ପ୍ରସ୍ତୁତ ହେଉଛି ମୈଦାନ, ଆଗୁଆ ହେବ କି ଲଢେଇ ? ଉତ୍ତରପ୍ରଦେଶରୁ ଆସିବ ୧ ଲକ୍ଷ ଇଭିଏମ, ଆଗୁଆ ନିର୍ବାଚନ ନେଇ ମିଳିଲା ଆଭାସ ।
କନକ ବ୍ୟୁରୋ : ନଭେମ୍ବର ସୁଦ୍ଧା ସରିବ ନିର୍ବାଚନ ପ୍ରସ୍ତୁତି । ବିଶ୍ୱସ୍ତସୂତ୍ରରୁ ମିଳିଥିବା ସୂଚନା ଅନୁସାରେ ନଭେମ୍ବର ସୁଦ୍ଧା ନିର୍ବାଚନ ପ୍ରସ୍ତୁତି ସାରିବା ପାଇଁ ନିର୍ବାଚନ କମିଶନ ନିର୍ଦ୍ଦେଶ ଦେଇଛନ୍ତି । ଆଉ ଏହି କ୍ରମରେ ଜୋରଦାର ହୋଇଛି ପ୍ରସ୍ତୁତି । ଆଜି ୧୬୬ ବିଡିଓଙ୍କ ସମେତ ଉପ-ଜିଲ୍ଲାପାଳ ଏବଂ ତହସିଲଦାରଙ୍କୁ ତାଲିମ ଦିଆଯାଇଛି । ପୂର୍ବରୁ ଏହି ତାଲିମ୍ ଶିବିରରେ ଭାଗ ନେଇ ପାରିନଥିବା କିମ୍ବା ସଫଳତାର ସହ କୃତକାର୍ଯ୍ୟ ହୋଇନଥିବା ଅଧିକାରୀଙ୍କୁ ପୁଣି ଥରେ ଏଥିରେ ସାମିଲ କରାଯାଇଛି । ଆଉ ଏସବୁ ଭିତରେ ଉତରପ୍ରଦେଶରୁ ୧ ଲକ୍ଷ ଇଭିଏମ୍ ଆଣିବାକୁ ପ୍ରସ୍ତୁତି ଆରମ୍ଭ ହୋଇଛି । ଏଥିପାଇଁ ୨ଜଣ ଓଏଏସ୍ ଅଧିକାରୀଙ୍କୁ ଦାୟିତ୍ୱ ଦିଆଯାଇଛି । ଉଭୟ କେନ୍ଦ୍ର ଓ ରାଜ୍ୟ ସରକାର ମଧ୍ୟ ବଡ ବଡ ଘୋଷଣା ଜାରି ରଖିଛନ୍ତି । ଏହି ସବୁ ପ୍ରକ୍ରିୟାକୁ ଦେଖିଲେ ଆଗୁଆ ନିର୍ବାଚନର ଏକ ସ୍ପଷ୍ଟ ଆଭାସ ବାରି ହୋଇ ପଡୁଛି ।
Kanak News is now on WhatsApp
Join and get latest news updates delivered to you via WhatsApp
ରବିବାର, ଛୁଟି ଦିନରେ ରାଜ୍ୟ ମୁଖ୍ୟ ନିର୍ବାଚନ ଅଧିକାରୀଙ୍କ କାର୍ଯ୍ୟାଳୟରେ ପ୍ରଶାସନିକ ଅଧିକାରୀଙ୍କ ଚଂଚଳତା, ଏବଂ ନିର୍ବାଚନ ପ୍ରସ୍ତୁତି ନେଇ ଯୁଦ୍ଧକାଳୀନ ପ୍ରସ୍ତୁତି, କିଛି ଏଭଳି ଦିଗକୁ ଇସାରା କରୁଛି, ଯାହା ଆଗୁଆ ନିର୍ବାଚନ ବିତର୍କକୁ ଆହୁରି ସରଗରମ୍ କରିଦେଇଛି । ବୁଥ ପୁନର୍ଗଠନ ଓ ଭୋଟର ତାଲିକା ସଂଶୋଧନ ନେଇ କିଛି ଦିନ ପୂର୍ବରୁ ଜିଲ୍ଲା ଅଧିକାରୀଙ୍କ ସହ ଆଲୋଚନା ହୋଇଥିବା ବେଳେ ଆଜି ୧୬୬ ବିଡିଓ, ଉପ-ଜିଲ୍ଲାପାଳ ଏବଂ ତହସିଲଦାରଙ୍କ ତାଲିମ ଦିଆଯାଇଛି । ଆଉ ଏସବୁ ଭିତରେ ନିର୍ବାଚନ ପାଇଁ ଆବଶ୍ୟକ ଥିବା ଭିଭିପାଟ୍ ମେସିନ୍ ଏବଂ ଇଭିଏମ୍ ମେସିନ୍ ଆସିବା ପ୍ରକ୍ରିୟା ଆରମ୍ଭ ହୋଇଛି ।
-ଉତରପ୍ରଦେଶରୁ ୧ ଲକ୍ଷ ଇଭିଏମ୍ ଆଣିବାକୁ ପ୍ରସ୍ତୁତି ଆରମ୍ଭ ହୋଇଛି
-ଏଥିପାଇଁ ୨ଜଣ ଓଏଏସ୍ ଅଧିକାରୀଙ୍କୁ ଦାୟିତ୍ୱ ଦିଆଯାଇଛି
-ପୂର୍ବରୁ ଓଡ଼ିଶାକୁ ୧୨ ହଜାର ୨ଶହ ଭିଭିପାଟ୍ ମେସିନ୍ ଆସିସାରିଛି
-ଉତରପ୍ରଦେଶ ସମେତ ୬ଟି ରାଜ୍ୟରୁ ଇଭିଏସ୍ ଆସିବାର ଯୋଜନା ରହିଛି ।
ଏହି ସମସ୍ତ ପ୍ରକ୍ରିୟାକୁ ରୁଟିଂ କାର୍ଯ୍ୟକ୍ରମ ବୋଲି କୁହାଯାଉଛି ସତ । ହେଲେ ସରକାରୀ ଏବଂ ପର୍ଯ୍ୟାୟ କ୍ରମେ ତାଲିମ ଓ ପ୍ରଶିକ୍ଷଣ, ଏହି ସମସ୍ତ ବିନ୍ଦୁକୁ ଯଦି ଯୋଡ଼ି ଦିଆଯାଏ, ତେବେ କେଉଁଠି ନା କେଉଁଠି ଆଗୁଆ ନିର୍ବାଚନର ଆଭାସ ମିଳୁଛି ।ଏସବୁ ଭିତରେ ଉଭୟ କେନ୍ଦ୍ର ଓ ରାଜ୍ୟ ସରକାରଙ୍କ ବଡ ବଡ ଘୋଷଣା । ରାଜନୈତିକ ଦଳଗୁଡିକର ମନ୍ତ୍ରଣା ଏବଂ ରାଜ୍ୟରେ ଆଇଏଏସ୍, ଆଇପିଏସ୍ ସ୍ତରରେ ବଡ ଧରଣର ଅଦଳବଦଳ ବୋଧେ ସେହି ୨୦୧୯ ନିର୍ବାଚନର ଆଗୁଆ ପ୍ରସ୍ତୁତି ଆଡକୁ ଇସାରା କରୁଛି ।
କାର୍ଯ୍ୟକାଳ ଦୃଷ୍ଟିରୁ ନିର୍ବାଚନକୁ ଆହୁରୀ ୧୦ ମାସ ସମୟ ବାକି ଅଛି । ହେଲେ ନିର୍ବାଚନ ପାଇଁ ହେଉଥିବା ଯୁଦ୍ଧକାଳୀନ ପ୍ରସ୍ତୁତିକୁ ଦେଖିଲେ ଲାଗୁଛି ସମୟ ପୂର୍ବରୁ ନିର୍ବାଚନ ହୋଇପାରେ । ଏଥିପାଇଁ ରାଜନୈତିକ ଦଳ ବି ପ୍ରସ୍ତୁତ ଥିବା ଦାବି କରୁଛନ୍ତି । ଏପରିକି କଂଗ୍ରେସ ଓ ବିଜେଡି ଏଥିପାଇଁ ସମ୍ପୂର୍ଣ୍ଣ ପ୍ରସ୍ତୁତ ଥିବା କହିଛନ୍ତି । ବିଜେପି କହିଛି, ନିର୍ବାଚନ ପୂର୍ବରୁ ସରକାରଙ୍କ ପୋଲ ଖୋଲିବାକୁ ଅଭିଯାନ ଆରମ୍ଭ କରିବ । ବିମୁଦ୍ରାକରଣ ନିଷ୍ପତି ଭଳି ହଠାତ୍ ସାଧାରଣ ନିର୍ବାଚନ ପାଇଁ ବି ଘୋଷଣା ହୋଇପାରେ କାରଣ ଏହା ହେଉଛି ନିର୍ବାଚନ ବର୍ଷ । ତେବେ ଆଗୁଆ ନିର୍ବାଚନ ନେଇ ବର୍ତମାନ କେବଳ ଆକଳନ କରାଯାଇପାରେ, କିନ୍ତୁ ଚୁଡାନ୍ତ ନିଷ୍ପତି ଦେଶର ନିର୍ବାଚନ କମିଶନ ଓ କେନ୍ଦ୍ର ସରକାରଙ୍କ ହାତରେ ।