କଂଗ୍ରେସ ଅଧ୍ୟକ୍ଷ ହେବା ପରେ ପ୍ରଥମ ଥର ଓଡ଼ିଶା ଆସୁଛନ୍ତି ରାହୁଲ ! ଗସ୍ତକୁ ନେଇ କଂଗ୍ରେସ ଶିବିର ଉତ୍ସାହିତ, ୨ ଲକ୍ଷ କର୍ମୀଙ୍କୁ ଏକାଠି କରିବାକୁ ଲକ୍ଷ୍ୟ ।
କନକ ବ୍ୟୁରୋ : ଆସନ୍ତା ୨୫ ତାରିଖରେ ଓଡ଼ିଶା ଆସୁଛନ୍ତି କଂଗ୍ରେସ ଅଧ୍ୟକ୍ଷ । ରାହୁଲ ଗାନ୍ଧୀଙ୍କ ଏହି ଗସ୍ତର ଫୋକସରେ ରହିଛି ଉପକୂଳ ଓଡ଼ିଶା । କଟକରେ ଅନୁଷ୍ଠିତ ହେବାକୁ ଥିବା ଦଳୀୟ ସମାବେଶରେ ପ୍ରାୟ ୨ ଲକ୍ଷ ଲୋକଙ୍କୁ ଏକତ୍ରିତ କରିବାର ଯୋଜନା ରଖିଛି କଂଗ୍ରେସ । ଆଉ ରାହୁଲ ଗାନ୍ଧୀଙ୍କ ଏହି ଗସ୍ତକୁ ନେଇ ଚଳଚଂଳଚ ହୋଇ ଉଠିଛି କଂଗ୍ରେସ ଶିବିର । ତେବେ ଓଡ଼ିଶା ନେତା ଓ କର୍ମୀଙ୍କୁ କି ମନ୍ତ୍ର ଦେବେ ରାହୁଲ ତାକୁ ନେଇ ଏବେ ଚର୍ଚ୍ଚା ।
Kanak News is now on WhatsApp
Join and get latest news updates delivered to you via WhatsApp
ବିଜେପି ଶାସିତ ୩ଟି ରାଜ୍ୟରେ ବିଜୟ ଅଭିଜ୍ଞତା ଏବଂ ଓଡ଼ିଶା ପାଇଁ ସ୍ୱତନ୍ତ୍ର ରଣନୀତି ନେଇ ଆସନ୍ତା ୨୫ ତାରିଖରେ ଓଡ଼ିଶା ଆସୁଛନ୍ତି କଂଗ୍ରେସ ଅଧ୍ୟକ୍ଷ । ଅଧ୍ୟକ୍ଷ ଦାୟିତ୍ୱ ନେବା ପରେ ଏହା ହେଉଛି ରାହୁଲ ଗାନ୍ଧୀଙ୍କ ପ୍ରଥମ ଓଡ଼ିଶା ଗସ୍ତ । ତେଣୁ ସ୍ୱାଭାବିକ୍ ଭାବରେ ଚଳଚଚଂଳ କଂଗ୍ରେସ ଶିବିର । ଆଗକୁ ସାଧାରଣ ନିର୍ବାଚନ ଆସୁଥିବାରୁ, କୁହାଯାଉଛି ଓଡ଼ିଶାରେ ନିର୍ବାଚନୀ ବିଗୁଲ ଫୁଙ୍କିବେ କଂଗ୍ରେସ ଅଧ୍ୟକ୍ଷ । ଆଉ ଏଥିପାଇଁ ହେଉଛି ବିଶାଳ ଆୟୋଜନ ।
ଓଡ଼ିଶାରେ କ’ଣ ରହିବ ରାହୁଲଙ୍କ ସନ୍ଦେଶ ? କ’ଣ ରହିବ କଂଗ୍ରେସ ଅଧ୍ୟକ୍ଷଙ୍କ ଆଭିମୁଖ୍ୟ ? ଏଭଳି କିଛି ପ୍ରଶ୍ନର ଉତ୍ତରକୁ ଚାହିଁ ରହିଛନ୍ତି ସମସ୍ତେ । କାରଣ ରାଜ୍ୟ ସ୍ତରୀୟ ନେତା କରୁଥିବା ଦାବି ଉପରେ ଲାଗିବ କି ହାଇକମାଣ୍ଡଙ୍କ ମୋହର । ଆଉ ଏହାରି ଭିତରେ ଚାଷୀ ସମସ୍ୟା, ବେକାରୀ ସମସ୍ୟାକୁ ନେଇ ରାଜ୍ୟ ସରକାର ଛନ୍ଦି ହୋଇଥିବା ବେଳେ କେନ୍ଦ୍ରର ବିଜେପି ସରକାର ରାଫେଲ ଡିଲ୍ ଏବଂ ମୋଦିଙ୍କ ନୀତିକୁ ନେଇ ଅଡୁଆରେ ରହିଛି । ଏହି ସବୁ ଗୁରୁତ୍ୱପୂର୍ଣ୍ଣ ପ୍ରସଙ୍ଗକୁ ଛୁଇଁବେ କି ରାହୁଲ ଗାନ୍ଧୀ ?
ରାହୁଲଙ୍କ ଏହି ସମାବେଶରେ ଉପକୂଳର ୧୧ଟି ଜିଲ୍ଲାକୁ ଫୋକସ୍ କରି ୨ ଲକ୍ଷ ଲୋକଙ୍କ ସମାଗମ କରିବାକୁ ଦଳ ଯୋଜନା କରିଛି । ସବୁ ନିର୍ବାଚନ ମଣ୍ଡଳୀରୁ ଲୋକ କେମିତି ସମାବେଶକୁ ଆସିବେ ସେ ନେଇ କାର୍ଯ୍ୟକରିବାକୁ କଂଗ୍ରେସ ନେତାଙ୍କୁ ଦିଆଯାଇଛି ଟାର୍ଗେଟ । ଏଥିପାଇଁ କଂଗ୍ରେସ ପକ୍ଷରୁ ବୈଠକ କରାଯାଇ ସଂପୃକ୍ତ ଜିଲ୍ଲା ସଭାପତି ଏଂବ ବିଭିନ୍ନ ନିର୍ବାଚନ ମଣ୍ଡଳୀର ବରିଷ୍ଠ ନେତାଙ୍କୁ ଦାୟିତ୍ୱ ଦିଆଯାଇଛି । ଦେଶରେ ବଦଳୁଥିବା ରାଜନୈତିକ ଦୃଶ୍ୟପଟ୍ଟ ଭିତରେ ରାହୁଲ ଗାନ୍ଧୀ ଏବେ ଏକ ନୂଆ ସଂଭବନା ହୋଇ ଛିଡ଼ା ହୋଇଥିବା ରାଜନୈତିକ ମହଲରେ ଚର୍ଚ୍ଚା ହେଉଛି । ତେଣୁ ରାହୁଲଙ୍କ ଓଡ଼ିଶା ଗସ୍ତ ରାଜ୍ୟ କଂଗ୍ରେସ ପାଇଁ ଯେତିକି ଗୁରୁତ୍ୱ ରଖୁଛି, ଦେଶର ରାଜନୈତିକ ପରିବର୍ତନ ଦିଗରେ ମଧ୍ୟ ସେତିକି ବଡ ବାର୍ତା ରଖୁଛି ।