କନକ ବ୍ୟୁରୋ : ବଲାଙ୍ଗିର ପାର୍ସଲ ବୋମା ବିସ୍ଫୋରଣର ମୁଖ୍ୟ ଅଭିଯୁକ୍ତ ପୁଂଜିଲାଲ ମେହେରକୁ ପାଟଣାଗଡ ସବ ଜେଲରୁ ବଲାଙ୍ଗିର ଜିଲ୍ଲା କାରାଗାରକୁ ସ୍ଥାନାନ୍ତର ପାଇଁ ସ୍ଥାନୀୟ କୋର୍ଟ ନିର୍ଦ୍ଦେଶ ଦେଇଛନ୍ତି । ପାଟଣାଗଡ ଜେଲରୁ ପୁଂଜିଲାଲ, ୬ ଡକାୟତଙ୍କ ସହ ଖସିଯିବାକୁ ଉଦ୍ୟମ କରିଥିବା ନେଇ ଗତ ୨୪ ତାରିଖରେ କନକ ନ୍ୟୁଜରେ ରିପୋର୍ଟ ପ୍ରସାରଣ ହୋଇଥିଲା । ଏହା ପରେ ଜେଲ କର୍ତୃପକ୍ଷ ପୁଂଜିଲାଲକୁ ସ୍ଥାନାନ୍ତର କରିବା ପାଇଁ ପାଟଣାଗଡ ଏଡିଜେ କୋର୍ଟରେ ଆବେଦନ କରିଥିଲେ ।
Kanak News is now on WhatsApp
Join and get latest news updates delivered to you via WhatsApp
ଗତ ଜାନୁଆରୀ ୨୪ ତାରିଖ ଦିନ ସକାଳ ପ୍ରାୟ ୮ଟା ସମୟରେ ହଠାତ୍ ପାଟଣାଗଡ଼ ଉପକାରାଗାର ଗେଟ୍ ନିକଟରେ ହଇଚଇ ସୃଷ୍ଟି ହୋଇଗଲା । କାରଣ ୬ ଜଣ ଦୁର୍ଦ୍ଦାନ୍ତ ଡକାୟତ ଜେଲ ସୁରକ୍ଷା ବଳୟ ଭେଦ କରି ପହଁଚି ଯାଇଥିଲେ ଜେଲର ଶେଷ ଗେଟ୍ ନିକଟରେ । ଆଉ ଏହି ୬ ଜଣ ଡକାୟତଙ୍କ ସହ ଥିଲେ ପୁଂଜିଲାଲ୍ । ପାଟଣାଗଡ଼ ଥାନାରେ ମାମଲା ଥିବାରୁ ତିନି ଦିନ ତଳେ ଏହି ଡକାୟତ ଦଳ ବିଚାରାଧୀନ କଏଦୀ ଭାବେ ବଲାଙ୍ଗୀରରୁ ଆସିଥିଲେ ପାଟଣାଗଡ଼ ଜେଲ । ମାତ୍ର ତିନି ଦିନ ଭିତରେ ଏହି ଦୁର୍ଦ୍ଦାନ୍ତ ଅପରାଧୀଙ୍କୁ ମତାଇବାରେ ସକ୍ଷମ ହୋଇଥିଲା ପୁଂଜିଲାଲ୍ ।
ଏହି ଘଟଣା ପରେ ପୁଂଜିଲାଲକୁ ସ୍ଥାନାନ୍ତର କରିବା ପାଇଁ ଜେଲ କର୍ତୃପକ୍ଷ ଉଦ୍ୟମ ଆରମ୍ଭ କରି ଦେଇଥିଲେ । କାରଣ ସେମାନଙ୍କ ସନ୍ଦେହ ହେଉଥିଲା, ପୁଂଜିଲାଲ କେତେବେଳେ ଜେଲର ସୁରକ୍ଷା ବଳୟ ଭେଦ କରି ଫେରାର ହୋଇଯିବ । ପାଟଣାଗଡ ଉପ କାରାଗାର କର୍ତୃପକ୍ଷଙ୍କ ଆବେଦନକୁ ବିଚାରକୁ ନେଇଥିଲେ ସ୍ଥାନୀୟ କୋର୍ଟ । ଶୁଣାଣି ବେଳେ ବିଚାରପତି ହୃଦବୋଧ ମଧ୍ୟ କଲେ ଯେ ସେଠାରେ ପୁଂଜିଲାଲକୁ ରଖିବା ବିପଦପୂର୍ଣ୍ଣ ପ୍ରମାଣିତ ହୋଇପାରେ । ଶେଷରେ ଜେଲରୁ ସ୍ଥାନାନ୍ତର ପାଇଁ ନିଷ୍ପତି ନେଲେ କୋର୍ଟ । ଆନୁସଙ୍ଗିକ କାଗଜପତ୍ର ଓ ଡାକ୍ତରୀମାଇନା ପରେ ଖୁବ୍ ଶୀଘ୍ର ପୁଂଜିଲାଲକୁ ବଲାଙ୍ଗିର କାରାଗାରକୁ ସ୍ଥାନାନ୍ତର କରାଯିବ । ସେ ଜିଲ୍ଲା କାରାଗାରରେ ରହିଲେ ମଧ୍ୟ ତାଙ୍କ ବିରୋଧରେ ଥିବା ପାର୍ସଲ ବୋମା ବିସ୍ଫୋରଣ ମାମଲା ପାଟଣାଗଡରେ ହିଁ ଚାଲିବ, ଏବଂ କୋର୍ଟ ତାରିଖ ଅନୁସାରେ ପୁଂଜିଲାଲ ପାଟଣାଗଡ କୋର୍ଟରେ ହାଜର ହେବ ବୋଲି ଜଣାପଡିଛି ।