ବାଦବିବାଦ ଭିତରେ ଶ୍ରୀମନ୍ଦିରର ମୁଖ୍ୟ ପ୍ରଶାସକ ଭାବେ ଦାୟିତ୍ୱ ନେଲେ ପ୍ରଦୀପ୍ତ ମହାପାତ୍ର! ସାମ୍ନାରେ ଚ୍ୟାଲେଞ୍ଜର ପାହାଡ଼
କନକ ବ୍ୟୁରୋ : ରତ୍ନଭଣ୍ଡାର ଚାବି ହଜିବା ଓ ଡୁପ୍ଲିକେଟ୍ ଚାବି ମିଳିବାକୁ ନେଇ ତୁମ୍ବିତୋଫାନ ଭିତରେ ଆଜି ଶ୍ରୀମନ୍ଦିର ମୁଖ୍ୟ ପ୍ରଶାସକ ଭାବେ ଦାୟିତ୍ୱ ନେଇଛନ୍ତି ପ୍ରଦୀପ୍ତ ମହାପାତ୍ର । ଦାୟିତ୍ୱ ନେବା ପରେ ନୂଆ ପ୍ରଶାସକ କହିଛନ୍ତି, ତାଙ୍କ ଆଗରେ ରଥଯାତ୍ରାକୁ ସୁରୁଖୁରୁରେ ସାରିବା ମୁଖ୍ୟ ଚ୍ୟାଲେଂଜ । ତେବେ ରତ୍ନଭଣ୍ଡାର ଚାବି ପ୍ରସଙ୍ଗକୁ ଏଡାଇ ଯାଇଛନ୍ତି ନବ ନିଯୁକ୍ତ ମୁଖ୍ୟ ପ୍ରଶାସକ ପ୍ରଦୀପ୍ତ ମହାପାତ୍ର ।
Kanak News is now on WhatsApp
Join and get latest news updates delivered to you via WhatsApp
ରତ୍ନଭଣ୍ଡାର ଚାବି ନେଇ ବିବାଦ ଚରମ ସୀମାରେ ପହଁଚିବା, ଦାନ କଟକଣା ପରେ ସେବାୟତଙ୍କ ଭିତରେ ଅସନ୍ତୋଷ ବଢିବା ଏବଂ ଭକ୍ତଙ୍କୁ ମାଡ଼ ଭଳି ଘଟଣାରେ ଶ୍ରୀମନ୍ଦିର ପ୍ରଶାସନ କାଠଗଡ଼ାକୁ ଟଣା ହେବା – ଏହିଭଳି ଏକ ଘଡ଼ିସନ୍ଧି ମୁହୂର୍ତରେ ଶ୍ରୀମନ୍ଦିରର ମୁଖ୍ୟ ପ୍ରଶାସକ ଭାବେ ଦାୟିତ୍ୱ ନେଇଛନ୍ତି ଅଭିଜ୍ଞ ପ୍ରଶାସକ ପ୍ରଦୀପ୍ତ ମହାପାତ୍ର । ବାରମ୍ବାର ସରକାର ଅଡ଼ୁଆରେ ପଡିବାରୁ ଶ୍ରୀମନ୍ଦିର ମୁଖ୍ୟ ପ୍ରଶାସକ ଥିବା ପ୍ରଦୀପ ଜେନାଙ୍କୁ ହଟାଇ ତାଙ୍କ ସ୍ଥାନରେ ସ୍କୁଲ ଓ ଗଣଶିକ୍ଷା ବିଭାଗ ସଚିବ ପ୍ରଦୀପ୍ତ ମହାପାତ୍ରଙ୍କୁ ମୁଖ୍ୟ ପ୍ରଶାସକ ଭାବେ ଅତିରିକ୍ତ ଦାୟିତ୍ୱ ଦିଆଯାଇଛି । ହେଲେ ଦାୟିତ୍ୱ ନେବା ପରେ ସବୁଠୁ ବଡ଼ ଆଉ ସମ୍ବେଦନଶୀଳ ବିବାଦ-ରତ୍ନଭଣ୍ଡାର ଚାବି ପ୍ରସଙ୍ଗକୁ ଏଡାଇ ଯାଇଛନ୍ତି ପ୍ରଦୀପ୍ତ ।
ସେପଟେ ଆଗକୁ ଅଛି ରଥଯାତ୍ରା, ଟିକେ ଅସାବଧାନତା ହେଲେ, ପାନରୁ ଚୂନ ଖସିଗଲେ ପୁଣିଥରେ ବିଭ୍ରାଟର ଅପଖ୍ୟାତି ମୁଣ୍ଡାଇବା ଭୟ ରହିଛି । ଦାୟିତ୍ୱ ନେବା ପରେ ସେ କହିଛନ୍ତି, ଶ୍ରୀଜୀଉଙ୍କ ଦର୍ଶନ ପାଇଁ ଆସୁଥିବା ଭକ୍ତଙ୍କ ସୁବିଧା ସୁଯୋଗ ଉପରେ ଗୁରୁତ୍ୱ ଦିଆଯିବ । ସୁରୁଖୁରୁରେ ରଥଯାତ୍ରା ପାଇଁ ମଧ୍ୟ ସହଯୋଗ କାମନା କରିଛନ୍ତି ନୂଆ ମୁଖ୍ୟ ପ୍ରଶାସକ । ଉଭୟ ପୁରୀ ଜିଲ୍ଲା ଓ ଶ୍ରୀମନ୍ଦିର ପ୍ରଶାସନିକ ବ୍ୟବସ୍ଥାରେ ପ୍ରଦୀପ୍ତ ମହାପାତ୍ରଙ୍କର ରହିଛି ବହୁତ ଅଭିଜ୍ଞତା । କ୍ରାଇସିସ୍ ମ୍ୟାନେଜର ଭାବେ ରାଜ୍ୟ ପ୍ରଶାସନିକ ମହଲରେ ରହିଛି ତାଙ୍କର ଖ୍ୟାତି । ହେଲେ ଏଥରର ରାସ୍ତା ଏତେ ସହଜ ନୁହେଁ । କାରଣ ଦାୟିତ୍ୱ ନେବା ପୂର୍ବରୁ ବଡ଼ ବଡ଼ ଆହ୍ୱାନର ସମ୍ମୁଖୀନ ହେବେ ପ୍ରଦୀପ୍ତ । ନଜର ପକାଇବା ତାଙ୍କର ଆଗରେ ଥିବା ୫ଟି ବଡ଼ ବଡ଼ ଚ୍ୟାଲେଂଜ ଉପରେ ।
ଏକ ନମ୍ବର ଚ୍ୟାଲେଞ୍ଜ ହେଉଛି – ଭଣ୍ଡାର ଚାବି ବିବାଦର ସମାଧାନ
ଚ୍ୟାଲେଞ୍ଜ ନମ୍ବର ଦୁଇ – ରତ୍ନଭଣ୍ଡାର ସୁରକ୍ଷିତ ଥିବା ନେଇ ବିଶ୍ୱାସ ଜନ୍ମାଇବା
ତିନି ନମ୍ବର ଚ୍ୟାଲେଞ୍ଜ ହେଉଛି – ବାଦବିବାଦ ଭିତରେ ଶୃଙ୍ଖଳିତ ଭାବେ ରଥଯାତ୍ରା କରାଇବା
ଚ୍ୟାଲେଞ୍ଜ ନମ୍ବର ଚାରି – ଦାନ ନେଇ ସୁପ୍ରିମକୋର୍ଟଙ୍କ ନିର୍ଦ୍ଦେଶକୁ କାର୍ଯ୍ୟକାରୀ କରାଇବା
ପାଂଚ ନମ୍ବର ଚ୍ୟାଲେଞ୍ଜ – ଶ୍ରୀଜିଉଙ୍କ ନୀତିକାନ୍ତି ଓ ଶ୍ରୀମନ୍ଦିର ପ୍ରଶାସନିକ ବ୍ୟବସ୍ଥାକୁ ଶୃଙ୍ଖଳିତ କରାଇବା
ଏସବୁ ଚ୍ୟାଲେଂଜକ ଗ୍ରହଣ କରି ସମସ୍ୟାର ସମାଧାନ କରିପାରିଲେ କ୍ରାଇସିସ୍ ମ୍ୟାନେଜରର ଗୌରବ ଅକ୍ଷୂର୍ଣ୍ଣ ରହିବ, ନହେଲେ ମିଳିବ ଅପଖ୍ୟାତି ।