ଆଗେଇ ଚାଲିଛି ରଥ ନିର୍ମାଣର ଶେଷ ପର୍ଯ୍ୟାୟ କାମ: ସରିଲା ଶିଖ ଡମ୍ବୁରୁ ବାଡ଼ିଆ, ପାର୍ଶ୍ୱ ଦେବାଦେବୀ ସଂଯୋଗ
କନକ ବ୍ୟୁରୋ: ରଥ ନିର୍ମାଣ କାର୍ଯ୍ୟର ଶେଷ ପର୍ଯ୍ୟାୟ କାମ ଏବେ ଆଗେଇ ଚାଲିଛି। ରବିବାର ଦିନ ତିନି ରଥ ନନ୍ଦିଘୋଷ, ତାଳଧ୍ୱଜ ଓ ଦର୍ପଦଳନରେ ହଂସପଟା ବାଡ଼ିଆ କାମ ଶେଷ ପରେ ଗତକାଲି ଶିଖ ଡମ୍ବୁରୁ ବାଡ଼ିଆ କାମ ଶେଷ ହୋଇଛି। ମହାରଣା ସେବକ ଓ ଭୋଇ ସେବକମାନେ ଗତକାଲି ତିନି ରଥରେ ଶିଖ ଡମ୍ବୁରୁ ବାଡ଼ିଆ କାମ ଶେଷ କରିଛନ୍ତି।
Kanak News is now on WhatsApp
Join and get latest news updates delivered to you via WhatsApp
ସେହିପରି ପୂର୍ବରୁ ରଙ୍ଗ ଦିଆ ସରିଥିବା ପାର୍ଶ୍ୱ ଦେବାଦେବୀଙ୍କୁ ଗତକାଲି ତିନି ରଥରେ ସଂଯୋଗ କରାଯାଇଛି। ଗୋଟିଏ ରଥରେ ଦୁଇ ଦ୍ଵାରପାଳ ରହିଥାନ୍ତି। ଏପରି ତିନି ରଥରେ ୬ ଦ୍ଵାରପାଳ ଲାଗିଥାନ୍ତି। ରବିବାର ଦିନ ଏହି ଦ୍ଵାରପାଳ ରଙ୍ଗ ସରିବା ଗତକାଲି ଏହାକୁ ତିନି ରଥରେ ସଂଯୋଗ କରାଯାଇଛି। ବାକି କାମ ଖୁବ୍ଶ୍ରୀଘ୍ର ଶେଷ କରିବାକୁ ମହାରଣା ଓ ଭୋଇ ସେବକମାନେ ତତ୍ପରତା ଦେଖାଇଛନ୍ତି। ସେପଟେ ଚିତ୍ରକାର ଓ ରୂପକାର ସେବକମାନେ ବି ସେମାନଙ୍କ କାମକୁ ଆଗେଇ ନେଉଛନ୍ତି। ତିନି ରଥରେ ରଙ୍ଗ କାମ ଜୋରସୋରରେ ଚାଲିଛି। କମାର ସେବକମାନେ ବି ଲୌହ ସାମଗ୍ରୀ ପ୍ରସ୍ତୁତିକୁ ଶେଷ ପର୍ଯ୍ୟାୟରେ ପହଞ୍ଚାଇଛନ୍ତି।