ମାନସରୋବର ଯାତ୍ରା ସହ ମନେପଡିଲା ରାହୁଲଙ୍କ ମୃତ୍ୟୁ ସହ ମୁହାଁମୁହିଁର ୨୦ ସେକେଣ୍ଡ ! ନିର୍ବାଚନ ପ୍ରଚାରରେ ଦିଲ୍ଲୀରୁ କର୍ଣ୍ଣାଟକ ଗଲାବେଳେ ଖସିପଡୁଥିଲା ବିମାନ ।
କନକ ବ୍ୟୁରୋ : କଂଗ୍ରେସ ଅଧ୍ୟକ୍ଷ ରାହୁଲ ଗାନ୍ଧିଙ୍କ ମାନସରୋବର ଯାତ୍ରା ସହ ତାଜା ହୋଇଛି ମୃତ୍ୟୁ ସହ ମୁହାଁମୁହିଁର ୨୦ ସେକେଣ୍ଡ । ନିର୍ବାଚନୀ ପ୍ରଚାରରେ ଦିଲ୍ଲୀରୁ କର୍ଣ୍ଣାଟକ ଗଲାବେଳେ ଅଚାନକ ତଳକୁ ଖସିଥିଲା ରାହୁଲଙ୍କ ଚାର୍ଟାଡ ପ୍ଲେନ । ଆଉ ମୃତ୍ୟୁ ନିଶ୍ଚିତ ବୋଲି ଧରି ନେଇଥିବା ରାହୁଲ ଗାନ୍ଧି ମନେମନେ ମାନସରୋବର ଯାତ୍ରା ଲାଗି ମାନସିକ କରିଥିଲେ । ତେବେ ଦୁର୍ଘଟଣା ଘଟିବାକୁ ଆଉ ମାତ୍ର ୨୦ ସେକେଣ୍ଡ ବାକି ଥିବାବେଳେ ନିୟନ୍ତ୍ରଣକୁ ଆସିଯାଇଥିଲା ବିମାନ । ଆଉ ଏକ ବଡ ବିପଦ ଟଳିଯାଇଥିଲା । ହେଲେ ଏହି ଘଟଣାକୁ ନେଇ ରାଜନୀତି ବି ଜୋରଦାର ହୋଇଛି ।
Kanak News is now on WhatsApp
Join and get latest news updates delivered to you via WhatsApp
ଗତ ଏପ୍ରିଲ ୨୬ ତାରିଖରେ ଦିଲ୍ଲୀରୁ କଂଗ୍ରେସ ଅଧ୍ୟକ୍ଷ ରାହୁଲ ଗାନ୍ଧି କର୍ଣ୍ଣାଟକର ହୁବଲି ଯିବା ସମୟର ଏକ ଘଟଣା । କର୍ଣ୍ଣାଟକ ବିଧାନସଭା ନିର୍ବାଚନ ପୂର୍ବରୁ ପ୍ରଚାର ପାଇଁ ଯାଉଥିବା ରାହୁଲ ଗାନ୍ଧିଙ୍କ ଚାର୍ଟାଡ ପ୍ଲେନ ଅଚାନକ ତଳକୁ ଖସିବା ଆରମ୍ଭ କରିଥିଲା । ବିମାନଟି ବାମ ପଟକୁ ଢଳି ରହିବା ସହ ପ୍ରାୟ ୮ ହଜାର ଫୁଟ ତଳକୁ ଖସିଥିଲା । ୧୦ ଆସନ ବିଶିଷ୍ଟ ଏହି ଚାର୍ଟାଡ ପ୍ଲେନରେ ରାହୁଲ ଗାନ୍ଧିଙ୍କ ସହ ଥିଲେ ଅନ୍ୟ ୪ ଜଣ ଯାତ୍ରୀ, ୨ଜଣ ପାଇଲଟ୍, ଜଣେ କ୍ୟାବିନ ସଦସ୍ୟ ଓ ଜଣେ ଇଂଜିନିୟର । ଖୁବ ଜୋରରେ କମ୍ପନ ସହ ବିମାନଟି ଅଚାନକ ତଳକୁ ଖସୁଥିବାବେଳେ ପାଇଲଟଙ୍କ ନିୟନ୍ତ୍ରଣରେ ନଥିବା ଅନୁଭବ କରିପାରିଥିଲେ ବିମାନରେ ସବାର ରାହୁଲ ଗାନ୍ଧି ଓ ଅନ୍ୟମାନେ । ଥରେ ଚିନ୍ତା କରନ୍ତୁ ଆକଶରେ ଆତଙ୍କର ସେହି ସେହି ଅନୁଭୂତି ।
ମୃତ୍ୟୁରୁ ଦୂରତା ମାତ୍ର ୨୦ ସେକେଣ୍ଡ ! ଦୁର୍ଘଟଣାରୁ ବର୍ତ୍ତିଗଲା ରାହୁଲଙ୍କ ବିମାନ । ବିମାନଟି ଦ୍ରୁତ ବେଗରେ ତଳକୁ ଖସୁଥିବା ବେଳେ ମୃତ୍ୟୁ ନିଶ୍ଚିତ ବୋଲି ଧରି ନେଇଥିଲେ ରାହୁଲ ଗାନ୍ଧି । ହେଲେ ବିମାନ କ୍ରାସ ହେବାର ଅର୍ଥାତ ମାଟିକୁ ଛୁଇଁବାର ମାତ୍ର ୨୦ ସେକେଣ୍ଡ ପୂର୍ବରୁ ନିୟନ୍ତ୍ରଣକୁ ଆସିଗଲା । ଆଉ ଏକ ନିଶ୍ଚିତ ମୃତ୍ୟୁରୁ ବର୍ତିଗଲେ କଂଗ୍ରେସ ଅଧ୍ୟକ୍ଷ । ହୁବଲି ବିମାନବନ୍ଦରରେ ଅବତରଣ କରିବାର ଠିକ ପୂର୍ବରୁ ଘଟିଥିଲା ଏହି ଘଟଣା । ସେତେବେଳେ ବେସାମରିକ ବିମାନ ଚଳାଚଳ ମନ୍ତ୍ରାଳୟ ପକ୍ଷରୁ ବିମାନରେ ଯାନ୍ତ୍ରିକ ତ୍ରୁଟି ଯୋଗୁ ଏଭଳି ଘଟିଥିବା କୁହାଯାଇଥିଲା । ହେଲେ ବିମାନରେ ଜାଣିଶୁଣି ତ୍ରୁଟି ରଖାଯାଇଥିବା ଅଭିଯୋଗ କରିଥିଲା କଂଗ୍ରେସ । କଂଗ୍ରେସ ପକ୍ଷରୁ ଦିଆଯାଇଥିଲା ଏକ ଏଫଆଇଆର କପି । ଯେଉଁଥିରେ ବିମାନର ଗୋଟିଏ ପଟୁ ଭୟଙ୍କର ଶବ୍ଦ ଶୁଣାଯାଉଥିବା ନେଇ ଉଲ୍ଲେଖ କରାଯାଇଛି । ବିମାନ ଖୁବ ଜୋରରେ ତଳକୁ ଖସୁଥିବାବେଳେ ରାହୁଲ ଗାନ୍ଧି ମନେମନେ ସ୍ଥିର କରିସାରିଥିଲେ ଯେ, ସେ ବର୍ତିଗଲେ କୈଳାସ ମାନସରୋବର ଯାତ୍ରା କରିବେ ।
କଂଗ୍ରେସର ଅଭିଯୋଗ ଆଧାରରେ ଡିଜିସିଏ ଏକ ଦୁଇ ଜଣିଆ ତଦନ୍ତ କମିଟି ଗଠନ କରିଥିଲା । ଆଉ ଅନୁଧ୍ୟାନ ପରେ ଜଣାପଡିଛି
ଡିଜିସିଏ ରିପୋର୍ଟ
– ଘଟଣାଦିନ ରାହୁଲଙ୍କ ଚାର୍ଟାଡ ପ୍ଲେନ ଦୁର୍ଘଟଣାରୁ ଅଳ୍ପକେ ବର୍ତ୍ତିଗଲା
– ବିମାନରେ ତ୍ରୁଟିକୁ ସୁଧାରିବାରେ ବିଳମ୍ବ କରିଥିଲେ ବିମାନ କର୍ମଚାରୀ
– ଆଉ ୨୦ ସେକେଣ୍ଡ ଭିତରେ ତ୍ରୁଟି ସୁଧାରି ନଥିଲେ ଦୁର୍ଘଟଣା ହୋଇଥାନ୍ତା
– ଏହି ଦୁର୍ଘଟଣା ସମୟରେ ବିମାନଟି ଅଟୋ ପାଇଲଟ୍ ମୋଡରେ ଥିଲା
– ଏପରିସ୍ଥଳେ ପାଇଲଟ ତୁରନ୍ତ ମାନୁଆଲ ଉପାୟରେ ନିୟନ୍ତ୍ରଣକୁ ନେବାକଥା
– ହେଲେ ସେଦିନ କର୍ମଚାରୀଙ୍କୁ ବିମାନ ନିୟନ୍ତ୍ରଣ କରିବାରେ ବିଳମ୍ବ ହୋଇଥିଲା
ମାତ୍ର ୨୦ ସେକେଣ୍ଡରେ ମୃତ୍ୟୁକୁ ମାତ ଦେଇଥିବା କଂଗ୍ରେସ ଅଧ୍ୟକ୍ଷ ରାହୁଲ ଗାନ୍ଧି, ମାନସିକ ରଖି ମାନସରୋବର ଯାତ୍ରାରେ ବାହାରି ସାରିଛନ୍ତି । ହେଲେ ଡିଜିସିଏର ରିପୋର୍ଟ ଏପର୍ଯ୍ୟନ୍ତ ସାର୍ବଜନୀନ କରାଯାଇ ନାହିଁ । ଜାଣିଶୁଣି ବିମାନରେ ଥିବା ତ୍ରୁଟିକୁ ଅଣଦେଖା କରାଯାଇଥିଲା କି? ଡିଜିସିଏ ରିପୋର୍ଟରେ ଏ ବାବଦରେ କ’ଣ ଉଲ୍ଲେଖ ଅଛି? ତାହା ଜଣାଇବାକୁ କଂଗ୍ରେସ ଦାବି କରିଛି ।