ବିଜେଡିରୁ ଇସ୍ତଫା ଦେଲେ ମୋରଡା ବିଧାୟକ । କେଉଁ କ୍ୟାମ୍ପରେ ଯୋଗ ଦେବେ ତାହାକୁ ନେଇ ଚର୍ଚ୍ଚା ଆରମ୍ଭ ?

376

କନକ ବ୍ୟୁରୋ : ବିଜେଡିରୁ ଇସ୍ତଫା ଦେଲେ ମୋରଡା ବିଧାୟକ ପ୍ରବୀଣ ଚନ୍ଦ୍ର ଭଞ୍ଜଦେଓ ।  ଉଭୟ ଜିଲ୍ଲା ସଭାପତି ଓ ଦଳର ପ୍ରାଥମିକ ସଦସ୍ୟ ପଦରୁ ଇସ୍ତଫା ଦେଇଛନ୍ତି ପ୍ରବୀଣ ଭଞ୍ଜଦେଓ । ୨ ଥର ମୋରଡାରୁ ବିଧାୟକ ଥିବା ରାଜପରିବାରର ସଦସ୍ୟ ପ୍ରବୀଣ ବିଜେଡିରୁ ଇସ୍ତଫା ଦେବା ପଛର କାରଣ ଜଣାପଡିନାହିଁ । ତେବେ ବିଜେଡିରୁ ଇସ୍ତଫା ଦେବା ପରେ ପ୍ରବୀଣ କେଉଁ କ୍ୟାମ୍ପକୁ ଯିବେ ତାହା ମଧ୍ୟ ସସପେନ୍ସରେ ରହିଛି ।

ବିଜେପି ଏହି ଆସନରୁ ଆଜି କୃଷ୍ଣଚନ୍ଦ୍ର ମହାପାତ୍ରଙ୍କୁ ପ୍ରାର୍ଥୀ ଘୋଷଣା କରିଥିବା ବେଳେ ବିଜେଡି ସଜ ସଜ ଦଳରେ ମିଶିଥିବା ରାଜକିଶୋର ଦାସଙ୍କୁ ଟିକେଟ ଦେଇପାରେ ବୋଲି ଚର୍ଚ୍ଚା ହେଉଛି । ଅନ୍ୟପଟେ କଂଗ୍ରେସ ଏହି ଆସନରୁ ପ୍ରାର୍ଥୀ ଘୋଷଣା କରିନାହିଁ । ତେଣୁ ପ୍ରବୀଣ ବିଜେଡି କ୍ୟାମ୍ପ ଛାଡିବା ପରେ କଂଗ୍ରେସରେ ଯୋଗ ଦେବେ ନା ସ୍ୱାଧୀନ ଭାବେ ମୈଦାନକୁ ଓହ୍ଲାଇବେ ତାହା ଉପରେ ସମସ୍ତଙ୍କର ନଜର ରହିଛି ।

ବିଜେଡିରେ ରାଜକିଶୋର ଦାସ ମିଶିବା ପରେ ବଦଳିଥିଲା ମୟୂରଭଞ୍ଜ ରାଜନୀତି ସମୀକରଣ । ମୟୂରଭଞ୍ଜ ଜିଲ୍ଲାର ଏହି ଗୋଟିଏ ଆସନ ସାଧାରଣବର୍ଗଙ୍କ ଉଦ୍ଦିଷ୍ଟ ଥିବା ବେଳେ ଏହା ଫୋକସରେ ରହି ଆସିଛି । ତେଣୁ ରାଜକିଶୋର ବିଜେଡିରେ ମିଶିବା ନେଇ ଅସନ୍ତୁଷ୍ଟ ଥିଲେ ପ୍ରବୀଣ । ଆଉ ଏହାଭିତରେ ନିର୍ବାଚନକୁ ଆଉ ଦିନ କେଇଟା ବାକି ଥିବା ବେଳେ ଦଳରୁ ଇସ୍ତଫା ଦେଇଛନ୍ତି ପ୍ରବୀଣ ଭଞ୍ଜଦେଓ ।

Comments are closed.