୭୦୦ କୋଟି ଟଙ୍କାର ଚୂନା ଲଗାଇବା ପରେ ମଧ୍ୟ ସିସୋର ମୁଖ୍ୟ ପ୍ରଶାନ୍ତ ଦାସଙ୍କ ମୁହଁ ଟାଣ ! କହିଲେ ସତ୍ୟର ହେବ ଜୟ
କନକ ବ୍ୟୁରୋ : ସତ୍ୟର ଜୟ ହେବ । ସିସୋର କେବେ ଚିଟଫଣ୍ଡ କମ୍ପାନି ନଥିଲା । କିଛି ଏଭଳି କଥା ଆଜି ସିସୋର ଚିଟଫଣ୍ଡ ମହାଠକେଇର ମୁଖ୍ୟ ଖଳନାୟକଙ୍କ ମୁହଁରୁ ଶୁଣିବାକୁ ମିଳିଛି । ଦୀର୍ଘ ୪ ବର୍ଷ ଜେଲରେ ରହିବା ପରେ ହାଇକୋର୍ଟରୁ ବେଲ ପାଇ ମୁକୁଳିଥିଲେ ସିସୋର ଚିଟଫଣ୍ଡ କମ୍ପାନିର ମୁଖ୍ୟ ପ୍ରଶାନ୍ତ ଦାସ । ତେବେ ଝାରପଡା ଜେଲରୁ ମୁକୁଳିବା ପରେ ଗଣମାଧ୍ୟମ ଆଗରେ ସିସୋର କମ୍ପାନିର ପୂରା କାହାଣୀ ବଖାଣିଥିଲେ ପ୍ରଶାନ୍ତ । ଯାହାକୁ ନେଇ ଏବେ ଆରମ୍ଭ ହୋଇଛି ରାଜନୈତିକ ଚର୍ଚ୍ଚା ।
Kanak News is now on WhatsApp
Join and get latest news updates delivered to you via WhatsApp
ସିସୋର କମ୍ପାନି କେବେ ଚିଟଫଣ୍ଡ କମ୍ପାନି ନଥିଲା ।ଏହା ଲୋକଙ୍କର ଭୂଲ ଧାରଣା ।ସିସୋର ଚିଟଫଣ୍ଡ କମ୍ପାନି ନୂୁହେଁ ବୋଲି ଆଗାମୀ ଦିନରେ କୋର୍ଟରେ ପ୍ରମାଣିତ ହେବ ବୋଲି ଦୃଢୋକ୍ତି ପ୍ରକାଶ କରିଛନ୍ତି ପ୍ରଶାନ୍ତ । ସବୁ କିଛି ଠିକ୍ ଚାଲିଥିଲା କିନ୍ତୁ ହଠାତ୍ ସିସୋର କମ୍ପାନି ଉପରକୁ ସୁନାମି ମାଡି ଆସିଲା । ମେ ୨୯ ତାରିଖ ମିଡନାଇଟ ଅପରେସନ ପରେ ହଠାତ୍ କମ୍ପାନି ଉପରକୁ ସୁନାମି ମାଡି ଆସିଲା । ଏ ବିଷୟରେ କିଛି ବୁଝିବା ପୂର୍ବରୁ ସବୁକିଛି ସରିଯାଇଥିଲା । ତେବେ ମେ ୨୯ ମିଡ ନାଇଟ ଅପରେସନ ସହ ସିସୋର କମ୍ପାନିର ଲିଙ୍କ ନେଇ ମୁହଁ ଖୋଲିନଥିଲେ ପ୍ରଶାନ୍ତ । କିନ୍ତୁ ଗୋଟିଏ କଥା ବାରମ୍ବାର ଦୋହରାଉଥିଲେ କି ସିସୋର ପୂର୍ବରୁ କୌଣସି ରାଜନୈତିକ ଦଳ ସହ ନଥିଲା କି ଏବେ ମଧ୍ୟ ନାହିଁ । କିନ୍ତୁ ପ୍ରଶ୍ନ ଉଠୁଛି ଯଦି ସିସୋର ସହ କୌଣସି ରାଜନୈତିକ ଦଳର ସର୍ମ୍ପକ ନଥିଲା ତେବେ ସିସୋର ଲିଙ୍କରେ କିଛି ପ୍ରଭାବଶାଳୀ ନେତା ଗିରଫ ପଛର ରହସ୍ୟ କଣ । ଏହାସହ ସିସୋରର ପ୍ରତି କାର୍ଯ୍ୟକ୍ରମରେ ରାଜନୈତିକ ନେତାଙ୍କ ଉପସ୍ଥିତି ପ୍ରଶାନ୍ତ ଦାସଙ୍କ ବୟାନ ଉପରେ ପ୍ରଶ୍ନବାଚୀ ସୃଷ୍ଟି କରିଛି । ଏପରିକି ସିସୋର ଲିଙ୍କରେ ସିବିଆଇ ନବୀନ ନିବାସ ପର୍ଯ୍ୟନ୍ତ ମଧ୍ୟ ପହଞ୍ଚିଯାଇଥିଲା ।ଯାହା ରାଜ୍ୟ ରାଜନୀତିରେ କିଛି ସମୟ ପାଇଁ ହଲଚଲ ସୃଷ୍ଟି କରିଥିଲା ।
ତେବେ ସିସୋର ତଦନ୍ତ ବେଳେ ଶୁଭଙ୍କରଙ୍କ ଡାଏରୀ ଯେତେବେଳେ ସାମନାକୁ ଆସିଲା, ସେତେବେଳେ ବରିଷ୍ଠ ପୁଲିସ ବାବୁଙ୍କ ଠାରୁ ଆରମ୍ଭ କରି ପ୍ରଭାବଶାଳୀ ଲୋକ ସିବିଆଇ ସ୍କାନରକୁ ଆସିଗଲେ । ଅଭିଯୋଗ ହେଲା ପ୍ରଶାସନିକ କଳ ମଧ୍ୟରେ ଯୋଗସୂତ୍ର ସ୍ଥାପନ କରି ସିସୋର ପାଇଁ ଦଲାଲି କରୁଥିଲେ ଶୁଭଙ୍କର । ଶୁଭଙ୍କରଙ୍କୁ ଗିରଫ କରିବା ସହ ତାଠାରୁ ମିଳିଥିବା ସୂଚନା ଅନୁଯାୟୀ ଚଢାଉ ଜାରି ରଖିଲା ସିବିଆଇ । ଆଇପିଏସ ଅଧିକାରୀ ସତୀଶ ଗଜଭିୟେ, ରାଜେଶ କୁମାରଙ୍କୁ ଜେରା କଲା ସିବିଆଇ । ଆଉ ଜଣେ ଅଧିକାରୀ ମଧ୍ୟ ସଂଦେହ ଘେରକୁ ଆସିଥିଲେ । ସିସୋର ପାଇଁ ସରକାରୀ ବାବୁଙ୍କ ସହ ଯୋଗସୁତ୍ର ସ୍ଥାପନ କରୁଥିବା ମୁଖ୍ୟ କାର୍ପେଟଦାର ଶୁଭଙ୍କରକୁ ଚିହ୍ନି ନାହାନ୍ତି ବୋଲୀ ରୋକଠୋକ କହିଛନ୍ତି ପ୍ରଶାନ୍ତ । ଜେଲରୁ ବାହାରିବା ପରେ ଶୁଭଙ୍କର କିଏ ବୋଲି ପ୍ରଶ୍ନ କରିଥିଲେ ପ୍ରଶାନ୍ତ । ତେବେ ଏଠି ପ୍ରଶ୍ନ ଉଠୁଛି ସିସୋର ଚିଟଫଣ୍ଡର ଚର୍ଚ୍ଚିତ ଚେହେରା ଶୁଭଙ୍କରଙ୍କୁ ଏତେ ଶୀଘ୍ର ପ୍ରଶାନ୍ତ ଭୁଲିଗଲେ କିପରି?
ତେବେ ଗଣମାଧ୍ୟମ ଆଗରେ ପ୍ରଶାନ୍ତ କହିଛନ୍ତି, ଚିଟଫଣ୍ଡରେ ଟଙ୍କା ହରାଇଥିବା ସମସ୍ତ ଲୋକ ପଇସା ଫେରିପାଇବେ । କାରଣ ଯେତିକି ଲୋକଙ୍କୁ ଟଙ୍କା ଦିଆଯିବାକୁ ଥିଲା ତାହାଠାରୁ କମ୍ପାନିର ସମ୍ପତି ଅଧିକ ଅଛି ତେଣୁ ଲୋକଙ୍କୁ କିପରି ପଇସା ମିଳିବ ଓ କର୍ମଚାରୀଙ୍କୁ କିପରି ପୁଣିଥରେ ନିଯୁକ୍ତି ମିଳିବ ତାହା ତାଙ୍କର ପ୍ରଥମ କତ୍ତବ୍ୟ ହେବ ବୋଲି କହିଛନ୍ତି ପ୍ରଶାନ୍ତ । ତେବେ ସିସୋର କମ୍ପାନି କାହାକୁ ଚୂନା ମାରିନାହିଁ ଏବଂ ସତ୍ୟର ଜୟ ହେବ ବୋଲି କହିବା ସହ ମାନ୍ୟବର କୋର୍ଟ ତାଙ୍କ କଥା ଶୁଣିବେ ବୋଲି କହିଛନ୍ତି ପ୍ରଶାନ୍ତ । ତେବେ ଦେଖିବାକୁ ବାକି ରହିଲା ପ୍ରଶାନ୍ତଙ୍କ କଥାରେ କେତେ ସତ୍ୟତା ରହିଛି ଓ ଜମାକରୀଙ୍କୁ କେବେ ତାଙ୍କ କଷ୍ଟ ଅର୍ଜିତ ଟଙ୍କା ମିଳୁଛି ।