ନିର୍ବାଚନ ନେଇ ବଢୁଛି ଦ୍ୱନ୍ଦ ! ସମୟ ପୂର୍ବରୁ ପଡିବ କି ଭୋଟ୍ ? ସେପଟେ ନିର୍ବାଚନ ପାଇଁ ପ୍ରସ୍ତୁତ ଥିବା କହିଲେ ବିଜେଡି, ବିଜେପି ଓ କଂଗ୍ରେସ ।
କନକ ବ୍ୟୁରୋ : ଆଗୁଆ ହେବ କି ନିର୍ବାଚନ ? ସମୟ ପୂର୍ବରୁ ପଡିବ କି ଭୋଟ୍ ? ପ୍ରଶାସନିକ କଳର ଯୁଦ୍ଧକାଳୀନ ପ୍ରସ୍ତୁତି ଦେଖିଲେ ଏଭଳି କିଛି ପ୍ରଶ୍ନ ଆସିବା ସ୍ୱାଭାବିକ୍ । ପ୍ରଶାନସିକ ଅଧିକାରୀଙ୍କ ତତ୍ପରତା ଏବଂ ରାଜ୍ୟ ନିର୍ବାଚନ ଅଧିକାରୀଙ୍କ କାର୍ଯ୍ୟାଳୟରେ ବସୁଥିବା ଘନଘନ ବୈଠକ, କିଛି ଏଭଳି ଇସାରା କରୁଛି ଯାହା ଆଗୁଆ ନିର୍ବାଚନ ବିତର୍କକୁ ଆହୁରି ସରଗରମ କରି ଦେଇଛି । ନିର୍ବାଚନ କମିଶନଙ୍କ ନିର୍ଦ୍ଦେଶରେ ରାଜ୍ୟ ନିର୍ବାଚନ ଅଧିକାରୀ ପ୍ରସ୍ତୁତି ଆରମ୍ଭ କରିବା ଏବଂ ପ୍ରତି ଜିଲ୍ଲାକୁ ପ୍ରସ୍ତୁତ ରହିବାକୁ ଚିଠି ଲେଖିବା, ଏହି ସମସ୍ତ ବିନ୍ଦୁକୁ ଯଦି ଯୋଡି ଦିଆଯାଏ ତେବେ କେଉଁଠି ନା କେଉଁଠି ଆଗୁଆ ନିର୍ବାଚନର ଆଭାଷ ମିଳୁଛି ।
Kanak News is now on WhatsApp
Join and get latest news updates delivered to you via WhatsApp
ଆଉ ଏସବୁ ଭିତରେ ନିର୍ବାଚନ ପାଇଁ ଆବଶ୍ୟକ ଥିବା ଭିଭିପାଟ୍ ମେସିନ୍ ଏବଂ ଇଭିଏମ୍ ମେସିନ୍ ଆସିବା ଆରମ୍ଭ ହୋଇଥିବା ବେଳେ ରାଜ୍ୟରେ ଭୋଟର ତାଲିକା ସଂଶୋଧନ, ବୁଥ ପୁର୍ନଗଠନ ଆଦି ପ୍ରକ୍ରିୟା ଜୋରଦାର ହୋଇଛି । ଓଡ଼ିଶାକୁ ୧୨ ହଜାର ୨ଶହ ଭିଭିପାଟ୍ ମେସିନ୍ ଆସି ସାରିଥିବା ବେଳେ ୬ଟି ରାଜ୍ୟରୁ ୯୬ ହଜାର ଇଭିଏମ୍ ମେସିନ୍ ମଧ୍ୟ ଖୁବଶୀଘ୍ର ଆସିବ ବୋଲି ସୂଚନା ଦିଆଯାଇଛି ।
ପ୍ରଶାସନିକ ସ୍ତରରେ ବୈଠକ ପରେ ବୈଠକ ବସିବା ଏବଂ ନିର୍ବାଚନ ପାଇଁ ଆବଶ୍ୟକୀୟ ଉପକରଣ ଓଡ଼ିଶାରେ ଠୁଳ ହେବା, ହୁଏତ ଆଗୁଆ ନିର୍ବାଚନ ଆଡକୁ ଇସାରା କରୁଥାଇପାରେ । କାରଣ ଧାର୍ଯ୍ୟ ଥିବା ନିର୍ବାଚନ ତାରିଖକୁ ପ୍ରାୟ ବର୍ଷେ ରହିଛି । ଆଉ ବର୍ଷେ ପୂର୍ବରୁ ଏତେ ବଡ ଧରଣର ପ୍ରସ୍ତୁତି ନିଶ୍ଚିତ ଭାବରେ ଚର୍ଚ୍ଚା ପାଇଁ ଖୋରାକ୍ ଯୋଗାଇଛି ।
ଏସବୁ ଭିତରେ ଜାତୀୟ ଗଣମାଧ୍ୟମରେ ଆଗୁଆ ନିର୍ବାଚନ ନେଇ ଆକଳନ ହେବା, ମୌସୁମୀ ଅଧିବେଶନର ଅବଧି ସଂକୁଚିତ ହେବା ଏବଂ ଏକକ ନିର୍ବାଚନର ବିତର୍କ ଜୋରଦାର ହେବା ନିଶ୍ଚିତ ଭାବରେ ଏକ ଆଗୁଆ ନିର୍ବାଚନ ଆଡକୁ ଇସାରା କରୁଛି । ଏପଟେ ନିର୍ବାଚନ ଆଗୁଆ ପାଇଁ ପ୍ରସ୍ତୁତ ଥିବା କହିଛନ୍ତି ରାଜ୍ୟର ତିନି ପ୍ରମୁଖ ରାଜନୈତିକ ଦଳ । ତେଣୁ ଆଗୁଆ ନିର୍ବାଚନ ହେବାରେ କୌଣସି ଅସୁବିଧା ନାହିଁ ବୋଲି କୁହାଯାଇଛି । ଆଗୁଆ ନିର୍ବାଚନକୁ ନେଇ ବର୍ତମାନ ସମୟରେ କେବଳ ଆକଳନ କରାଯାଇପାରେ, କିନ୍ତୁ ଚୁଡାନ୍ତ ମୋହର ମାରିବେ ଦେଶର ନିର୍ବାଚନ କମିଶନ ।