କମ୍ବଳ ନଦେଇ ତାପମାତ୍ରା ବଢ଼ାଇବ ରେଳ !
କନକ ବ୍ୟୁରୋ: ରେଳଯାତ୍ରୀଙ୍କୁ ପରିଷ୍କାର ପରିଚ୍ଛନ୍ନ ନଥିବା ବେଡସିଟ୍, କମ୍ବଳ, ତକିଆ ଖୋଳ ଏବଂ ମୁହଁପୋଛା ତଉଲିଆ ଦିଆଯାଉଛି ବୋଲି ଭାରତର ମହାଲେଖା ନିୟନ୍ତ୍ରକ ତଥା ମହାସମୀକ୍ଷକ (ସିଏଜି) ଧରିବା ପରେ ଆଗାମୀ ଦିନରେ କମ୍ବଳ ଯୋଗାଇ ନଦେବା ନେଇ ରେଳବାଇ ଚିନ୍ତା କରୁଛି । ଏସି ବଗିରେ ଯାତ୍ରୀଙ୍କୁ କମ୍ବଳ ଦେବା ପରିବର୍ତେ ବଗିର ତାପମାତ୍ରା ୧୯ ଡିଗ୍ରିରୁ ୨୪ ଡିଗ୍ରିକୁ ବୃଦ୍ଧି କରାଯିବ ବୋଲି ଏକ ସୂତ୍ରରୁ ସୂଚନା ମିଳିଛି ।
Kanak News is now on WhatsApp
Join and get latest news updates delivered to you via WhatsApp
ରେଳ ବିଭାଗର ଏକ ସୂତ୍ରରୁ ଜଣାଯାଇଛି ଯେ, ଯାତ୍ରୀଙ୍କୁ କମ୍ବଳ ଯୋଗାଣକୁ ବନ୍ଦ କରି ଦିଆଗଲେ ରେଳବାଇର ଅନେକ ଅର୍ଥ ସଞ୍ଚୟ ହୋଇପାରିବ । କାରଣ ବେଡରୋଲକୁ ସଫା କରିବା ଲାଗି ୫୫ ଟଙ୍କା ଖର୍ଚ୍ଚ ହେଉଥିବାବେଳେ ଯାତ୍ରୀଙ୍କଠାରୁ ଏଥିପାଇଁ ୨୨ ଟଙ୍କା ଆଦାୟ କରାଯାଉଛି ।
ସିଏଜି ରିପୋର୍ଟ ଅନୁସାରେ ରେଳବାଇ ପକ୍ଷରୁ ଧାର୍ଯ୍ୟ ନିୟମାବଳୀ ଅନୁଯାୟୀ କମ୍ବଳ, ତକିଆ ଖୋଳ, ବେଡସିଟ୍ ଆଦି ସଫା କରାଯାଉନାହିଁ । ଯାତ୍ରୀଙ୍କୁ ପରିଷ୍କାର ପରିଚ୍ଛନ୍ନ କମ୍ବଳ ଏବଂ ବେଡସିଟ୍ ଆଦି ଦେବା ପାଇଁ ଏକ ଉନ୍ନତ ବ୍ୟବସ୍ଥା ସ୍ଥାପନ କରିବାକୁ ସିଏଜି ପରାମର୍ଶ ଦେଇଛନ୍ତି । ରେଳମନ୍ତ୍ରୀ ୨୦୧୬ରେ ବେଡରୋଲକୁ ଥରେ ବ୍ୟବହାର କରି ଫିଙ୍ଗିଦେବା ଲାଗି ନିର୍ଦେଶ ଦେଇଥିଲେ ମଧ୍ୟ ତାହାକୁ ସବୁସ୍ଥାନରେ କାର୍ଯ୍ୟକାରୀ କରାଯାଇ ପାରିନାହିଁ । ଫଳରେ ଯାତ୍ରୀମାନେ ଅଧିକାଂଶ ସମୟରେ ମଇଳା କମ୍ବଳ, ବେଡସିଟ୍ ଆଦି ଯୋଗାଣ ନେଇ ଅଭିଯୋଗ କରି ଆସୁଛନ୍ତି ।
କମ୍ବଳ ଖୋଳ ଦେଲା ରେଳ
ଟ୍ରେନ୍ରେ ଯାତ୍ରୀଙ୍କୁ ମଇଳା କମ୍ବଳ, ତକିଆ ଖୋଳ, ବେଡ୍ସିଟ୍, ମୁହଁପୋଛ ତଉଲିଆ ଦେଉଥିବା ବିଷୟ ସିଏଜି ଧରିବା ପରେ ରେଳବାଇ ଏବେ ସତର୍କ ହୋଇଯାଇଛି । ଏସି ପ୍ରଥମ ଶ୍ରେଣୀ ବଗିରେ ଯାତ୍ରୀମାନଙ୍କୁ ରେଳବାଇ ପକ୍ଷରୁ କମ୍ବଳକୁ ଖୋଳ ଭିତରେ ପୂରାଇ ଦିଆଯାଉଛି । ଏହି ସେବା ପ୍ରାୟ ସବୁ ପ୍ରମୁଖ ରେଡ ଡିଭିଜନର ଆରମ୍ଭ ହୋଇଛି ।
ଚଳିତମାସ ଶେଷ ସୁଦ୍ଧା ସବୁ ଡିଭିଜନରେ ଏହି ସେବା ଉପଲବ୍ଧ କରାଯିବ । ଏହି ଖୋଳ ଗୁଡ଼ିକୁ ଦୈନିକ ସଫା କରାଯିବ ବୋଲି ରେଳବାଇର ପ୍ରବକ୍ତା ଅନୀଲ ସକସେନା କହିଛନ୍ତି । ତେବେ ରେଳର ଏସି ବଗିରେ ତାପମାତ୍ରା ୧୯ ଡିଗ୍ରିରୁ ୨୪ ଡିଗ୍ରିକୁ ବୃଦ୍ଧି କରାଯିବା ଖବର ସମ୍ପର୍କରେ ସେ କୁହନ୍ତି ଏ ନେଇ କିଛି ଚୂଡ଼ାନ୍ତ ନିଷ୍ପତ୍ତି ନିଆଯାଇନାହିଁ । ଏହା କେତେଦୂର କାର୍ଯ୍ୟକ୍ଷମ ହୋଇପାରିବ ତାହାକୁ ଦେଖାଯାଉଛି ବୋଲି ସେ କହିଛନ୍ତି ।