ଏଣିକି ଦୃଷ୍ଟିହୀନ ବ୍ୟକ୍ତି ସହଜରେ ଚିହ୍ନିପାରିବେ ନୋଟ୍ । ରିଜର୍ଭ ବ୍ୟାଙ୍କ ଉନ୍ମୋଚନ କଲା ନୂଆ ମୋବାଇଲ୍ ଆପ୍ ‘ମନି’ ।
କନକ ବ୍ୟୁରୋ : ଏବେ ଦୃଷ୍ଟିହୀନ ଲୋକମାନଙ୍କୁ ବ୍ୟାଙ୍କନୋଟ ଚିହ୍ନିବାରେ କୌଣସି ସମସ୍ୟା ହେବ ନାହିଁ । ଭାରତୀୟ ରିଜର୍ଭ ବ୍ୟାଙ୍କ ପକ୍ଷରୁ ଏଥିପାଇଁ ଏକ ସ୍ୱତନ୍ତ୍ର ଆପ୍ ପ୍ରସ୍ତୁତ କରାଯାଇଛି । ଏହାର ନାଁ ହେଉଛି ମନି ବା ମୋବାଇଲ୍ ଏଡେଡ୍ ମୋଟ ଆଇଡେଣ୍ଟିଫାୟର । ଏହି ଆପକୁ ବ୍ୟବହାର କରି ଦୃଷ୍ଟିହୀନମାନେ ବ୍ୟାଙ୍କ ନୋଟକୁ ଚିହ୍ନିପାରିବେ । ରିଜର୍ଭ ବ୍ୟାଙ୍କ ଗଭର୍ଣ୍ଣର ଶକ୍ତିକାନ୍ତ ଦାସ ବୁଧବାରଦିନ ଏହି ଆପର ଉନ୍ମୋଚନ କରିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଏହି ଅବସରରେ ରିଜର୍ଭ ବ୍ୟାଙ୍କ ପକ୍ଷରୁ କୁହାଯାଇଛି ଯେ ଭାରତୀୟ ବ୍ୟାଙ୍କ ନୋଟଗୁଡ଼ିକରେ ବିଭିନ୍ନ ବ୍ୟବସ୍ଥା ରହିଛି ଯଦ୍ୱାରା ଦୃଷ୍ଟିହୀନ, ଆଂଶିକ ଦୃଷ୍ଟିହୀନ, ବର୍ଣ୍ଣାନ୍ଧ ବ୍ୟକ୍ତିମାନେ ନୋଟ ଚିହ୍ନିପାରିବେ । ଏଗୁଡ଼ିକ ହେଉଛି ଇନଟାଗଲିଓ ପ୍ରିଣ୍ଟିଂ, ଟାକଟାଇଲ ମାର୍କ, ବଡ଼ ଅକ୍ଷର, ସ୍ୱତନ୍ତ୍ର ରଂଗ ଓ ବିନ୍ୟାସ ଇତ୍ୟାଦି ।
ଏହି ଆପକୁ ଗୁଗୁଲ ପ୍ଲେ ଷ୍ଟୋରରୁ ମାଗଣାରେ ଡାଉନଲୋଡ କରିହେବ । ଏହି ଆପ ଥରେ ଡାଉନଲୋଡ ହୋଇଗଲେ ତାହା ଚାଲିବା ପାଇଁ ଇଣ୍ଟରନେଟ ସଂଯୋଗ ଆବଶ୍ୟକ କରିବ ନାହିଁ । ଅର୍ଥାତ ଏହା ଅଫଲାଇନରେ ଚାଲିପାରିବ । ଲୋକମାନେ ମୋବାଇଲ ଆପକୁ ଓପନ କରିବା ପରେ ମୋବାଇଲର କ୍ୟାମେରା ମାଧ୍ୟମରେ ବ୍ୟାଙ୍କ ନୋଟକୁ ସ୍କାନକରି ନୋଟ ଚିହ୍ନିପାରିବେ । ଏହା ଉଭୟ ନୂଆ ଓ ପୁରୁଣା ମହାତ୍ମାଗାନ୍ଧି ସିରିଜ ନୋଟକୁ ଚିହ୍ନିବା ସହ ଅଡିଓ ନୋଟିଫିକେସନ ମାଧ୍ୟମରେ ସୂଚୀତ କରିପାରିବ । ତେବେ ନୋଟଟି ଅସଲି କିମ୍ବା ନକଲି ତାହା ଜାଣିବାର ବ୍ୟବସ୍ଥା ଏହି ଆପରେ ନାହିଁ ।