କଂଗ୍ରେସ ଅଫିସରେ ପ୍ରିୟଙ୍କା, ଇଡିରେ ସ୍ୱାମୀ ରବର୍ଟ ଭଦ୍ରା । ସାଙ୍ଗରେ ଆସିଲେ ପ୍ରିୟଙ୍କା ଗାନ୍ଧୀ, କହିଲେ – ପରିବାର ସହ ଛିଡା ହେବି
କନକ ବ୍ୟୁରୋ: କଂଗ୍ରେସ ଅଫିସରେ ପ୍ରିୟଙ୍କା, ପ୍ରବର୍ତନ ନିର୍ଦେଶାଳୟରେ ସ୍ୱାମୀ ରବର୍ଟ ଭଦ୍ରା । ପୂର୍ବ ଉତରପ୍ରଦେଶର ପ୍ରଭାରୀ ଦାୟିତ୍ୱ ମିଳିବା ପରେ ପ୍ରିୟଙ୍କା ଗାନ୍ଧି ଆଜି ପ୍ରଥମ ଥର ପାଇଁ କଂଗ୍ରେସ କାର୍ଯ୍ୟାଳୟକୁ ଯାଇଥିଲେ । ଆଉ ଠିକ ସେହି ସମୟରେ ଇଡି କାର୍ଯ୍ୟାଳୟରେ ଅଧିକାରୀଙ୍କ ପ୍ରଶ୍ନର ଉତର ଦେଉଥିଲେ ତାଙ୍କ ସ୍ୱାମୀ ରବର୍ଟ ଭଦ୍ରା । ତେବେ ଗୁରୁତ୍ୱପୂର୍ଣ୍ଣ କଥା ହେଉଛି, ସକ୍ରିୟ ରାଜନୀତିରେ ପାଦ ଦେଇଥିବା ପ୍ରିୟଙ୍କା, ଦଳୀୟ କାର୍ଯ୍ୟାଳୟକୁ ଯିବା ଆଗରୁ ସ୍ୱାମୀ ରବର୍ଟ ଭଦ୍ରାଙ୍କୁ ଇଡି ଅଫିସ ଯାଏଁ ଛାଡିବାକୁ ଯାଇଥିଲେ ।
Kanak News is now on WhatsApp
Join and get latest news updates delivered to you via WhatsApp
ମନି ଲଣ୍ଡରିଂ ମାମଲାରେ ଦିଲ୍ଲୀ ସ୍ଥିତ ପ୍ରବର୍ତନ ନିର୍ଦେଶାଳୟର ଅଫିସରେ ଯେତବେଳେ ରବର୍ଟ ଭଦ୍ରା ପହଂଚିଥିଲେ, ଦିଲ୍ଲୀ ଗଣମାଧ୍ୟମ ତାଙ୍କୁ ଘେରି ଯାଇଥିଲା । କାରଣ ଏହି ଘଟଣା ଏକ ସ୍ୱଭାବିକ ଘଟଣା ନଥିଲା । ନିର୍ବାଚନକୁ ଆଉ କେଇ ମାସ ଥିବା ବେଳେ ଆଉ ଏପଟେ ସକ୍ରିୟ ରାଜନୀତିରେ ପ୍ରିୟଙ୍କା ଗାନ୍ଧୀଙ୍କ ଏଂଟ୍ରି ପରେ ପରେ ତାଙ୍କ ସ୍ୱାମୀ ରବର୍ଟ ଭଦ୍ରାଙ୍କୁ ଜେରା ପାଇଁ ଡାକିଥିଲା ପ୍ରବର୍ତନ ନିର୍ଦେଶାଳୟ ।
ପ୍ରବର୍ତନ ନିର୍ଦ୍ଦେଶାଳୟର ଅଫିସକୁ ଆସିବା ସମୟରେ ରବର୍ଟ ଭଦ୍ରାଙ୍କ ସାଙ୍ଗରେ ଥିଲେ ପତ୍ନୀ ପ୍ରିୟଙ୍କା ଗାନ୍ଧୀ । ଏକ ଧଳା ଟୟୋଟା ଲ୍ୟାଣ୍ଡ କ୍ରୁଇଜରରେ ରବର୍ଟ ଭଦ୍ରା ପହଂଚିବା ପୂର୍ବରୁ ତାଙ୍କ ଓକିଲମାନେ ଇଡି ଅଫିସରେ ପହଂଚିଯାଇଥିଲେ । ପ୍ରିୟଙ୍କା ଗାନ୍ଧୀ ମଧ୍ୟ ରବର୍ଟ ଭଦ୍ରାଙ୍କ ସହ ଇଡି ଅଫିସ ଯାଏଁ ଆସିଥିଲେ । ଏହାପରେ ତାଙ୍କୁ ଛାଡିଦେଇ ସେଠାରୁ ଚାଲିଯାଇଥିଲେ ପ୍ରିୟଙ୍କା । ସାମ୍ବାଦିକମାନେ ପ୍ରିୟଙ୍କାଙ୍କୁ ଏନେଇ ପ୍ରଶ୍ନ କରିବାରୁ ପ୍ରିୟଙ୍କା କହିଥିଲେ ସେ ତାଙ୍କ ପରିବାର ସହ ଠିଆ ହୋଇଛନ୍ତି ଏବଂ ସାରା ଦେଶ ଏହା ଦେଖୁଛି ।
କଂଗ୍ରେସ ଅଧ୍ୟକ୍ଷ ରାହୁଲ ଗାନ୍ଧୀଙ୍କ ଭିଣୋଇ ରବର୍ଟ ଭଦ୍ରା ପ୍ରଥମ ଥର ପାଇଁ ପ୍ରବର୍ତନ ନିର୍ଦେଶାଳୟରେ ହାଜର ହୋଇଛନ୍ତି । ଲଣ୍ଡନରେ ଥିବା ଭଦ୍ରାଙ୍କ ସଂପତି ନେଇ ବିବାଦ ସୃଷ୍ଟି ହୋଇଥିଲା । ପଳାତକ ଡିଫେନ୍ସ ଡିଲର ସଂଜୟ ଭଣ୍ଡାରୀଙ୍କ ଠାରୁ ଏହି ସଂପତି କିଣିଥିଲେ ଭଦ୍ରା । ତାଙ୍କ ବିରୋଧରେ ଅଭିଯୋଗ ହେଉଛି ଯେ ଏକ ପ୍ରଭାବଶାଳୀ ପରିବାରର ଜ୍ୱାଇଁ ହୋଇଥିବାରୁ କମ ଦରରେ ତାଙ୍କୁ ଏହି ସଂପତି ବିକ୍ରି କରାଯାଇଛି । ପୂର୍ବରୁ ଦିଲ୍ଲୀର ପଟିଆଲା ହାଉସ କୋର୍ଟ ରବର୍ଟଙ୍କୁ ୧୬ ତାରିଖ ଯାଏଁ ଅନ୍ତରୀଣ ଜାମିନ ଦେଇ ତଦନ୍ତରେ ସହଯୋଗ କରିବାକୁ ନିର୍ଦେଶ ଦେଇଥିଲେ । ତେବେ କଂଗ୍ରେସ ମହାସଚିବ ଦୟିତ୍ୱ ନେବା ପରେ ପ୍ରିୟଙ୍କା ଆଜି ପ୍ରଥମ ଥର ପାଇଁ କଂଗ୍ରେସ କାର୍ଯ୍ୟାଳୟକୁ ଆସିଥିଲେ । ଆଉ ଏପଟେ ସ୍ୱାମୀ ରବର୍ଟ ଭଦ୍ରାଙ୍କୁ ଜେରା କରୁଥିଲା ଇଡି ।