ଶତ୍ରୁର ଶତ୍ରୁ ପାଲଟିଲା ମିତ୍ର ! ବିଜେପିକୁ ରୋକିବା ପାଇଁ ମହାରଥୀଙ୍କ ମହାମେଂଟ
କନକ ବ୍ୟୁରୋ : କୁହାଯାଏ-ରାଜନୀତିରେ କେହି ସବୁ ଦିନପାଇଁ ଶତ୍ରୁ ନୁହଁନ୍ତି କି ମିତ୍ର ନୁହଁନ୍ତି । ଆଜି ଯିଏ ଶତ୍ରୁ କାଲି ସିଏ ହୁଏତ ମିତ୍ର ହୋଇପାରେ । ଆଉ ବେଳେବେଳେ ଶତ୍ରୁର ଶତ୍ରୁ ମିତ୍ର ହୋଇ ବି ଉଭା ହୁଅନ୍ତି । ଆଜି ସଚିବାଳୟରେ ଏମିତି ଏକ ଦୃଶ୍ୟ କନକ ନ୍ୟୁଜ୍ କ୍ୟାମେରା ଟିମ୍ କଏଦ କରିଛି । ଯାହା ଏହି ଦୁଇଟି ଉକ୍ତିଟି ହୁଏତ ପ୍ରମାଣିତ କରୁଛି ।
Kanak News is now on WhatsApp
Join and get latest news updates delivered to you via WhatsApp
ପିପିଲି ରାଜନୀତିର ଦୁଇ ତୁଙ୍ଗ ଚେହେରା, ମନ୍ତ୍ରୀ ପ୍ରଦୀପ ମହାରଥୀ ଏବଂ ପୂର୍ବତନ କଂଗ୍ରେସ ବିଧାୟକ ଯୁଧିଷ୍ଠିର ସାମନ୍ତରାୟ । କୁହାଯାଏ-ଏହି ଦୁଇ ନେତା, ଜଣେ ଆଉ ଜଣଙ୍କୁ ଚେହେରା ଦେଖିବାକୁ ବି ପସନ୍ଦ କରନ୍ତି ନାହିଁ । ଏମାନଙ୍କ ଭିତରେ ଥିବା ଲଢ଼େଇ, ନିର୍ବାଚନୀ ମୈଦାନରୁ ବ୍ୟକ୍ତିଗତ ସ୍ତରକୁ ଓହ୍ଲାଇଥିବା ସମସ୍ତେ ଜାଣନ୍ତି । କିନ୍ତୁ ଆଜି ସଚିବାଳୟରେ ଦେଖିବାକୁ ମିଳିଥିଲା ଏକ ବିରଳ ଦୃଶ୍ୟ । ଯେଉଁଠି ମନ୍ତ୍ରୀଙ୍କ ଚ୍ୟାମ୍ବରରେ ବସିଥିଲେ କଂଗ୍ରେସ ନେତା ଯୁଧିଷ୍ଠିର ସାମନ୍ତରାୟ । ଆଉ ସାମ୍ବାଦିକମାନେ ଯେତେବେଳେ ପଚାରିଲେ ଏହି ଅପୂର୍ବ ମିଳନର କାରଣ । ଉଭୟଙ୍କ ମତଥିଲା-ପିପିଲିର ବିକାଶ ନେଇ ଆଲୋଚନା ହୋଇଛି ।
ଆଉ ଏହି ବୟାନ ଦେବା ଭିତରେ ପାଟିରୁ ଖସି ଆସିଥିଲା ଅସଲ କଥା । ଉଭୟ ନେତା ବଖାଇଣି ଥିଲେ ରାଜନୀତିର ଦୁଇଟି ଦୋକାନର କଥା । ବିଜେପିକୁ ରୋକିବାକୁ ହାତ ମିଳାଇଛନ୍ତି କି କଂଗ୍ରେସ ଓ ବିଜେଡି ନେତା ? ବିଜେପିର ବାଟ ବନ୍ଦ କରିବାକୁ ଏହି ଅପୂର୍ବ ମିଳନ ହୋଇଥିଲା କି ସଚିବାଳୟରେ ? ଶତ୍ରୁର ଶତ୍ରୁ ମିତ୍ର ଭଙ୍ଗିରେ ଏକାଠି ହେଲେ କି ଯୁଧିଷ୍ଠିର ଏବଂ ପ୍ରଦୀପ ମହାରଥୀ ?
ନିର୍ବାଚନରେ ଯେତେବେଳେ ପରସ୍ପର ବିରୋଧରେ ଲଢ଼ୁଛନ୍ତି ଏହି ଦୁଇ ନେତା, ଠିକ୍ ସେହିକି ବେଳେ ଏହି ଦୁଇ ନେତାଙ୍କ ଏହି ଭାବ କାହିଁକି ସାମ୍ବାଦିକମାନଙ୍କୁ ବି ହଜମ ହୋଇନଥିଲା । ଆଉ ପଚାରିଥିଲେ-ବିଜେଡି ଆଡକୁ ଢଳୁଛନ୍ତି କି ଯୁଧିଷ୍ଠିର । କିନ୍ତୁ ନିଜ ନିଜ ଷ୍ଟାଇଲରେ କଥାଟିକୁ ଖଣ୍ଡନ କରିଥିଲେ ଦୁଇ ନେତା ।
ପଂଚାୟତ ନିର୍ବାଚନ ପରେ ବିଜେପିର ଦମ୍ଭ ଆଗ ଅପେକ୍ଷା ଢ଼େର ବଢ଼ି ଯାଇଛି । ୨୦୧୯ରେ କ୍ଷମତାକୁ ଆସିବା ପାଇଁ ବିଜେପି ନେତା ଅନବରତ ଉଦ୍ୟମ କରୁଥିବା ଚର୍ଚ୍ଚା ହେଉଛି । ଆଉ ଏଭଳି ସ୍ଥିତିରେ ମନ୍ତ୍ରୀ ପ୍ରଦୀପ ମହାରଥୀ ଏବଂ କଂଗ୍ରେସ ନେତା ଯୁଧିଷ୍ଠିର ସାମନ୍ତରାୟ ବିଜେପିର ବାଟ ରୋକିବାକୁ ଏଭଳି ପ୍ରୟାସ କରୁଥିବା ଚର୍ଚ୍ଚା ଜୋରଧରିଛି ।