ପ୍ରଧାନମନ୍ତ୍ରୀ ପଦ ପାଇଁ ପ୍ରସ୍ତୁତ ଥିବା ନେଇ ରାହୁଲ ଗାନ୍ଧିଙ୍କ ଇଙ୍ଗିତ ! କହିଲେ ପରିବାରବାଦ ରାଜନୀତି ଦେଶ ପାଇଁ ଏକ ବଡ ସମସ୍ୟା
କନକ ବ୍ୟୁରୋ : ଯୁବରାଜ ଏବେ ପ୍ରଧାନମନ୍ତ୍ରୀ ପଦ ପାଇଁ ମନ ବଳେଇଲେଣି । ୨୦୧୯ ସାଧାରଣ ନିର୍ବାଚନରେ କଂଗ୍ରେସ ଦଳରୁ ପ୍ରଧାନମନ୍ତ୍ରୀ ପଦ ପାଇଁ ଆଗ୍ରହୀ ଥିବା ନେଇ ଇଙ୍ଗିତ ଦେଇଛନ୍ତି କଂଗ୍ରେସ ଯୁବରାଜ ରାହୁଲ ଗାନ୍ଧି । ଆମେରିକାର କାଲିଫର୍ଣ୍ଣିଆ ବିଶ୍ୱବିଦ୍ୟାଳୟରେ ଏକ ଆଲୋଚନାଚକ୍ରରେ ଭାଗ ନେଇ ଛାତ୍ରଛାତ୍ରୀଙ୍କୁ ସମ୍ବୋଧନ କରିବା ବେଳେ ଏଭଳି ଇଚ୍ଛାବ୍ୟକ୍ତ କରିଛନ୍ତି ରାହୁଲ । କଂଗ୍ରେସ ଦଳ ତରଫରୁ ଯଦି ତାଙ୍କୁ ପ୍ରଧାନମନ୍ତ୍ରୀ ହେବାକୁ ପ୍ରସ୍ତାବ ଦିଆଯାଏ ତେବେ ସେଥିପାଇଁ ସେ ପ୍ରସ୍ତୁତ ଅଛନ୍ତି ବୋଲି କହିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଏକ ପ୍ରଶ୍ନର ଉତ୍ତର ଦେବାକୁ ଯାଇ ରାହୁଲ କହିଥିଲେ ଯେ, କଂଗ୍ରେସ ତରଫରୁ ପ୍ରଧାନମନ୍ତ୍ରୀ ପଦ ପାଇଁ ମୁଁ ସମ୍ପୂର୍ଣ୍ଣ ଭାବେ ପ୍ରସ୍ତୁତ । ତେବେ ଦଳ ଭିତରେ ଏନେଇ ଚୂଡାନ୍ତ ନିଷ୍ପତି ନିଆଯିବ । କଂଗ୍ରେସର ରାଜନୀତି ଇତିହାସରେ ୨୦୧୪ ନିର୍ବାଚନ ଏକ କଳା ଫର୍ଦ୍ଦ । ଇତିହାସ ଫର୍ଦ୍ଦ ଲେଉଟାଇଲେ ଜଣାଯାଏ ଯେ, ୨୦୧୪ ନିର୍ବାଚନରେ କଂଗ୍ରେସ ସଂସଦରେ ସବୁଠାରୁ କମ ଆସନ ହାସଲ କରିଥିଲା । ଏହାକୁ ମଧ୍ୟ ସ୍ୱୀକାର କରିଛନ୍ତି ରାହୁଲ । ତାଙ୍କ କହିବା ଅନୁଯାୟୀ, କଂଗ୍ରେସରେ ସେତେବେେଳେ କିଛି ଦଳ ବିରୋଧୀ ତଥା ଅହଂକାରୀ ନେତା ଥିଲେ ତେଣୁ କଂଗ୍ରେସର ଏପରି ସ୍ଥିତି ଉପୁଜିଲା । ତେବେ ୨୦୧୨ ମସିହାରୁ କଂଗ୍ରେସ ଲୋକଙ୍କ ସହ ଭାବ ବିନିମୟ କରିବା ଏକରକମ ଛାଡି ଦେଇଥିଲା ଯାହାର ପରିଣାମ ୨୦୧୪ ନିର୍ବାଚନରେ ଦେଖିବାକୁ ମିଳିଲା ।
ତେବେ ଏହି ଆଲୋଚନାଚକ୍ରରେ ରାଜନୀତିରୁ ପରିବାରବାଦର ବିଲୋପ ପାଇଁ ଜୋର ଦେଇଥିଲେ । ପରିବାରବାଦ ରାଜନୀତି ଭାରତର ରାଜନୀତି ତଥା ଦଳ ପାଇଁ ଏକ ପ୍ରମୁଖ ସମସ୍ୟା ପାଲଟିଛି ବୋଲି ରାହୁଲ କହିଥିଲେ । ତେବେ ଏସବୁ ଭିତରେ ସେ ନିଜ ଆଡକୁ ତୀର ମାରୁଥିବା କଥା ହୁଏତ ଜାଣି ପାରିନଥିଲେ । ଉଭୟ ରାଜନୀତି ଓ ବ୍ୟବସାୟ କ୍ଷେତ୍ରରେ ପରିବାରବାଦ ଝଲକ ଦେଖିବାକୁ ମିଳୁଛି । ଏପରିକି ଅଖିଳେଶ ଯାଦବ, ଅନୁରାଗ ଠାକୁର, ଅଭିଷେକ ବଚ୍ଚନ ଓ ମୁକେଶ ଅମ୍ବାନୀଙ୍କ ପରିବାରବାଦର ଉଦାହରଣ ଦେଇଥିଲେ ରାହୁଲ । କିନ୍ତୁ ପୂରା ଦେଶର ନଜର ତାଙ୍କ ପରିବାର ଉପରେ କାହିଁକି ରହୁଛି ସେ ନେଇ ଆଶ୍ଚର୍ଯ୍ୟ ହୋଇଯାଇଥିଲେ କଂଗ୍ରେସ ଉପାଧ୍ୟକ୍ଷ ।
ଏହି ଆଲୋଚନାଚକ୍ରରେ ରାହୁଲ ପ୍ରଧାନମନ୍ତ୍ରୀ ମୋଦିଙ୍କ ଉପରେ ଜୋରଦାର ଆଟାକ କରିଥିଲେ । ସେ ମୋଦିଙ୍କୁ ଟାର୍ଗେଯ କରି କହିଥିଲେ ଯେ, ଏହି ସରକାରରେ ଭାରତରେ ଦିନକୁ ଦିନ ହିଂସା , କ୍ରୋଧ ଓ ଧୃବିକରଣ ଭଳି ରାଜନୀତି କାୟାବିସ୍ତାର କରୁଛିି । ଯାହାକି ଭାରତ ବର୍ଷ ପାଇଁ ସମ୍ପୂର୍ଣ୍ଣ ନୂଆ । ରାହୁଳ କହିଛନ୍ତି ଦେଶରେ ଗୋରକ୍ଷା ନାଁରେ ହିଂସା ସୃଷ୍ଟି କରାଯାଉଛି । ଏସବୁ ଭିତରେ ପତ୍ରକାର ଗୌରୀ ଲଙ୍କେଶଙ୍କ ହତ୍ୟା ମାମଲା ମଧ୍ୟ ଉଠାଇଥିଲେ । ସେ କହିଥିଲେ ଏବେ ଭାରତରେ ସାମ୍ବାଦିକଙ୍କ କଣ୍ଠରୋଧ କରାଯାଉଛି । ସତ୍ୟନିଷ୍ଠ ସାମ୍ବାଦିକଙ୍କୁ ହତ୍ୟା କରାଯାଉଛି । ଗୋମାଂସ ଖାଇବା ଅଭିଯୋଗରେ ମୁସଲମାନଙ୍କୁ ହତ୍ୟା କରାଯାଉଛି, ଦଳିତମାନଙ୍କୁ ନିର୍ଯାତନା ଦିଆଯାଉଛି । ତେବେ ଏହା ଗଣତନ୍ତ୍ର ପାଇଁ ଶୁଭଙ୍କର ନୁହେଁ ବୋଲି କହିଛନ୍ତିି ରାହୁଲ ।
ତେବେ ଏସବୁ ଭିତରେ ବିଜେପି ସରକାରକୁ ଟାର୍ଗେଟ କରିଛନ୍ତି ରାହୁଳ । ସେ କହିଛନ୍ତି, ଏହି ସରକାର ସମୟରେ ଯୁବକ ମାନେ ବେକାର ବୁଲୁଛନ୍ତି । ନିଜ ଦେଶରେ ମଧ୍ୟ କୌଣସି ଭବିଷ୍ୟତ ନଥିବା କହିଛନ୍ତି ଲକ୍ଷାଧିକ ଲୋକ । ଏପରିକି ଧର୍ମ ନାଁରେ ରାଜନୀତି କରିବା ସହ ଲୋକଙ୍କ ମଧ୍ୟରେ ଦଙ୍ଗା ସୃଷ୍ଟି କରୁଛି ଏହି ସରକାର । ମୋଦିଙ୍କୁ ସିଧାସଳଖ ଟାର୍ଗେଟ କରି ରାହୁଳ କହିଛନ୍ତି ପ୍ରଧାନମନ୍ତ୍ରୀ କାହାକୁ ବିଶ୍ୱାସକୁ ନେଉନାହାଁନ୍ତି । ଏଭଳିକି ବିମୁଦ୍ରାକରଣ ପ୍ରସଙ୍ଗରେ ସଂସଦ ଓ କ୍ୟାବିନେଟଳୁ ମଧ୍ୟ ବିଶ୍ୱାସକୁ ନେଇ ନାହାଁନ୍ତି ମୋଦି । ବିମୁଦ୍ରାକରଣକୁ ନିନ୍ଦା କରିବା ସହ କହିଛନ୍ତି ଏଥିିପାଇଁ ଦେଶକୁ ବହୁମୂଲ୍ୟ ଦେବାକୁ ପଡିଛି । ଦେଶର ଜିଡିପରେ ୨ପ୍ରତିଶତ ହ୍ରାସ ପାଇଛି । ଯାହାର ସିଧାସଳଖ ପ୍ରଭାବ ଚାଷୀ ମାନଙ୍କ ଉପରେ ପଡିଛି ।
ଆଲୋଚନା ଛଳରେ ମୋଦିଙ୍କ ଉପରେ ଖୁବ୍ ବର୍ଷିଛନ୍ତି ରାହୁଲ ।ସେ କହିଛନ୍ତି ତାଙ୍କ ତୁଳନାରେ ମୋଦି ଜଣେ ଦକ୍ଷ ସଂଚାରକ । କିନ୍ତୁ ଭାରତର ବିଦେଶ ନିତିରେ ଏବେ ଅନେକ ପରିବର୍ତ୍ତନ ଦେଖିବାକୁ ମିଳୁଛି । କେବଳ ଆମେରିକାକୁ ଛାଡିଦେଲେ ଭାରତର ଏବେ କୌଣସି ରାଷ୍ଟ୍ର ସହ ସର୍ମ୍ପକ ଭଲ ନାହିଁ । ଏପରକି ଏହି ସରକାର ସମୟରେ ଭାରତର ଘନିଷ୍ଠ ସହଯୋଗୀ ଋଷ ମଧ୍ୟ ଭାରତର ହାତ ଛାଡୁଥିବା କଥା ଅନେକ ସମୟରେ ସାମ୍ନାକୁ ଆସୁଛି । କେବଳ ଏତିକି ନୁହେଁ ଋଷ ଏବେ ପାକିସ୍ତାନକୁ ଯୁଦ୍ଧ ସାମଗ୍ରୀ ବିକିବା ଆରମ୍ଭ କରିଛି । ଯାହା ଭାରତର କୂଟନୈତିକ ବିଫଳତାକୁ ସୂଚାଉଛି ।
ରାହୁଲ କହିଛନ୍ତି ପ୍ରଧାନମନ୍ତ୍ରୀ ମୋଦି ଏବେ ତାଙ୍କ ପଛରେ ସମ୍ପୂର୍ଣ୍ଣ ଭାବେ ପଡି ଯାଇଛନ୍ତି । ତେଣୁ ଲୋକଙ୍କ ମନରୁ ରାହୁଲଙ୍କ ପ୍ରତି ଥିବା ଭଲପାଇବା ଓ ବିଶ୍ୱାସକୁ ନଷ୍ଟ କରିବା ପାଇଁ ଅନଲାଇନର ସାହାର୍ଯ୍ୟ ନେଉଛନ୍ତି ମୋଦି । ବିଭିନ୍ନ ସୋସିଆଲ ମିଡିଆ ସାଇଟରେ ତାଙ୍କୁ ବଦନାମ କରିବାକୁ ଯୋଜନା କରୁଛନ୍ତି ମୋଦି । ଏଥିପାଇଁ ଏକ ହଜାରରୁ ଅଧିକ ବ୍ୟକ୍ତିଙ୍କୁ କାମରେ ଲଗାଯାଇଛି ବୋଲି କହିଛନ୍ତି ରାହୁଲ ।
ତେବେ ଏସବୁ ଭିତରେ ପ୍ରଧାନମନ୍ତ୍ରୀ ପଦ ପାଇଁ ରାହୁଲ ଇଚ୍ଛାବ୍ୟକ୍ତ କରିବା ଟିକିଏ ଅଡୁଆ ଲାଗୁଛି । ୨୦୧୪ ନିର୍ବାଚନ ପ୍ରହାରରେ କଂଗ୍ରେସ ଏ ଯାଏଁ ସିଧାସଳଖ ଠିଆ ହୋଇନଥିବା ବେଳେ ରାହୁଲଙ୍କ ଏଭଳି ବୟାନ ସମସ୍ତଙ୍କୁ ଆଶ୍ଚର୍ଯ୍ୟ କରୁଛି ।