ରେଳଯାତ୍ରୀଙ୍କୁ ଚୋରି ରୋଗ ! ଟିକିଏ ମଉକା ପାଇଲେ ଟଏଲେଟର ମଗ୍ ଠାରୁ ଆରମ୍ଭ କରି ତଉଲିଆ, ବେଡସିଟ୍, ଚାଦର ଧରି ଛୁ’ ହୋଇଯାଉଛନ୍ତି ଯାତ୍ରୀ
ରେଳଯାତ୍ରୀ ମାନଙ୍କୁ ପଞ୍ଚତାରକା ହୋଟେଲର ଅନୁଭବ ଦେବା ପାଇଁ ରେଲୱେ ପକ୍ଷରୁ ନୂଆ ନୂଆ କାର୍ଯ୍ୟକ୍ରମ ହାତକୁ ନିଆଯାଉଛି । ଆଉ ଏଥିପାଇଁ କିଛି ସ୍ଥାନରେ ରେଲୱେର ବଗିକୁ ସମ୍ପୂର୍ଣ୍ଣ ଭାବେ ପରିବର୍ତ୍ତନ କରାଯାଉଛି । ରେଳଯାତ୍ରୀଙ୍କୁ ଆରାମଦାୟକ ଯାତ୍ରା ପ୍ରଦାନ କରିବା ଏବେ ରେଲୱେର ପ୍ରମୁଖ ଲକ୍ଷ୍ୟ । ଆଉ ଏଭଳି ସମୟରେ ରେଳବିଭାଗରୁ ଯେଉଁ ତଥ୍ୟ ମିଳିଛି ତାହା ଆପଣଙ୍କୁ ଆଶ୍ଚର୍ଯ୍ୟ କରିଦେବ । ଟ୍ରେନରେ ଚୋରି ହେବା କଥା କିଛି ନୂଆ କଥା ନୁହେଁ । ଅନେକ ଯାତ୍ରୀ ରେଳଯାତ୍ରା ସମୟରେ ଚୋରିର ଶିକାର ହୋଇଥାନ୍ତି । କିନ୍ତୁ ଏବେ ଟ୍ରେନରୁ ଯେଉଁ ସାମଗ୍ରୀ ଚୋରି ହେଉଛି ତାହା ଜାଣିଲେ ଆପଣ ଆଶ୍ଚର୍ଯ୍ୟ ହେବେ ।
Kanak News is now on WhatsApp
Join and get latest news updates delivered to you via WhatsApp
ଟ୍ରେନ ଯାତ୍ରା ସମୟରେ ଚୋରିରୁ ବର୍ତ୍ତିବା ପାଇଁ ଯାତ୍ରୀ ମାନେ ନିଜର ସମସ୍ତ ଜିନିଷକୁ ନିଜ ପାଖରେ ରଖିଥାନ୍ତି । କିନ୍ତୁ ଏବେ ଚୋରମାନେ ଯାତ୍ରୀଙ୍କ ସାମଗ୍ରୀ ବଦଳରେ ରେଳବିଭାଗର ବିଭିନ୍ନ ସାମଗ୍ରୀକୁ ଟାର୍ଗେଟ କରିଛନ୍ତି । ଟଏଲେଟ ମଗ ଠାରୁ ଆରମ୍ଭ କରି ଫଙ୍ଖା, ବେଡସିଟ ଠାରୁ ଆରମ୍ଭ କରି ତକିଆ ଖୋଳ ପର୍ଯ୍ୟନ୍ତ ଯାତ୍ରୀ ମାନେ ବ୍ୟବହାର କରୁଥିବା ଏହିସବୁ ସାମଗ୍ରୀ ଏବେ ଚୋରଙ୍କର ପ୍ରଥମ ପସନ୍ଦ ପାଲଟିଛି । ପଶ୍ଚିମ ରେଳବିଭାଗରୁ ମିଳିଥିବା ସୂଚନା ଅନୁଯାୟୀ, ଚଳିତ ବର୍ଷ ଟ୍ରେନରୁ ୧.୯୫ ଲକ୍ଷ ଟାୱେଲ, ୮୧,୭୩୬ଟି ଚାଦର, ୫୦୩୮ଟି ତକିଆ, ୫୫,୫୭୩ ତକିଆ ଖୋଳ, ୭୦୪୩ଟି କମ୍ବଳ ଚୋରି ହୋଇଥିବା ଜଣାପଡିଛି । ଏପରିକି ଯାତ୍ରୀ ମାନେ ଟଏଲେଟ ମଗକୁ ମଧ୍ୟ ଛାଡି ନାହାନ୍ତି । ଚଳିତ ବର୍ଷ ୨୦୦ଟି ଟଏଲେଟ ମଗ୍, ହଜାରରୁ ଅଧିକ ଟ୍ୟାପ୍ ଓ ୩୦୦ରୁ ଅଧିକ ଫ୍ଲସ୍ ପାଇପ ଚୋରି ହୋଇଛି ।
ଏହାଛଡା ଏପ୍ରିଲରୁ ସେପ୍ଟେମ୍ବର ମାସ ମଧ୍ୟରେ ୭୯,୩୫୦ଟି ହାତଧୁଆ ଟାୱେଲ, ୨୭,୫୪୫ଟି ବେଡସିଟ, ୨୧,୦୫୦ଟି ତକିଆ ଖୋଳ, ୨୧୫୦ଟି ତକିଆ, ୨୦୬୫ଟି ଚାଦର ଚୋରି ହୋଇଛି । ଯାହାର ଆନୁମାନିକ ମୂଲ୍ୟ ୬୨ ଲକ୍ଷ ଟଙ୍କା ହେବ । ସାଧାରଣତଃ ଟ୍ରେନରୁ ଚୋରି ହେଉଥିବା ତକିଆ ଓ ଚାଦର କ୍ଷତିଭରଣା କୋଚ ଆଟେଡାଣ୍ଟଙ୍କୁ ଭରଣା କରିବାକୁ ପଡିଥାଏ । କିନ୍ତୁ ବାଥରୁମରୁ ଚୋରି ହେଉଥିବା ସାମଗ୍ରୀର ଭରଣା ରେଳୱେ କରିଥାଏ । ଟ୍ରେନରେ ବ୍ୟବହାର କରିବାକୁ ଦିଆଯାଉଥିବା ପ୍ରତି ବେଡସିଟର ମୂଲ୍ୟ ୧୩୨ ଟଙ୍କା ହୋଇଥିବା ବେଳେ , ଟାୱେଲର ମୂଲ୍ୟ ୨୨ଟଙ୍କା, ତକିଆର ମୂଲ୍ୟ ୨୫ ଟଙ୍କା ରହିଥାଏ । ୨୦୧୭-୧୮ ଆର୍ଥିକ ବର୍ଷରେ ଟ୍ରେନରୁ ଚୋରି ହୋଇଥିବା ୨.୯୭ କୋଟି ମୂଲ୍ୟର ସାମଗ୍ରୀ ଜବତ କରିଛି ରେଲୱେ ପୋଲିସ ।