ପୁଲୱାମା ଠାରେ ହୋଇଥିବା ଆତଙ୍କବାଦୀ ଆକ୍ରମଣରେ ୪୦ ଜଣ ଯବାନଙ୍କ ସହିଦ ଘଟଣା ସାରା ଦେଶକୁ ସ୍ତବ୍ଧ କରିଦେଇଛି । ଆଉ ସମଗ୍ର ଭାରତରେ ଖେଳିଯାଇଛି ଶୋକାକୂଳ ପରିବେଶ । ଏହି ଆତ୍ମଘାତୀ ଆକ୍ରମଣ ପାଇଁ ନିଜକୁ ଦାୟୀ କରିଛି ଜୈସ-ଇ-ମହମ୍ମଦ । ଆତଙ୍କବାଦୀ ଆଦିଲ ଅହମ୍ମଦ ବିସ୍ଫୋଟକ ଭର୍ତ୍ତି ଗାଡି ଯବାନଙ୍କ ବସ ସହ ଧକ୍କା କରି ବିସ୍ଫୋରଣ କରିଥିଲା । ଆଦିଲ ପୁଲୱାମା ଗୁଣ୍ଡିବାଗ ଅଞ୍ଚଳର ହୋଇଥିବା ବେଳେ ଦୀର୍ଘ ଦିନ ଧରି ଜୈସ-ଇ-ମହମ୍ମଦ ପାଇଁ କାମ କରୁଥିଲା । ଏଭଳି ଆକ୍ରମଣ ପାଇଁ ଆଦିଲକୁ ଆଫଗାନ ମୁଜାହିଦ ଜୈସର ଆତଙ୍କବାଦୀ ଗାଜି ରଶିଦ ଟ୍ରେନିଂ ଦେଇଥିଲା । ତେବେ ଆତଙ୍କୀ ଆକ୍ରମଣରେ ସହିଦ ଯବାନଙ୍କ ମଧ୍ୟରେ ଅଧିକାଂଶ ମୃତଦେହ ଏତେ କ୍ଷତବିକ୍ଷତ ହୋଇପଡିଥିଲା କି ସାଥି ଯବାନ ଆଧାର କାର୍ଡ, ଛୁଟିର ଆବେଦନ ପତ୍ର ଏବଂ ସେନାର ପରିଚୟ ପତ୍ରରୁ ହିଁ ସହିଦ ଯବାନଙ୍କର ଚିହ୍ନଟ କରିଥିଲେ ।
Kanak News is now on WhatsApp
Join and get latest news updates delivered to you via WhatsApp
ଅଧିକାରୀଙ୍କ ସୂଚନା ମୁତାବକ, ବିସ୍ଫୋରଣରେ ମୃତଦେହ ଗୁଡିକର ଅବସ୍ଥା ଏଭଳି ହୋଇଯାଇଥିଲା କି ସେମାନଙ୍କର ପରିଚୟ ମିଳିବା ବହୁତ କଷ୍ଟକର ହୋଇପଡିଥିଲା । ସେମାନଙ୍କ ପକେଟରୁ ମିଳିଥିବା କାଗଜପତ୍ର ଏବଂ ଅନ୍ୟାନ୍ୟ ଜିନିଷରୁ ହିଁ ଚିହ୍ନଟ କରିବା ସମ୍ଭବ ହୋଇଥିଲା । କିଛି ସହିଦଙ୍କର ସାଥିମାନେ ହାତ ଘଂଟା ଏବଂ ୱାଲେଟରୁ ତାଙ୍କର ଚିହ୍ନଟ କରିଥିଲେ ।
ଏଠାରେ ଆମେ କହି ରଖୁଛୁ କି, ଜାମ୍ମୁ କଶ୍ମୀରର ପୁଲୱାମାରେ ହୋଇଥିବା ଆତଙ୍କବାଦୀ ହମଲାର ତଦନ୍ତ ଆରମ୍ଭ କରିଛି ଏନଆଇଏ ଟିମ୍ । ସିଆରପିଏଫ ଯବାନଙ୍କ ଉପରେ ହୋଇଥିବା ଆତ୍ମଘାତୀ ହମଲା ହୋଇଥିବା ଅବନ୍ତୀପୋରାରରେ ପହଂଚି ଜାତୀୟ ତଦନ୍ତକାରୀ ସଂସ୍ଥା ଯାଂଚ ଆରମ୍ଭ କରିଛି । ଫରେନସିକ ଟିମ ସହ ଘଟଣାସ୍ଥଳରୁ ପ୍ରମାଣ ଯୋଗାଡ କରୁଛି ଏନଆଇଏ । ଅନ୍ୟପଟେ ଏହି ହମଲାରେ ସଂପୃକ୍ତି ସନ୍ଦେହରେ ଜାମ୍ମୁକଶ୍ମୀର ପୁଲିସ ୭ ଜଣଙ୍କୁ ଥାନାକୁ ଉଠାଇ ଆଣି ପଚରା ଉଚରା କରୁଛି । ଅବନ୍ତୀପୋରା ଓ ପୁଲବାମାରୁ ୭ ଜଣ ସନ୍ଦିଗ୍ଧଙ୍କୁ ଥାନାରେ ଅଟକ ରଖି ଜେରା କରାଯାଉଛି ।
କୁଟନୈତିକ ସ୍ତରରେ ପାକିସ୍ତାନକୁ ଏକ ଘରକିଆ କରିବାକୁ ଉଦ୍ୟମ
ପାକିସ୍ତାନକୁ ପାନେ ଦେବା ପାଇଁ ଭାରତ ଆରମ୍ଭ କରିଛି କୁଟନୀତି । କୁଟନୈତିକ ସ୍ତରରେ ପାକିସ୍ତାନ ଉପରେ ଚାପ ପକାଇବା ପାଇଁ ଦୁନିଆର ବିଭିନ୍ନ ଦେଶ ସହ ଯୋଗାଯୋଗ ଆରମ୍ଭ କରିଛି ଭାରତ । ମିଳିଥିବା ଖବର ଅନୁସାରେ ବୈଦେଶିକ ସଚିବ ବିଜୟ ଗୋଖଲେ, ଦିଲ୍ଲୀରେ ଥିବା ୨୫ଟି ଦେଶର ହେଡ୍ ଅପ୍ ମିଶନଙ୍କୁ ସାକ୍ଷତ କରିଛନ୍ତି । ଜୈସ-ଇ-ମହମ୍ମଦ ଏବଂ ଆତଙ୍କବାଦୀଙ୍କ ଉପରେ ଅଙ୍କୁଶ ଲଗାଇବା ପାଇଁ ଏଭଳି ପଦକ୍ଷେପ ନିଆଯାଇଛି । ଜର୍ମାନୀ, ହଙ୍ଗେରୀ, ଇଟାଲି, ୟୁରୋପିଆନ୍ ସଂଘ, କାନାଡ଼ା, ବ୍ରିଟେନ୍, ରୁଷିଆ ଇଜ୍ରାଏଲ, ଅଷ୍ଟ୍ରେଲିଆ, ଦକ୍ଷିଣ କୋରିଆ, ସ୍ୱିଡେନ୍, ସ୍ଲୋଭାକିଆ, ଫ୍ରାନ୍ସ, ସ୍ପେନ୍ ଏବଂ ଭୁଟାନ୍ ପ୍ରମୁଖ ଦେଶର ହେଡ୍ ଅପ୍ ମିଶନଙ୍କୁ ସାକ୍ଷତ କରିଛନ୍ତି ବୈଦେଶିକ ସଚିବ । ଏହା ବ୍ୟତୀତ ପଡୋଶୀ ବାଂଲାଦେଶ, ଶ୍ରୀଲଙ୍କା, ଆଫଗାନିସ୍ଥାନ ଏବଂ ନେପାଳ ସହ ମଧ୍ୟ ଯୋଗାଯୋଗ କରାଯାଇଛି ।
ଆମେରିକାରେ ଜରୁରୀକାଳୀନ ପରିସ୍ଥିତି ଘୋଷଣା କଲେ ଡୋନାଲ୍ଡ ଟ୍ରମ୍ପ
ଆମେରିକାରେ ଏମାର୍ଜେନ୍ସି ଘୋଷଣା କଲେ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ । ମେକ୍ସିକୋ ସୀମାରେ ପ୍ରାଚୀର ନିର୍ମାଣକୁ ନେଇ ଅଚଳାବସ୍ଥା ଦୂର କରିବାକୁଯାଇ ଟ୍ରମ୍ପ ଏମାର୍ଜେନ୍ସି ଲାଗୁ କରିଥିବା କହିଛନ୍ତି । ପ୍ରାଚୀର ନିର୍ମାଣ ପାଇଁ ଫଣ୍ଡ ମଂଜୁରୀକୁ ଆମେରିକା ସଂସଦରେ ବିରୋଧ କରାଯାଉଥିଲା । ଏବେ ଏମାର୍ଜେନ୍ସୀ ଲାଗୁ ହୋଇଥିବାରୁ ପ୍ରାଚୀର ନିର୍ମାଣ ପାଇଁ ଆବଶ୍ୟକ ୫.୬ ଅରବ ଡଲାର ମଂଜୁର କରିପାରିବେ ଟ୍ରମ୍ପ ।
ଆମେରିକା ରାଷ୍ଟ୍ରପତିଙ୍କ ଅନୁସାରେ ଦେଶରେ ଅବୈଧ ଅନୁପ୍ରବେଶକାରୀ, ମାଦକ ଦ୍ରବ୍ୟ ଚୋରା ଚାଲାଣ ରୋକିବାକୁ ହେଲେ ମେକ୍ସିକୋ ସୀମାରେ ପ୍ରାଚୀର ନିର୍ମାଣ ନିହାତି ଆବଶ୍ୟକ । ହ୍ୱାଇଟ ହାଉସର ରୋଜ ଗାର୍ଡେନରେ ଟ୍ରମ୍ପ କହିଛନ୍ତି, ଦେଶରେ ଡ୍ରଗ୍ସ, ମାନବ ଚୋରା ଚାଲାଣ ଓ ସବୁ ପ୍ରକାର ଅପରାଧ ଉପରେ ଅଂକୁଶ ଲଗାଇବାକୁ ସରକାର ପ୍ରତିଶ୍ରୁତିବଦ୍ଧ । ଏହି ଜରୁରୀକାଳିନ ପରିସ୍ଥିତି ସମୟରେ ନାଗରିକଙ୍କ ସ୍ୱତନ୍ତ୍ରତା ଓ କିମ୍ବା କୌଣସି ପ୍ରକାର ସ୍ୱତନ୍ତ୍ରତା ଉପରେ ପ୍ରତିବନ୍ଧକ ଲାଗିବ ନାହିଁ ବୋଲି କହିଛନ୍ତି ଡୋନାଲ୍ଡ ଟ୍ରମ୍ପ ।