ପଦ୍ମ ଦଳର ଓଡିଶା ଦଖଲ ପ୍ଲାନ ! ୨୦୧୯ ଯୁଦ୍ଧ ପାଇଁ ସାରଥୀ ସାଜି ଆସୁଛନ୍ତି ବିଜେପିର ହେଭିୱେଟ୍, ୧୭ରେ ରାଜନାଥ ଓ ୨୦ରେ ଆଦିତ୍ୟନାଥ କର୍ମୀଙ୍କୁ ଦେବେ ବିଜୟ ମନ୍ତ୍ର
କନକ ବ୍ୟୁରୋ : ୨୦୧୯ ନିର୍ବାଚନ ଯେତିକି ପାଖେଇ ଆସୁଛି ପ୍ରମୁଖ ରାଜନୈତିକ ଦଳ ମଧ୍ୟରେ ପ୍ରତିଦ୍ୱନ୍ଦ୍ୱିତା ସେତିକି ବଢୁଛି । ଦୁଇ ପ୍ରମୁଖ ଜାତୀୟ ଦଳର ଫୋକସରେ ଏବେ ଓଡିଶା । ଜନତାଙ୍କ ନିକଟତର ହେବା ସହ ଓଡିଶା ଦଖଲ ପାଇଁ ଚାଲିଛି ଅଙ୍କକଷା । ଏହାରି ମଧ୍ୟରେ ପୂର୍ବଭାରତକୁ ଦଖଲ କରିବା ଲକ୍ଷ୍ୟରେ ବିଜେପି ଆରମ୍ଭ କରିବ ପ୍ରଚାର । ଖାସକରି ଦଳର ଫାୟାରବ୍ରିଗେଡ ନେତା ଯୋଗୀ ଆଦିତ୍ୟନାଥ ଓ ରାଜନାଥଙ୍କ ଭଳି ହେଭିୱେଟଙ୍କୁ ପ୍ରଚାର ମୈଦାନକୁ ଓହ୍ଲାଇ ଭୋଟ ହାତେଇବାକୁ ଲକ୍ଷ୍ୟ ରଖିଛି ଦଳ । ଆଉ ଏହି କ୍ରମରେ ଆସନ୍ତା ୧୭ ଓ ୨୦ରେ ଯଥାକ୍ରମେ କେନ୍ଦ୍ରମନ୍ତ୍ରୀ ରାଜନାଥ ସିଂ ଓ ଉତ୍ତର ପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥଙ୍କୁ ପ୍ରଚାର ମୈଦାନକୁ ଓହ୍ଲାଇବାକୁ ସ୍ଥିର କରିଛି ଗେରୁଆ କ୍ୟାମ୍ପ ।
Kanak News is now on WhatsApp
Join and get latest news updates delivered to you via WhatsApp
ଆସନ୍ତା ୧୭ ତାରିଖରେ କେନ୍ଦ୍ରମନ୍ତ୍ରୀ ରାଜନାଥ ସିଂ ଓଡିଶା ଗସ୍ତରେ ଆସି ଭଦ୍ରକରେ ସମାବେଶ କରିବାର କାର୍ଯ୍ୟକ୍ରମ ରହିଥିବା ବେଳେ ଯୋଗୀ ଆଦିତ୍ୟନାଥ ୨୦ ତାରିଖରେ ଭବାନୀପାଟଣା ଓ ଚିଲିକାରେ ୨୦୧୯ ପାଇଁ କର୍ମୀଙ୍କୁ ଦେବେ ଗୁରୁମନ୍ତ୍ର । ଏନେଇ ବିଜେପି ମୁଖପାତ୍ର ଗୋଲକ ମହାପାତ୍ର ସୂଚନା ଦେଇଛନ୍ତି । ମୋଦିଙ୍କ ଗସ୍ତ ପରେ ଶୀଥଳ ପଡି ଯାଇଥିଲା ଗେରୁଆ କ୍ୟାମ୍ପ । କିନ୍ତୁ ଲଗାତାର ୨ ଥର ଓଡିଶା ଗସ୍ତରେ ଆସି ବିଜେପି ଚାଣକ୍ୟ ଅମିତ ଶାହା ନିଜର ତତଲା ଭାଷଣରେ ଶୀଥଳ ପଡିଯାଇଥିବା ଗେରୁ ଆ କ୍ୟାମ୍ପରେ ଉଷୁମ ପାଣି ଛିଞ୍ଚିଛନ୍ତି । ଯାହା କର୍ମୀଙ୍କ ମନରେ ୨୦୧୯ ଯୁଦ୍ଧ ପାଇଁ ଜୋଶ ଭରିଦେଇଛି ।ଆଉ ଏଭଳି ସମୟରେ ବିଜେଡି ଶିବିରକୁ ତୀର ମାରି କ୍ଷତାକ୍ତ କରିବାକୁ ଓଡିଶା ଗସ୍ତରେ ଆସୁଛନ୍ତି ଯୋଗୀ ଆଦିତ୍ୟନାଥ ଓ ରାଜନାଥ ।
ଏ ସରକାର ବଦଳିବା ଦରକାର ନାରା ଦେଇ ୨୦୧୯ ଯୁଦ୍ଧ ପାଇଁ ପ୍ରସ୍ତୁତ ହେଉଛି ବିଜେପି । ଆଉ ଓଡିଶାରେ ଗେରୁଆ ବିଜୟ ରଥ ଗଡାଇବାକୁ ସାରଥୀ ସାଜି ଆସିବାକୁ ପ୍ରସ୍ତୁତ ହେଉଛନ୍ତି ଯୋଗୀ ଓ ରାଜନାଥଙ୍କ ଭଳି କେନ୍ଦ୍ରୀୟ ନେତା । ଏହାଛଡା କେନ୍ଦ୍ର ମନ୍ତ୍ରୀ ରାମକ୍ରିପାଲ ଯାଦବ, ମନୋଜ ସିଂହ୍ନା, ମନସୁଖ ମଣ୍ଡାୱାଲିଆ ପ୍ରମୁଖ ଓଡିଶା ଆସି ୧୪୭ ବିଧାନସଭା ଆସନରେ ସମାବେଶ କରିବା ସହ କର୍ମୀଙ୍କ କାନରେ ଫୁଙ୍କିବେ ନିର୍ବାଚନ ଜିତିବାର ମନ୍ତ୍ର ।
କେବଳ ଗେରୁଆ କ୍ୟାମ୍ପ ନୁହେଁ ନିର୍ବାଚନ ପ୍ରଚାରରେ ବିଜେପି ଓ ବିଜେଡିକୁ ଚେକ ଦେବା ପାଇଁ ରାହୁଲ ଗାନ୍ଧି ମଧ୍ୟ ପ୍ରଚାର ଅଭିଯାନକୁ ଜୋରଦାର କରିଛନ୍ତି । କିଛି ଦିନ ମଧ୍ୟ ଦୁଇ ଦୁଇଥର ଗସ୍ତରେ ଆସିଥିବା ରାହୁଲ ପୁଣିଥରେ ଏହି ମାସ ଶେଷ ସପ୍ତାହରେ କୋରାପୁଟ ଆସୁଛନ୍ତି । ନୂଆକରି କଂଗ୍ରେସର ସାଧାରଣ ସମ୍ପାଦକ ଭାବେ ଦାୟିତ୍ୱ ଗ୍ରହଣ କରିଥିବା ପ୍ରିୟଙ୍କା ଗାନ୍ଧିଙ୍କୁ ମଧ୍ୟ ଓଡିଶା ଆଣିବା ପାଇଁ ଉଦ୍ୟମ ଚାଲିଥିବା ପିସିସି ସଭାପତି ନିରଞ୍ଜନ ପଟ୍ଟନାୟକ ସୂଚନା ଦେଇଛନ୍ତି । ଆଉ ଏହା ହିଁ ସୂଚାଉଛି ପ୍ରଚାର ମୈଦାନରେ ରାଜ୍ୟର ୩ ପ୍ରମୁଖ ଦଳ ମଧ୍ୟରେ ହେବ ଜୋରଦାର ଲଢେଇ । ତେବେ ଜନତା କାହାକୁ ବିଜେତାର ସାର୍ଟିଫିକେଟ ଦେବେ ତାହା ନିର୍ବାଚନ ପରେ ସ୍ପଷ୍ଟ ହୋଇଯିବ ।