ପୂର୍ବତନ ସାଂସଦ ପ୍ରଦୀପ ମାଝୀଙ୍କ ଗିରଫଦାରୀ ପ୍ରସଙ୍ଗ : ପ୍ରତିବାଦରେ ୧୨ ଘଂଟିଆ ନବରଙ୍ଗପୁର ବନ୍ଦ ପାଳନ କରିଛି କଂଗ୍ରେସ
ନବରଙ୍ଗପୁର : ନବରଙ୍ଗପୁରରେ କଂଗ୍ରେସର ବନ୍ଦ ପାଳନ ଜୋରଦାର । ଜିଲ୍ଲାପାଳଙ୍କ ଆବାସିକ କାର୍ଯ୍ୟାଳୟ ଉପରକୁ ଅଣ୍ଡାମାଡ କଲେ କଂଗ୍ରେସ କର୍ମୀ । ଏଥିସହ କାର୍ଯ୍ୟାଳୟ ସମ୍ମୁଖରେ ପୋଲିସ ସହ ଧସ୍ତାଧସ୍ତି ହୋଇଛନ୍ତି କର୍ମୀ । ଘଟଣାରେ ପୋଲିସ ୨ଜଣ କଂଗ୍ରେସ କର୍ମୀଙ୍କୁ ଅଟକ ରଖିଛି । ପୂର୍ବତନ ସାଂସଦ ପ୍ରଦୀପ ମାଝୀ ଓ ଅନ୍ୟ ୧୭ ଜଣଙ୍କ ଗିରଫ ପ୍ରତିବାଦରେ ଆଜି ୧୨ ଘଂଟିଆ ନବରଙ୍ଗପୁର ବନ୍ଦ ପାଳନ କରୁଛି କଂଗ୍ରେସ । ଆଦିବାସୀଙ୍କୁ ଜଙ୍ଗଲ ଜମି ପଟ୍ଟା ଓ ରାସନ କାର୍ଡ ବଂଟନ ଦାବି ନେଇ କଂଗ୍ରେସ ଦାବି କରିଛି । ଏନେଇ ଦାବିପତ୍ର ଦେଉଥିବା ବେଳେ ରାଇଘର ରେଂଜ ଅଫିସରେ ଉତେଜନା ପ୍ରକାଶ ପାଇଥିଲା ।
Kanak News is now on WhatsApp
Join and get latest news updates delivered to you via WhatsApp
ଏହି ଘଟଣାରେ କଂଗ୍ରେସ ନେତା ପ୍ରଦୀପ ମାଝୀଙ୍କ ସମେତ ୧୮ ଜଣଙ୍କୁ ଗିରଫ କରି ଜେଲ ପଠାଇ ଦେଇଛି ପୋଲିସ । ବନ୍ଦର ପ୍ରଭାବ ବିଭିନ୍ନ ସ୍ଥାନରେ ପରିଲକ୍ଷିତ ହୋଇଛି । ଦୋକାନ ବଜାର ସବୁ ବନ୍ଦ ରହିଥିବାବେଳେ ବିଭିନ୍ନ ସ୍ଥାନରେ ପିକେଟିଂ କରି ବନ୍ଦକୁ ସଫଳ କରିବା ଲାଗି ଉଦ୍ୟମ ଚଳାଇଛନ୍ତି କଂଗ୍ରେସ କର୍ମୀ । ଟାୟାର ଜାଳି ରାସ୍ତା ଅବରୋଧ କରିବା ଫଳରେ ଯାନବାହାନ ଚଳାଚଳ ବାଧାପ୍ରାପ୍ତ ହୋଇଛି । ରାଜ୍ୟ ସରକାର ଆଦିବାସୀଙ୍କ ସ୍ୱାର୍ଥ ପ୍ରତି ଦୃଷ୍ଟି ଦେଉନଥିବା ଅଭିଯୋଗ କରିଛନ୍ତି ପିସିସି ସଭାପତି । ଏହି ପ୍ରସଙ୍ଗରେ ନବରଙ୍ଗପୁର ପରେ ସାରା କେବିକେ ଅଂଚଳ ଏପରିକି ଓଡିଶାରେ ଆନ୍ଦୋଳନକୁ ତୀବ୍ର କରାଯିବ ବୋଲି ପ୍ରସାଦ କହିଛନ୍ତି । ସେପଟେ ଗିରଫ ପ୍ରତିବାଦରେ ଜେଲ ଭିତରେ ଅନଶନ ଚଳାଇଛନ୍ତି ପ୍ରଦୀପ ମାଝୀଙ୍କ ସହ ଅନ୍ୟ ୧୭ କଂଗ୍ରେସ କର୍ମୀ ।
ସେପଟେ କନ୍ଧମାଳରେ ମଧ୍ୟ ପ୍ରଦୀପ ମାଝୀଙ୍କ ଗିରଫ ପ୍ରତିବାଦରେ ରାସ୍ତାକୁ ଓହ୍ଲାଇଛି କଂଗ୍ରେସ ଆଦିବାସୀ ସେଲ । ତେବେ ଏହି ବନ୍ଦ ପାଳନରେ ଦଳ ଭିତରେ ତାଳମେଳ ନାହିଁ । ପିସିସି ପକ୍ଷରୁ ଏହି ବନ୍ଦ ପାଳନକୁ ନାପସନ୍ଦ କରାଯାଇଛି । ଜିଲ୍ଲା କଂଗ୍ରେସ କମିଟି, ବନ୍ଦକୁ ବିରୋଧ କରି ଏସପିଙ୍କ ନିକଟରେ ଫେରାଦ ହୋଇଛି । ପିସିସି ପକ୍ଷରୁ ବନ୍ଦ ପାଳନ ପାଇଁ ଡାକରା ଦିଆଯାଇନଥିବା ବେଳେ ଆଦିବାସୀ ସେଲ ଉପସଭାପତି ନିଜ ଆଡୁ ବନ୍ଦ ପାଳନ ନେଇ ନିଷ୍ପତି ନେଇଥିବା କହିଛନ୍ତି ।