ସରକାରଙ୍କୁ ସହଯୋଗ ନକରିବା ପାଇଁ ସେବାୟତଙ୍କ ମେଳି ! ଦ୍ୱିତୀୟ ରଥଯାତ୍ରା ସମନ୍ୱୟ କମିଟି ବୈଠକରେ ଅନୁପସ୍ଥିତ ରହିବାକୁ ଆହ୍ୱାନ
କନକ ବ୍ୟୁରୋ: ସରକାରଙ୍କୁ ସହଯୋଗ ନକରିବା ପାଇଁ ସେବାୟତଙ୍କ ମେଳି । ଆସନ୍ତାକାଲି ବସିବାକୁ ଥିବା ଦ୍ୱିତୀୟ ରଥଯାତ୍ରା ସମନ୍ୱୟ କମିଟି ବୈଠକରେ ଅନୁପସ୍ଥିତ ରହିବାକୁ ଆହ୍ୱାନ ଦେଇଛନ୍ତି ସେବାୟତ । ଶ୍ରୀମନ୍ଦିର ଦକ୍ଷିଣ ଦ୍ୱାର ଓ ମେଘନାଦ ପାଚେରୀରେ ଏନେଇ ପୋଷ୍ଟର ମାରିଛନ୍ତି ଶ୍ରୀମନ୍ଦିର ସେବାୟତ । ଶ୍ରୀଜଗନ୍ନାଥ ସେବାୟତ ସମ୍ମିଳନୀ ପକ୍ଷରୁ ଏହି ପୋଷ୍ଟର ଲଗାଯାଇଛି ।
Kanak News is now on WhatsApp
Join and get latest news updates delivered to you via WhatsApp
ଗତବର୍ଷ ନିଳାଦ୍ରୀବିଜେ ସମୟରେ ସେବାୟତ ପରିବାର ସଦସ୍ୟ, ରଥ ଉପରେ ଚଢିବାକୁ ଯେଉଁଭଳି ଭାବରେ ଚିିିତ୍ରଣ କରାଗଲା ତାହା ପ୍ରତିବାଦରେ ଏଭଳି ପୋଷ୍ଟର ମରାଯାଇଛି । ଜିଲ୍ଲା ପ୍ରଶାସନ ସେବାୟତ ସମାଜକୁ ସାରା ବିଶ୍ୱରେ ନିନ୍ଦିତ କରିଥିବା ଏହି ପୋଷ୍ଟରରେ ଲେଖାଯାଇଛି । ଏପରିକି ଗତ ୨୭ ତାରିଖରେ ଶ୍ରୀମନ୍ଦିର କୋଇଲି ବୈକୁଣ୍ଠରେ ଏଥିପାଇଁ ବୈଠକ ବସି ନିଷ୍ପତି ନିଆଯାଇଥିଲା । ସେବାୟତ ସମ୍ମିଳନୀ, କେତେକ ନିଯୋଗର କର୍ମକର୍ତା ଓ ପରିଚାଳନା କମିଟି ସଭ୍ୟଙ୍କ ଉପସ୍ଥିତିରେ ଏନେଇ ନୀତିଗତ ନିଷ୍ପତି ହୋଇଛି ।
ଏହାପରେ ପୋଷ୍ଟର ମାରି ସମସ୍ତ ସେବାୟତଙ୍କୁ ବୈଠକରୁ ଦୂରେଇ ରହିବା ପାଇଁ ଅନୁରୋଧ କରାଯାଇଛି । ପ୍ରଶାସନର ବାରଣ ସତ୍ୱେ ସେବାୟତମାନେ ପରିବାର ସଦସ୍ୟଙ୍କୁ ରଥ ଉପରେ ଚଢ଼ାଇବାକୁ ନେଇ ଗତବର୍ଷ ନିଳାଦ୍ରିବିଜେ ସମୟରେ ବିଶୃଙ୍ଖଳା ସୃଷ୍ଟି ହୋଇଥିଲା । ଏଥିପାଇଁ ୮ଜଣ ସେବାୟତଙ୍କୁ ଶ୍ରୀମନ୍ଦିର ପ୍ରଶାସନ ସେବାରୁ ନିଲମ୍ବିତ କରିଛି ।