ଟ୍ରେନ୍ ଦୁର୍ଘଟଣାକୁ ନେଇ ବଢୁଛି ରାଜନୀତି ! ରାବଣ ପୋଡ଼ି ଆୟୋଜକଙ୍କ ମିଳୁନି ପତ୍ତା, କର୍ପୋରେଟରଙ୍କ କଂଗ୍ରେସ ସହ ସଂପୃକ୍ତି ଅଭିଯୋଗ ।
ପଞ୍ଜାବର ଅମୃତସରରେ ଘଟିଥିବା ଛାତି ଥରା ଘଟଣାକୁ ନେଇ ରାଜନୀତି ଜୋରଦାର ହୋଇଛି । କାରଣ ଦଶହରାରେ ରାବଣପୋଡି ଉତ୍ସବର ଆୟୋଜନ କରିଥିବା ଆୟୋଜକଙ୍କ ବାବଦରେ ପୋଲିସକୁ ଏପର୍ଯ୍ୟନ୍ତ କୌଣସି ପତା ମିଳିନି । ହେଲେ ସ୍ଥାନୀୟ କେତେକ ଗଣମାଧ୍ୟମର ରିପୋର୍ଟ ଅନୁସାରେ ରାବଣ ପୋଡିର ଆୟୋଜନ କରିଥିଲେ ମିଠୁ ମଦନ ନାମକ ଜଣେ ସ୍ଥାନୀୟ କର୍ପୋରେଟର । କଂଗ୍ରେସ ସହିତ ତାଙ୍କର ସଂପୃକ୍ତି ଥିବା କୁହାଯାଉଛି । ଦୁର୍ଘଟଣା ପରଠାରୁ ସେ ଫେରାର ଅଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ସେପଟେ ରାବଣପୋଡି ଉତ୍ସବରେ ଅତିଥି ଭାବେ ଯୋଗ ଦେଇଥିଲେ ପଞ୍ଜାବ ସରକାରଙ୍କ କ୍ୟାବିନେଟ ମନ୍ତ୍ରୀ ଥିବା ନବଜୋତ ସିଂ ସିଦ୍ଧୁଙ୍କ ପତ୍ନୀ ନବଜୋତ କୌର ସିଦ୍ଧୁ । ହେଉଥିବା ଅଭିଯୋଗ ଅନୁସାରେ ଦୁର୍ଘଟଣା ପରେ ପରେ ସେ ସେଠାରୁ ଖସି ଚାଲିଯାଇଥିଲେ । ଏହି ଅଭିଯୋଗକୁ କିନ୍ତୁ ଅସ୍ୱୀକାର କରିଛନ୍ତି ନବଜୋତ କୌର ।
ନବଜୋତ କୌର ଗଣମାଧ୍ୟମକୁ କହିଛନ୍ତି, ସେ ଘଟଣାସ୍ଥଳ ଛାଡି ଚାଲିଯିବା ପରେ ଦୁର୍ଘଟଣା ଘଟିଥିଲା । ଏପରିକି ସେ ସୂଚନା ପାଇବା ପରେ ପୋଲିସ କମିଶନରଙ୍କ ସହ ଫୋନରେ କଥା ହୋଇଥିଲେ । ଘଟଣାସ୍ଥଳରେ ଉତ୍ତେଜନା ଥିବାରୁ ସେ ନଆସିବାକୁ ପରାମର୍ଶ ଦେଇଥିଲେ । ଏହାପରେ ସେ ହସ୍ପିଟାଲ ଯାଇ ଆହତଙ୍କୁ ଭେଟିଥିଲେ । ତେବେ ଘଟଣାକୁ ନେଇ ରାଜନୀତି ନକରିବାକୁ ସେ କହିଛନ୍ତି । ଏଥିସହ ରେଳବାଇର ଅବହେଳା ଯୋଗୁଁ ଏତେବଡ ଦୁର୍ଘଟଣା ଘଟିଲା ବୋଲି ଅଭିଯୋଗ କରିଛନ୍ତି । ଦଶହରା ଉତ୍ସବ ବାବଦରେ ସୂଚନା ଥିଲେ ମଧ୍ୟ ରେଳଗୁଡିକର ବେଗ କାହିଁକି କମ୍ କରାଯାଇନଥିଲା ବୋଲି ପ୍ରଶ୍ନ କରିଛନ୍ତି ନବଜୋତ କୌର ସିଦ୍ଧୁ ।