କନକ ବ୍ୟୁରୋ : ପ୍ଲାଷ୍ଟିକ ବ୍ୟାନ୍ ପାଇଁ ଦିଆଯାଇଥିବା ସମୟସୀମା ଆଜି ଶେଷ ହୋଇଛି । ଏଣିକି କଡାକଡା ହେବ ନିୟମ । ଯଦି ଆସନ୍ତାକାଲି ଠାରୁ କେହି ପଲିଥିନ୍ ବ୍ୟବହାର କରନ୍ତି, ତେବେ ତାଙ୍କୁ ଦଣ୍ଡିତ ହେବାକୁ ପଡିବ । କାରଣ ପ୍ଲାଷ୍ଟିକ ବ୍ୟାନ ପାଇଁ ଯେଉଁ ୧ ମାସର ସମୟସୀମା ଦିଆଯାଇଥିଲା, ତାହା ଆଜି ଶେଷ ହୋଇଛି । ଆସନ୍ତାକାଲି ଠାରୁ ପଲିଥିନ୍ ବ୍ୟବହାର ଉପରେ ଲଗାମ ଲାଗିବ । ଏବଂ ଯେଉଁ ବ୍ୟକ୍ତି ପଲିଥିନ୍ ବ୍ୟବହାର କରିବେ ସେମାନଙ୍କୁ ଦଣ୍ଡିତ କରାଯିବ ।
Kanak News is now on WhatsApp
Join and get latest news updates delivered to you via WhatsApp
ରାଜ୍ୟ ସରକାର ଜାରି କରିଥିବା ନିର୍ଦ୍ଦେଶାନାମା ଅନୁସାରେ ପଲିଥିନ ବ୍ୟାନ ଲାଗି କଂଟ ପୁରିବା ପରେ ଏଣିକି ପଲିଥିନ ବିକ୍ରି କଲେ ସଂପୃକ୍ତ ଦୋକାନୀ ଓ କଂପାନୀ ମାଲିକଙ୍କ ଉପରେ କାର୍ଯ୍ୟାନୁଷ୍ଠାନ ହେବ ବୋଲି କହିଛନ୍ତି ପରିବେଶ ସଚିବ । ଛୋଟ ଛୋଟ ଦୋକାନୀ ପଲିଥିନ୍ ବ୍ୟବହାର କଲେ ସେମାନଙ୍କ ଉପରେ ୩୦୦୦, ୫ ହଜାର କିମ୍ବା ୭ ହଜାର ଟଙ୍କାର ଫାଇନ ଲାଗିବ । ଆଉ ସବୁଠାରୁ ବଡ କଥା ହେଉଛି ପଲିଥିନ୍ ବ୍ୟବହାର କରାଯାଉଥିବା ନେଇ ଅଭିଯୋଗ ଆସିଲେ, ମ୍ୟୁନିସିପାଲଟି କିମ୍ବା ଅର୍ବାନ ଡେଭଲପମେଣ୍ଟ ଚଢାଉ କରିପାରିବେ ।
ସେହିପରି ଗୋଦାମ ଓ ପଲିଥିନ ପ୍ରସ୍ତୁତ କରୁଥିବା କଂପାନୀ ଗୁଡିକ ଉପରେ ଚଢାଉ କରିବାକୁ ପ୍ରଦଷଣ ନିୟନ୍ତ୍ରଣ ବୋର୍ଡ ଓ ଅର୍ବାନ ଡେଭଲପମେଂଟ ବିଭାଗକୁ ଚିଠି ଲେଖାଯାଇଛି ବୋଲି ବିଭାଗୀୟ ସଚିବ କେ ମୁରୁଗେସନ ସୂଚନା ଦେଇଛନ୍ତି । ଯଦି ବଡ ବଡ ଦୋକାନ, ଗୋଦାମ କିମ୍ବା ଫ୍ୟାକ୍ଟ୍ରିରେ ୫୦ ମାଇକ୍ରନରୁ କମ ପଲିଥିନ୍ ବ୍ୟବହାର ହୁଏ କିମ୍ବା ତିଆରି ହୁଏ ତେବେ ଅତି କମରେ ୧ ଲକ୍ଷ ଟଙ୍କା ଜୋରିମାନା ଆଦାୟ ହେବ । ରେଡ ଗୁଡିକ ଇପିଏ ବା ଏନଭରମେଂଟ ପ୍ରୋଟେକ୍ସନ ଆକ୍ଟ ଅନୁଯାୟୀ କରାଯିବ ଓ ଏଥିଲାଗି ୫ରୁ ୭ ବର୍ଷ ପର୍ଯ୍ୟନ୍ତ ଜେଲଦଣ୍ଡ ସହ ଅତିକମରେ ୧ଲକ୍ଷ ଟଙ୍କା ଜରିମାନା ଦେବାକୁ ପଡିବ ।