ ଏଭଳି ଭକ୍ତି କିପରି ଆସିଲା…’ ବୋଲି ହସିହସି ତାତ୍ସଲ୍ୟ କଲାଭଳି କହିଥିଲେ ଗଜପତି ।
ଗଜପତି ଆହୁରି ମଧ୍ୟ କହିଥିଲେ କି ‘ଜାନକୀ ବାବୁ ପଣ୍ଡିତ ଲୋକ ଥିଲେ, ଜଗନ୍ନାଥଙ୍କ ଉପରେ ଜାଣିଥିଲେ । ତେଣୁ ତାଙ୍କ ମନରେ ଏଭଳି ଭାବନା ଆସିବା ସ୍ୱାଭାବିକ କିନ୍ତୁ ନବୀନ ବାବୁ କରିବା ଆଶ୍ଚର୍ଯ୍ୟ କଥା ନୁହେଁ କି, ଏସବୁ କିଏ କରୁଛି ?’ ବୋଲି ଲୋକଙ୍କୁ ପ୍ରଶ୍ନ କରି ଗଜପତି ଉପରକୁ ଇସାରା କରିଥିଲେ ।
ତେବେ ମଞ୍ଚରେ ରାଜ୍ୟ ସରକାରଙ୍କ ଉପରେ ତାତ୍ସଲ୍ୟପୂର୍ଣ୍ଣ ଶବ୍ଦ ପ୍ରୟୋଗ କରିଥିବା ଗଜପତି ମିଡିଆ ଆଗରେ ଭିନ୍ନ ଏକ ପ୍ରତିକ୍ରିୟା ରଖିଥିଲେ । ଗଣମାଧ୍ୟମରେ ଗଜପତି ରାଜ୍ୟ ସରକାରଙ୍କୁ ପ୍ରଶଂସା କରିଥିଲେ । ସରକାରଙ୍କ ଏଜେଣ୍ଡାରେ ମହାପ୍ରଭୁ ଏବଂ ଶ୍ରୀମନ୍ଦିରଙ୍କ ସ୍ଥାନ ପ୍ରଥମ । ଏହା ଉତ୍କଳର ପରମ୍ପରା । ତେଣୁ ବର୍ତ୍ତମାନ ସରକାର ଶ୍ରୀମନ୍ଦିର ଆଉ ଶ୍ରୀକ୍ଷେତ୍ରକୁ ପ୍ରାଧାନ୍ୟ ଦେଇ କାମ ହାତକୁ ନେଇଛନ୍ତି । ତାକୁ ଆମେ ସ୍ୱାଗତ କରୁଛୁ ବୋଲି ଗଜପତି କହିଥିଲେ ।
ତେବେ ନବୀନ ତାଙ୍କର ପଂଚମ ପାଳିରେ ପୁରୀ ଶ୍ରୀମନ୍ଦିର ପାଇଁ ୫ଶହ କୋଟି ଟଙ୍କାର ପ୍ୟାକେଜ ଘୋଷଣା କରିଛନ୍ତି । ଏଥିସହ ମନ୍ଦିର ଆଖପାଖ ଓ ପୁରୀ ସହର ପାଇଁ ଆହୁରି ବଡ ବଡ ପଦକ୍ଷେପ ମାନ ନେଉଛନ୍ତି । ଆଉ ଏହାକୁ ନେଇ ଦୁଇଟି ପ୍ରତିକ୍ରିୟା ରଖିଛନ୍ତି ଗଜପତି ମହାରାଜ ।