ରାୟଗଡା : ରାଜ୍ୟରେ ମାତୃ ଓ ଶିଶୁ ମୃତ୍ୟୁହାର ରୋକିବାକୁ ସରକାରଙ୍କର କେତେକଣ ଯୋଜନା । ଏଥିପାଇଁ ପ୍ରତିବର୍ଷ କୋଟିକୋଟି ଟଙ୍କା ବ୍ୟୟ ବରାଦ ବି ହେଉଛି । ହେଲେ ଉପାନ୍ତ ଅଂଚଳଗୁଡିକରେ ସରକାରୀ ଯାଜନା କେତେଦୂର କାର୍ଯ୍ୟକାରୀ ହେଉଛି ସେନେଇ ପ୍ରଶ୍ନବାଚୀ ସୃଷ୍ଟି କରିଛି ଏହି ଘଟଣା ।
Kanak News is now on WhatsApp
Join and get latest news updates delivered to you via WhatsApp
ଗର୍ଭ ଯନ୍ତ୍ରଣାରେ ଛଟପଟ ଜଣେ ପ୍ରସୂତିଙ୍କୁ ନେବା ପାଇଁ ଆସିଲା ନାହିଁ ସରକାରଙ୍କ ୧୦୨ କିମ୍ବା ୧୦୮ ଆମ୍ବୁଲାନ୍ସ । ପରିସ୍ଥିତି ଅସମ୍ଭାଳ ହେବାରୁ ଶେଷରେ ପ୍ରସୂତିଙ୍କୁ ସାଇକେଲରେ ବୋହି ଆଣିଲେ ପରିବାର ଲୋକ । ଏଭଳି ଅଭାବନୀୟ ଘଟଣା ଘଟିଛି ରାୟଗଡା ଜିଲ୍ଲା ବରିଗୁଡା ଗାଁରେ । ହିକକା କୁଞ୍ଜୁଡି ଦୀର୍ଘ ୨ ଘଂଟା କାଳ ଯନ୍ତ୍ରଣାରେ ଛଟପଟ ହେବା ପରେ ସ୍ୱାମୀ, ଶାଶୁ ଓ ଦିଅର ମିଶି ଆଣ୍ଠୁଏ ଆଣ୍ଠୁଏ କାଦୁଅରେ ବୋହି ଆଣିଲେ ଗୁଣ୍ଡୁରିଗୁଡା ଗାଁ ପର୍ଯ୍ୟନ୍ତ । ହେଲେ ପ୍ରସବ ଯନ୍ତ୍ରଣା ଅସହ୍ୟ ହେବାରୁ ଶେଷରେ ଏକ ଟାଟା ମ୍ୟାଜିକ ଡକାଇ ମହିଳାଙ୍କୁ ଡାକ୍ତରଖାନା ନେଇଥିଲେ । ଏତେସବୁ ସମସ୍ୟା ଭିତରେ ମହିଳା ଜଣକ ହସ୍ପିଟାଲରେ ପହଂଚିଥିଲେ ସୁଦ୍ଧା କୌଣସି କର୍ମଚାରୀ ତାଙ୍କ ପାଖରେ ପହଂଚିନଥିଲେ । ଆଉ ପୁଣି ଅଧଘଂଟା କାଳ ମହିଳା ଜଣକ ସେମିତି ଯନ୍ତ୍ରଣା ଭୋଗିଥିଲେ । ପରେ କର୍ମଚାରୀ ଆସି ପ୍ରସବ ଗୃହ ଖୋଲି ତାଙ୍କୁ ଭର୍ତି କରାଯାଇଥିଲା । ଆଉ ଏକ ଶିଶୁପୁତ୍ରକୁ ଜନ୍ମ ଦେଇଥିଲେ କୁଞ୍ଜୁଡି । ଉଭୟ ମାଆ ଓ ଶିଶୁ ସୁସ୍ଥ ଥିବା ଜଣାପଡିଛି । ତେବେ ଜଣେ ପ୍ରସୂତି ମହିଳା ହସ୍ପିଟାଲରେ ପହଂଚିବା ପାଇଁ ଏତେ ସମସ୍ୟାର ସମ୍ମୁଖୀନ ହେବା ସରକାରଙ୍କ ସମସ୍ତ ଯୋଜନାର କାର୍ଯ୍ୟକାରୀତା ନେଇ ପ୍ରଶ୍ନଚିହ୍ନ ଲଗାଇଛି ।