କନକ ବ୍ୟୁରୋ : ସରକାର ଗାଁ କୁ ରାସ୍ତା ମା’କୁ ସମ୍ମାନର ଡିଣ୍ଡମ ପିଟୁଛନ୍ତି । ହେଲେ ରାଜ୍ୟର ଏମିତି ଅନେକ ସ୍ଥାନ ରହିଛି ଯେଉଁଠାରେ କି ଗମନା ଗମନ ପାଲଟିଛି ସାତ ସପନ । ରାସ୍ତାଘାଟ ନଥିବାରୁ କେଉଁଠି ନଦୀ ବାଲିରେ ପ୍ରସୂତୀ ପ୍ରସବ କରୁନ୍ତି ତ ଆଉ କେଉଁଠି ଖଟିଆରେ ମାଇଲ୍ ମାଲ୍ ଦୂର ଯାଉଛନ୍ତି ରୋଗୀ । ଏମିତି ଏକ ଭିଜୁଆଲ୍ କଏଦ ହୋଇଛି କନକ ନ୍ୟୁଜ୍ କ୍ୟାମେରାରେ । ଦେଖିବା ବୌଦ୍ଧ ଜିଲ୍ଲା କଂଟାମାଳ ଶଗଡା ପଂଚାୟତ ଖଣ୍ଡକମ୍ପା ଅଂଚଳର ଦୃଶ୍ୟ ।
Kanak News is now on WhatsApp
Join and get latest news updates delivered to you via WhatsApp
ରାତି ପାହିଲେ ଖଣ୍ଡିକମ୍ପା ଗାଁକୁ ଲାଗି ବୋହିଯାଇଥିବା କେରେଣ୍ଡି ନାଳ ଦେଇ ପ୍ରତି ଦିନ ଯାତାୟତ କରିଥାନ୍ତି ଗରିବ ଆଦିବାସୀ ବହୁଳ ୧୮ରୁ ଅଧିକ ଗାଁର ଲୋକ । ବର୍ଷା ଦିନ ଏ ସବୁ ଗାଁର ଲୋକ ଜଳବନ୍ଦୀ ଜୀବନ ବିତାଇଥାନ୍ତି । ଏମାନଙ୍କ ପାଇଁ ଗମନା ଗମନର ମାଧ୍ୟମ କହିଲେ ଏହି ନାଳ । ଯଦି ଏ ନାଳ ପାର ନହେବେ ତେବେ ପ୍ରାୟ ୧୫ କିଲୋମିଟର ପାଦରେ ଚାଲି ଚାଲି ଯିବା ପରେ ରାସ୍ତାଟିଏ ମଳିଥାଏ । ବଣ ପାହାଡ, ନଦୀ ନାଳ ଘେରା ଏହି ଅଂଚଳକୁ ନା ପହଂଚିପାରୁଛି ଆମ୍ବୁଲାନ୍ସ ନା ଅନ୍ୟ କୌଣସି ଗାଡି । ଫଳରେ ଖଟିଆରେ ବୁହା ହୁଅନ୍ତି ରୋଗୀ ଓ ପ୍ରସୂତୀ ।
ଏତ ଗଲା ରୋଗୀ ଓ ପ୍ରସୂତୀଙ୍କ ଅବସ୍ଥା । ଏଠାରେ ଛାତ୍ରଛାତ୍ରୀ ମଧ୍ୟ ବର୍ଷା ୪ ମାସ ବହୁ ଅସୁବିଧାର ସମ୍ମୁଖୀନ ହୋଇଥାନ୍ତି । ଅଂଟାଏ ଅଂଟାଏ ପାଣିରେ ପଶି ନାଳ ପାରି ହୋଇ ସ୍କୁଲ ଯାଉଛନ୍ତି ଛାତ୍ରଛାତ୍ରା । ଆଉ ବର୍ଷା ଯୋଗୁଁ ନାଳରେ ପାଣି ବଢିଲେ ଏମାନଙ୍କ ପାଠପଢା ପୁରା ଠପ୍ ହୋଇଯାଏ । କେରେଣ୍ଡି ନାଳରେ ସେତୁ ନିର୍ମାଣ ପାଇଁ ନେତାମନ୍ତ୍ରୀଙ୍କ ଠାରୁ ଆରଂଭ କରି ପ୍ରଶାସନକୁ ଗୁହାରି କଲେ ବି ଶୁଣୁନଥିବା ଅଭିଯୋଗ ହୋଇଛି । ସେପଟେ ଖଣ୍ଡିକମ୍ପାର ସମସ୍ୟାକୁ ନେଇ ଦଃଖ ପ୍ରକାଶ କରିଛନ୍ତି ସ୍ଥାନୀୟ ବିଧାୟକ । ତୁରନ୍ତ ଏଠାରେ ଏକ ସେତୁ ନିର୍ମାଣ କରିବା ସହିତ ରାସ୍ତାଘାଟ ନିର୍ମାଣ କରାଯିବ ବୋଲି ସେ ପ୍ରତିଶ୍ରୁତି ଦେଇଛନ୍ତି ।
ବହୁ ନେତା ମନ୍ତ୍ରୀଙ୍କୁ ଗୁହାରି କରି ନିରାସ ହୋଇଥିବା ଅଂଚଳ ବାସି ସରକାରଙ୍କୁ ଚେତାବନୀ ଦେଇଛନ୍ତି । ଆସନ୍ତା ନିର୍ବାଚନ ଆଗରୁ କେରେଣ୍ଡି ନାଳରେ ପୋଲ ନିର୍ମାଣ ନହେଲେ ଲୋକେ ୨୦୧୯ ନିର୍ବାଚନରୁ ବିରତ ରହିବେ ବୋଲି ଧମକ ଦେଇଛନ୍ତି ।