ସୁନ୍ଦରଗଡରେ ସାଂଘାତିକ ସ୍ଥିତି ! ସ୍କୁଲ ସମେତ ସରକାରୀ ଅଧିକାରୀଙ୍କ ଘରେ ପଶିଲା ବର୍ଷା ପାଣି ।
କନକ ବ୍ୟୁରୋ : ଗତ କିଛି ଦିନ ଧରି ଲଗାଣ ବର୍ଷାର ପ୍ରଭାବ ସାରା ରାଜ୍ୟରେ ଦେଖିବାକୁ ମିଳିଛି । ଅନେକ ସ୍ଥାନ ଜଳମଗ୍ନ ହୋଇଥିବା ବେଳେ ଶହ ଶହ ହେକ୍ଟର ଚାଷ ଜମିରେ ପାଣି ପଶିଛି । ଲଗାଣ ବର୍ଷାରେ ବେହାଲ ହୋଇପଡିଛି ସୁନ୍ଦରଗଡ । ସୁନ୍ଦରଗଡ କୁତ୍ରା ବ୍ଲକରେ ଦେଖିବାକୁ ମିଳିଛି ଅଭାବନୀୟ ଘଟଣା । ଲଗାଣ ବର୍ଷା ଫଳରେ ସ୍ଥାନୀୟ ଅଞ୍ଚଳରେ ଥିବା କେନ୍ଦ୍ରୀୟ ବିଦ୍ୟାଳୟରେ ପାଣି ପଶିଥିଲା । ଆଜି ସକାଳେ ଛାତ୍ରଛାତ୍ରୀ ସ୍କୁଲ ଯିବା ସମୟରେ କେନ୍ଦ୍ରୀୟ ବିଦ୍ୟାଳୟ ପରିସର ସମେତ ଶ୍ରେଣୀଗୃହରେ ଆଣ୍ଠୁଏ ଆଣ୍ଠୁଏ ପାଣି ଜମି ରହିଥିଲା । ଛାତ୍ରଛାତ୍ରୀଙ୍କ ସମେତ ସ୍କୁଲ କର୍ତ୍ତୃପକ୍ଷ ନାହିଁନଥିବା ଅସୁବିଧାର ସମ୍ମୁଖୀନ ହୋଇଥିଲେ । ଖବର ଜାଣିବା ପରେ ସୁନ୍ଦରଗଡ ଜିଲ୍ଲାପାଳ ଆଜି ସ୍କୁଲକୁ ଛୁଟି ଘୋଷଣା କରିଥିଲେ ।
Kanak News is now on WhatsApp
Join and get latest news updates delivered to you via WhatsApp
ସୂଚନା ଅନୁଯାୟୀ, ସୃଷ୍ଟି ହୋଇଥିବା ଲଘୁଚାପ ପାଇଁ ଗତ ଦୁଇ ଦିନ ହେବ ରାଜ୍ୟର ଅନେକ ସ୍ଥାନରେ ବର୍ଷା ଜାରି ରହିଥିଲା । ତେବେ କାଲି ରାତି ଠାରୁ ପ୍ରବଳ ବର୍ଷା ହୋଇଥିବାରୁ ସୁନ୍ଦରଗଡର ବିଭିନ୍ନ ସରକାରୀ କାର୍ଯ୍ୟାଳୟ ସମେତ, ସ୍କୁଲ, ପଶୁ ଡାକ୍ତରଖାନାରେ ପାଣି ପଶିଯାଇଥିଲା । ଏପରିକି ଜିଲ୍ଲା ଶିକ୍ଷା ଅଧିକାରୀଙ୍କ ବାସ ଭବନରେ ପାଣି ପଶିଥିବା ମଧ୍ୟ ଦେଖିବାକୁ ମିଳିଥିଲା । ସ୍କୁଲରେ ବର୍ଷା ପାଣି ପଶିଥିବା ହେତୁ ବାଧ୍ୟ ହୋଇ ଜିଲ୍ଲାପାଳ ସ୍କୁଲକୁ ଛୁଟି ଘୋଷଣା କରିଥିଲେ । ତେବେ ଆସନ୍ତାକାଲି ସ୍ଥିତି ପରଖିବା ପରେ ସ୍କୁଲ ଖୋଲିବା ନେଇ ନିଷ୍ପତ୍ତି ନିଆଯିବ ବୋଲି ସୁନ୍ଦରଗଡ ଜିଲ୍ଲାପାଳ କହିଛନ୍ତି । ତେବେ ବର୍ଷା ଏବେ କମିଥିବା ବେଳେ ଆଗକୁ କେଉଁ ପରିସ୍ଥିତି ସୃଷ୍ଟି ହେବ ତାକୁ ନେଇ ଚିନ୍ତାରେ ରହିଛନ୍ତି ସ୍ଥାନୀୟବାସୀ ।