ଓଏଏସ ପାଇଲେ ପାନ ଚାଷୀଙ୍କ ପୁଅ: ବିନା କୌଣସି କୋଚିଂରେ କେବଳ ଇଂଟରନେଟ ଦେଖି ଦଶମ ସ୍ଥାନରେ କାକଟପୁରର ସେଖ୍ ସାଗିର
ପୁଅର ସଫଳତା ପରେ ପରିବାରରେ ଖୁସିର ମାହୋଲ
କନକ ବ୍ୟୁରୋ: ପାନ ଚାଷୀଙ୍କ ପୁଅ ଓଏଏସରେ ଦଶମ ସ୍ଥାନ ଅଧିକାର କରିଛନ୍ତି । ପୁରୀ ଜିଲ୍ଲା କାକଟପୁର ନିକଟସ୍ଥ କଟକଣା ଗାଁର ସେଖ୍ ସାଗିର ଓଡ଼ିଶା ପ୍ରଶାସନିକ ସେବାରେ ୧୦ସ୍ଥାନ ଦଖଲ କରିଛନ୍ତି । ସାଗରଙ୍କ ବାପା ସେଖ୍ ଜହୁର ଜଣେ ପାନ ବରଜ ଚାଷୀ । ପାନ ଚାଷ କରି ସେ ପରିବାର ଚଳାଉଥିବା ବେଳେ ପୁଅର ଏହି ସଫଳତାରେ ଏବେ ପରିବାରରେ ଖୁସି ଖେଳିଯାଇଛି ।
Kanak News is now on WhatsApp
Join and get latest news updates delivered to you via WhatsApp
ତେବେ ସେ ପ୍ରଶାସନିକ ସେବା ପରୀକ୍ଷା ପାଇଁ କୌଣସି ପ୍ରକାରର କୋଚିଂ ନେଇନଥିଲେ ଘରେ ରହି ପାଠପଢା କରିବା ବେଳେ ଇଂଟରନେଟର ସହାୟତା ନେଉଥିଲେ । ଏବେ ଓଏଏସରେ ସେ ୧୦ସ୍ଥାନ ରଖିଥିବା ବେଳେ ଭାରତୀୟ ପ୍ରଶାସିନକ ସେବା ବା ଆଇଏଏସରେ ଉତିର୍ଣ୍ଣ ହେବା ପାଇଁ ଲକ୍ଷ୍ୟ ରଖିଥିବା କହିଛନ୍ତି ସେଖ୍ ସାଗିର ।
ସୂଚନାଯୋଗ୍ୟ, ଓଡ଼ିଶା ଲୋକସେବା ଆୟୋଗର ଓପିଏସି ଦ୍ୱାରା ପରିଚାଳିତ ଓଡ଼ିଶା ପ୍ରଶାସନିକ ସେବା ଓଏଏସ୍ ପରୀକ୍ଷାଫଳ ପ୍ରକାଶ ପାଇଛି । ଲିଖିତ ଓ ମୌଖିକ ପରୀକ୍ଷା ଆଧାରରେ ମୋଟ୍ ୧୦୬ ଜଣ ଯୋଗ୍ୟ ବିବେଚିତ ହୋଇଛନ୍ତି । କ୍ୟାଟେଗୋରି ୧ ଓ ୨ ସେବା ପାଇଁ ଏମାନେ ଯୋଗ୍ୟ ବିବେଚିତ ହୋଇଛନ୍ତି । ଆୟୂଷୀ ମହାପାତ୍ର ଟପ୍ପର ହୋଇଥିବା ବେଳେ ସଂଜିତା ମହାପାତ୍ର ଦ୍ୱିତୀୟ ସ୍ଥାନରେ ଓ ପୁନମ୍ ମହାପାତ୍ର ତୃତୀୟ ସ୍ଥାନରେ ଅଛନ୍ତି । ତେବେ ଓଡ଼ିଶା ପ୍ରଶାସନିକ ସେବାରେ ୧୦ସ୍ଥାନ ଦଖଲ କରିଛନ୍ତି ପୁରୀ ଜିଲ୍ଲା କାକଟପୁର ନିକଟସ୍ଥ କଟକଣା ଗାଁର ସେଖ୍ ସାଗିର ।