କନକ ବ୍ୟୁରୋ : ୨୦୧୯ ପୂର୍ବରୁ ବିଜେଡି ଭିତରେ ବଡ ପରିବର୍ତ୍ତନ ହେବାକୁ ଯାଉଥିବା ଶୁଣିବାକୁ ମିଳୁଛି । ପଂଚମ ଥର ପାଇଁ କ୍ଷମତା ଦଖଲ କରିବା ଆଗରୁ ଦଳ ଏବେ ଶକ୍ତି ଆକଳନ କରୁଛି । କେଉଁଠି ଅସୁବିଧା ଅଛି, ତାକୁ କିଏ ସୁଧାରି ପାରିବ, କିଏ ଦଳ ପାଇଁ କଂଟା ହେଉଛି, ତାକୁ କିଭଳି ବାଟକୁ ଅଣାଯିବ, ସେନେଇ ରୀତିମତ କସରତ ହେଉଛି ।
Kanak News is now on WhatsApp
Join and get latest news updates delivered to you via WhatsApp
ବିଜେଡିର ନିକଟତମ ମହଲରେ ଚାଲିଥିବା ଚର୍ଚ୍ଚା ଅନୁସାରେ, ଖୁବଶୀଘ୍ର ଦଳରୁ ନିଲମ୍ବିତ ହୋଇଥିବା କିଛି ନେତାଙ୍କ ଉପରୁ ଆଦେଶ ପ୍ରତ୍ୟାହୃତ ହେବ । ଏନେଇ ସମସ୍ତ ନିଷ୍ପତ୍ତି ସରିଛି । ଖୁବଶୀଘ୍ର ମୁଖିଆଙ୍କ ଦସ୍ତଖତ ହୋଇଗଲେ ଗଣମାଧ୍ୟମକୁ ବ୍ରେକିଂ ନ୍ୟୁଜ ଆସିଯିବ ।
ପୂର୍ବତନ ଅର୍ଥମନ୍ତ୍ରୀ ପ୍ରଫୁଲ୍ଲ ଘଡେଇ, ପୂର୍ବତନ ମନ୍ତ୍ରୀ ଅଂଜଳୀ ବେହେରାଙ୍କ ନାଁ ତାଲିକାର ଆଗରେ ରହିଛି । ନବୀନଙ୍କ ବିରୋଧରେ କଡା ମନ୍ତବ୍ୟ ଦେଇ ପ୍ରଫୁଲ୍ଲ ଘଡେଇ ଦଳରୁ ବିଦା ହୋଇଥିବା ବେଳେ ପ୍ୟାରୀଙ୍କ ଷଡଯନ୍ତ୍ରରେ ସାମିଲ ଥିବା ଦାଗ ଲାଗିଥିଲା ଅଂଜଳୀଙ୍କ ବିରୋଧରେ ।
ଚର୍ଚ୍ଚା ଚାଲିଥିଲା, ବିରୋଧୀ କ୍ୟାମ୍ପ ଏହି ଦୁଇ ନେତାଙ୍କୁ ନେଇ ନିଜ ରାଜନୈତିକ ଅଙ୍କ କଷୁଛନ୍ତି । ବାସ୍, ଏହି ଖବର ଶୁଣିବା ଦିନରୁ ପ୍ରକ୍ରିୟା ଆରମ୍ଭ ହୋଇଗଲା, କିଭଳି ଏହି ନେତା ମାନଙ୍କ ମନକୁ ପୁଣି ଜିତିହେବ? ଖବର ପଠାଇ ଦିଆଗଲା, ଅନ୍ୟ ଦଳ ଆଡେ ଯାଆନ୍ତୁ ନାହିଁ, ବିଜେଡି ଆପଣ ମାନଙ୍କୁ ପୁଣି ଆଦରି ନେବ ।
ଏହି ଧାଡିଏ ପଦ, ଆଉ ନେତାଙ୍କ ଗ୍ରୀନ ସିଗନାଲ ପରେ କୁଆଡେ ଏହି ଦୁଇ ନେତା ଏବେ ଖୁସି ଥିବା ଶୁଣିବାକୁ ମିଳୁଛି । ଅର୍ଥାତ୍, ଏମାନେ ଆଉ ଅନ୍ୟ ଦଳକୁ ଯିବେ ନାହିଁ, କିମ୍ବା ଆଉ କେଉଁ ଶକ୍ତି ସହ ହାତ ମିଶାଇବେ ନାହିଁ । ଖୁବଶୀଘ୍ର ନିଲମ୍ବନ ଆଦେଶ ପ୍ରତ୍ୟାହୃତ ହୋଇଥିବା ନେଇ ପ୍ରେସ ରିଲିଜ୍ ଗଣମାଧ୍ୟମକୁ ଆସିବ ବୋଲି ଜଣାପଡିଛି ।