ଅବସର ଅଖିମୁଠି ଉଦ୍ଦେଶ୍ୟ ରାଜନୀତି! ଚାଷୀଙ୍କ ହୃଦୟରେ ସ୍ଥାନ ବନାଇବାକୁ ନେତାଙ୍କ ଉଦ୍ୟମ
କନକ ବ୍ୟୁରୋ : ପ୍ରତ୍ୟେକ ଓଡିଆଙ୍କ ପାଇଁ ଅକ୍ଷୟ ତୃତୀୟା ବେଶ ଗୁରୁତ୍ୱପୂର୍ଣ୍ଣ । ଚାଷକାମ କୁହନ୍ତୁ ବା ସନ୍ତାନ ସନ୍ତତିଙ୍କ ମାଙ୍ଗଳିକ କାର୍ଯ୍ୟ । ନୂଆ ଘର ତିଆରି ବା ଗୃହ ପ୍ରବେଶ । ଯେକୌଣସି କାର୍ଯ୍ୟ ଏହିଦିନଠାରୁ ଆରମ୍ଭ କଲେ ଶୁଭ ହୁଏ ବୋଲି ବିଶ୍ୱାସ ରହିଛି । ଅକ୍ଷୟ ତୃତୀୟ ଅଖିମୁଠି ଅନୁକୂଳ କରେ ଚଷାପୁଅ । ଓଡିଶା ଏକ କୃଷି ପ୍ରଧାନ ରାଜ୍ୟ । ପ୍ରାୟ ୮୫ ପ୍ରତିଶତ ଲୋକଙ୍କ ଜୀବନ ଜୀବୀକା କୃଷି ଉପରେ ନିର୍ଭରଶୀଳ । ଆଉ ସେଥିପାଇଁ ରାଜନୀତିରେ ମଧ୍ୟ ଏହି ଦିନଟିର ଗୁରୁତ୍ୱ ବଢିଯାଇଛି । ରାଜ୍ୟର ଚାଷୀକୂଳକୁ ନିଜ ଆଡକୁ ଆକର୍ଷିତ କରିବା ପାଇଁ ସମସ୍ତ ରାଜନୈତିକ ଦଳ ପକ୍ଷରୁ ଆୟୋଜନ ହେଉଛି ଅଖିମୁଠି ଅନୁକୂଳ ।
Kanak News is now on WhatsApp
Join and get latest news updates delivered to you via WhatsApp
ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ପୁରୀ ଜିଲ୍ଲା ପିପିଲିରେ ଅଖିମୁଠି ଅନୁକୂଳ କରିଥିବାବେଳେ ସାଙ୍ଗରେ ଥିଲେ କୃଷିମନ୍ତ୍ରୀ ପ୍ରଦୀପ ମହାରଥୀ । ସେହିପରି ବିଜେପି ଉପସଭାପତି ସମୀର ମହାନ୍ତି ଓ ଦଳର କୃଷକ ମୋର୍ଚ୍ଚା ରାଜ୍ୟ ସଭାପତି ଶିବାଜୀ ମହାନ୍ତି ଆଠଗଡ ଜିଲ୍ଲା ଗୁରୁଡିଝାଟିଆରେ ଅଖିମୁଠି ଅନୁକୂଳ କରିଛନ୍ତି । ପିସିସି ସଭାପତି ପ୍ରସାଦ ହରିଚନ୍ଦନ ମଧ୍ୟ ରୈଜନୀତିର ଏହି ଅଖିମୁଠି ଅନୁକୂଳ ପରମ୍ପରାରେ ସାମିଲ ହୋଇଛନ୍ତି । ଖୋର୍ଦ୍ଧା ଜିଲ୍ଲା ପାଣିଅରାରେ ବିହନ ବୁଣି ଚାଷ ଅନୁକୂଳ କରିଛନ୍ତି ପ୍ରସାଦ ।
ବୈଶାଖ ଶୁକ୍ଳପକ୍ଷ ତୃତୀୟା । ଏହିଦିନ କୌଣସି କାମକଲେ ତାର କ୍ଷୟ ହୁଏ ନାହିଁ ଆଉ ସେଥିପାଇଁ ଏହାକୁ ଅକ୍ଷୟ ତୃତୀୟା ବୋଲି କୁହାଯାଏ । ସେଥିପାଇଁ ସାରା ରାଜ୍ୟରେ ଆଜି ଚାଷୀକୂଳ କ୍ଷେତରେ ସୁନାର ଫସଲ ଖେଳାଇବାକୁ ବିହନ ଅନୁକୂଳ କରିଛନ୍ତି । କୃଷି ଭିତିକ ଏହି ପର୍ବରେ ଆଜି ସକାଳୁ ଘରେ ଝୋଟି ଚିତା ପକାଇ, କଳସ ବସାଇ ନୂଆ ବସ୍ତ୍ର ପିନ୍ଧିଛନ୍ତି । ଚିତା ଲଗା ସୁସଜ୍ଜିତ ଗଉଣି, ଟୋକେଇରେ ବିହନ ରଖି ତାକୁ ଘରେ ଅନୁକୂଳ କରିବା ପରେ ମୁଣ୍ଡାଇ ନେଇ ଚାଷ ଜମିରେ ବୁଣିଛନ୍ତି । ପରମ୍ପରା ଅନୁଯାୟୀ ଚାଷ ଜମିକୁ ପଂଚାମୃତରେ ସୁଦ୍ଧ କରିବା ପରେ କିଆକନ୍ଦା ପୋତି ମୁଣ୍ଡିଆ ମାରିବା ସହ ଅଖିମୁଠି ଅନୁକୂଳ କରିଛନ୍ତି ।
ବିଗତ କିଛିବର୍ଷ ହେବ ରାଜନୀତିରେ ସ୍ଥାନ ପାଇଛି ଅକ୍ଷୟ ତୃତୀୟାରେ ଅଖିମୁଠି ଅନୁକୂଳ ପର୍ବ । ହେଲେ ଚାଷ ଓ ଚାଷୀଙ୍କ ପାଇଁ ହେଉଥିବା ଉନ୍ନୟମନମୂଳକ ଯୋଜନାକୁ ନେଇ ସବୁବେଳେ ଉଠୁଛି ପ୍ରଶ୍ନ । ରାଜ୍ୟର ଚାଷୀ କୂଳଙ୍କୁ କେଉଁଠି ହକର ଲଢେଇ ଲଢିବାକୁ ପଡୁଛି ତ ପୁଣି କେଉଁଠି ଫସଲ ଉଜୁଡିଯିବା ପରେ ଜୀବନ ହାରି ଦେଉଛି ଚାଷୀ ।