ଆଜି ନାଗପୁରରେ ଆରଏସଏସ କାର୍ଯ୍ୟକ୍ରମରେ ଯୋଗ ଦେବେ ପୂର୍ବତନ ରାଷ୍ଟ୍ରପତି ପ୍ରଣବ ମୁଖାର୍ଜୀ : ସାରା ଦେଶର ନଜର, କଣ କହିବେ ପ୍ରଣବ ?
କନକ ବ୍ୟୁରୋ : ଆଜି ନାଗପୁରରେ ଆରଏସଏସର କାର୍ଯ୍ୟକ୍ରମରେ ଯୋଗ ଦେବେ ପୂର୍ବତନ ରାଷ୍ଟ୍ରପତି ପ୍ରଣବ ମୁଖାର୍ଜୀ । ଏଥିପାଇଁ ଗତକାଲି ନାଗପୁରରେ ପହଂଚିଛନ୍ତି ଏହି ଭେଟେରାନ କଂଗ୍ରେସ ନେତା । ଗତ ୫୦ବର୍ଷ ଧରି ରାଷ୍ଟ୍ରୀୟ ସ୍ୱୟଂ ସେବକ ସଂଘକୁ ସାମ୍ପ୍ରଦାୟିକ ବୋଲି କହି ଆସୁଥିବା କଂଗ୍ରେସ ଦଳର ଏହି ପୁରୁଖା ନେତା ଆଜି ନାଗପୁରରେ କଣ କହିବେ ତାକୁ ନେଇ ସମସ୍ତଙ୍କ ମଧ୍ୟରେ ରହିଛି ଉତ୍କଣ୍ଠା । ଆରଏସଏସର ଏହି ବାର୍ଷିକ କାର୍ଯ୍ୟକ୍ରମ ‘ତୃତୀୟ ବର୍ଷ ବର୍ଗ’ରେ ମୁଖ୍ୟ ଅତିଥି ଭାବେ ଯୋଗ ଦେବା ସହ ଅଭିଭାଷଣ ରଖିବେ ପ୍ରଣବ ମୁଖାର୍ଜୀ । ବିମାନ ବନ୍ଦରରେ ପହଂଚିବା ପରେ ରାଷ୍ଟ୍ରୀୟ ସ୍ୱୟଂସେବକ ସଙ୍ଘ ପକ୍ଷରୁ ତାଙ୍କୁ ଭବ୍ୟ ସ୍ୱାଗତ କରାଯାଇଥିଲା । ଏପରିକି ଆରଏସଏସ ନେତାଙ୍କ ସହ ରାତ୍ରିଭୋଜନରେ ମଧ୍ୟ ଯୋଗ ଦେଇଛନ୍ତି ପ୍ରଣବ ।
Kanak News is now on WhatsApp
Join and get latest news updates delivered to you via WhatsApp
ତେବେ ଆରଏସଏସର ବିଚାରଧାରା କଂଗ୍ରେସର ବିପରୀତ ହୋଇଥିବାରୁ ଆଜି ପ୍ରଣବ କଣ କହିବେ ତା ଉପରେ ସାରା ଦେଶର ନଜର ରହିଛି । କାରଣ ଆରଏସଏସର ଏହି କାର୍ଯ୍ୟକ୍ରମରେ ପ୍ରଣବ ମୁଖାର୍ଜୀ ଯୋଗଦେବା ନେଇ ସୃଷ୍ଟି ହୋଇଛି ବିବାଦ । ଏହି କାର୍ଯ୍ୟକ୍ରମକୁ ବାତିଲ କରିବାକୁ କଂଗ୍ରେସ ତାଙ୍କୁ ଅନୁରୋଧ ମଧ୍ୟ କରିଥିଲା । ଆଜୀବନ କଂଗ୍ରେସରେ ରହିଥିବା ପ୍ରଣବ, ଆରଏସଏସ ବୈଠକରେ ଯୋଗ ଦେବା ଉଚିତ ନୁହେଁ ବୋଲି କଂଗ୍ରେସ କହିଥିଲା । ତେବେ ସେ ଯାହା କହିବେ, ନାଗପୁରରେ କହିବେ ବୋଲି ମନ୍ତବ୍ୟ ଦେଇଥିଲେ ପ୍ରଣବ ମୁଖାର୍ଜୀ ।
ପ୍ରତିବର୍ଷ ଆଜିର ଦିନରେ ନାଗରପୁରରେ ଆରଏଏସର ସଂଘ ଶିକ୍ଷାବର୍ଗ ସମାପନ ସମାରୋହ ହୋଇଥାଏ । ପ୍ରତିବର୍ଷ ମେ ୧୪ ତାରିଖରୁ ଜୁନ ୭ ତାରିଖ ଯାଏଁ ଦେଶର ବିଭିନ୍ନ ସ୍ଥାନର ସ୍ୱଂୟସେବକ ପ୍ରଶିକ୍ଷଣ ପାଇଁ ଆସିଥାନ୍ତି । ଆଜି ତାର ସମାପନ ହୋଇଥାଏ । ସଂଘ ନେତାଙ୍କ କହିବା ଅନୁସାରେ, ମହାତ୍ମାଗାନ୍ଧି ୧୯୩୪ ମସିହାରେ ଆରଏଏସ ଶିବିରକୁ ଆସିଥିଲେ । ୧୯୪୭ ମସି୍ହାରେ ଦିଲ୍ଲୀରେ ସ୍ୱଂୟସେବକଙ୍କୁ ସମ୍ବୋଧନ କରିଥିଲେ ଓ ଆରଏସଏସ କାର୍ଯ୍ୟକୁ ପ୍ରଂଶସା କରିଥିଲେ ।
୧୯୬୨ ମସିହାରେ ଭାରତ-ଚୀନ ଯୁଦ୍ଧରେ ସ୍ୱଂୟସେବକଙ୍କ ସେବାରେ ପ୍ରଭାବିତ ହୋଇଥିଲେ ତତ୍କାଳୀନ ପ୍ରଧାନମନ୍ତ୍ରୀ ଜବାହରଲାଲ ନେହେରୁ । ଆଉ ସେ ୧୯୬୩ରେ ସାଧାରଣତନ୍ତ୍ର ଦିବସ ପରେଡରେ ସଂଘକୁ ଆମନ୍ତ୍ରିତ କରିଥିଲେ । କୁହାଯାଏ, ପ୍ରଣବ ହେଉଛନ୍ତି ଶଦ୍ଦର ଯାଦୁଗର । ତେଣୁ ଆଜି ସମସ୍ତଙ୍କ ନଜର ରହିବ ଆରଏସଏସ କାର୍ଯ୍ୟକ୍ରମରେ ପ୍ରଣବ ମୁଖାର୍ଜୀ କଣ କହୁଛନ୍ତି । ସେ ସଂଘ ବିଚାରଧାରକୁ ପ୍ରଂଶସା କରୁଛନ୍ତି ନା ଏଥିରେ ପରବର୍ତନ ପାଇଁ କହୁଛନ୍ତି । କାରଣ ପ୍ରଣବଙ୍କ ଝିଅ ଶର୍ମିଷ୍ଠା ଟ୍ୱିଟ କରି ଆରଏସଏସ ଓ ବିଜେପିକୁ ସମାଲୋଚନା କରିଛନ୍ତି ।