ଓକିଲଙ୍କ ଆନ୍ଦୋଳନରେ ପଶିଲା ରାଜନୀତି! କେଉଁଠି ନବୀନଙ୍କ କୁଶପୁତ୍ତଳିକା ଜଳିଲା ତ ଆଉ କେଉଁଠି ଜଳିଲା ଧର୍ମେନ୍ଦ୍ରଙ୍କ କୁଶପୁତ୍ତଳିକା
ଓଡ଼ିଶା ବାର କାଉନସିିଲ ପକ୍ଷରୁ ରାଜ୍ୟବ୍ୟାପୀ କୁଶପୁତ୍ତଳିକା ଦାହ ପାଇଁ ଡାକରା ଦିଆଯାଇଥିଲେ ସୁଦ୍ଧା ଅନେକ ବାର୍ ଏଥିରୁ ନିଜକୁ ବିରତ ରଖିଛନ୍ତି ।
କନକ ବ୍ୟୁରୋ : ଦୀର୍ଘ ୨ମାସରୁ ଅଧିକ ସମୟ ଧରି ଚାଲିଥିବା ଓକିଲଙ୍କ ଆନ୍ଦୋଳନ ଆଜି ଏକ ଭିନ୍ନ ମୋଡ ନେଇଛି । ଆଇନଜୀବୀଙ୍କ ଆନ୍ଦୋଳନକୁ ଭଣ୍ଡୁର କରିବା ପାଇଁ ରାଜ୍ୟ ସରକାର ପରୋକ୍ଷରେ ଉସୁକାଉଥିବା ଅଭିଯୋଗ କରି ଆଜି ରାଜ୍ୟର ବିଭିନ୍ନ ସ୍ଥାନରେ ମୁଖ୍ୟମନ୍ତ୍ରୀଙ୍କ କୁଶପୁତଳିକା ଦାହ କରାଯାଇଛି । ଓଡ଼ିଶା ବାର କାଉନସିିଲ ପକ୍ଷରୁ ରାଜ୍ୟବ୍ୟାପୀ କୁଶପୁତ୍ତଳିକା ଦାହ ପାଇଁ ଡାକରା ଦିଆଯାଇଥିଲେ ସୁଦ୍ଧା ଅନେକ ବାର୍ ଏଥିରୁ ନିଜକୁ ବିରତ ରଖିଛନ୍ତି । ଆଉ ଆଜିର ଏହି ଘଟଣା ପୁଣି ଥରେ ପ୍ରମାଣିତ କରିଦେଇଛି ଯେ, ଓକିଲ ଆନ୍ଦୋଳନରେ ଲାଗିଥିବା ରାଜନୀତିର ରଙ୍ଗ ଆହୁରୀ ଗାଢ଼ ହୋଇଛି ।
Kanak News is now on WhatsApp
Join and get latest news updates delivered to you via WhatsApp
ରାଜ୍ୟର ବିଭିନ୍ନ କୋର୍ଟ ଆଗରେ ଜଳୁଥିବା ମୁଖ୍ୟମନ୍ତ୍ରୀଙ୍କ କୁଶପୁତଳିକା, କେବଳ ଯେ ଆଇନଜୀବୀଙ୍କ ଆନ୍ଦୋଳନର ପ୍ରତିଫଳନ, ହୁଏତ ଏହା କହିବା ଏବେ କଷ୍ଟକର । କାରଣ ଆଇନଜୀବୀଙ୍କ ଆନ୍ଦୋଳନରେ ଲାଗିଛି ରାଜନୀତିର ରଙ୍ଗ । ଆଉ ଏହି ରଙ୍ଗ ଏବେ ଆହୁରି ଗାଢ଼ ହୋଇଛି, ଯେତେବେଳେ କୁଶପୁତଳିକା ଦାହକୁ କେଉଁଠି ସମର୍ଥନ କରାଯାଇଛି, ତ ଆଉ କେଉଁଠି ବିରୋଧ କରାଯାଇଛି ।
ହେଲେ ଏହି ପ୍ରତିବାଦରେ ବି କେଁ ପଶିଛି । କାରଣ ପୁରୀ, ସମ୍ବଲପୁର, ସୁନ୍ଦରଗଡ଼, ରାଉରକେଲା, ଖୋର୍ଦ୍ଧା, ଯାଜପୁର, ବାଲିଗୁଡ଼ା, ବଲାଙ୍ଗୀର, ରାୟଗଡ଼ା, ଦେବଗଡ଼, ଗଜପତି, କଳାହାଣ୍ଡି, ନୟାଗଡ଼,କେନ୍ଦ୍ରାପଡ଼ା, ଜୟପୁର ଓ ସୁବର୍ଣ୍ଣପୁରରେ କୁଶପୁତଳିକା ଦାହ ଦେଖିବାକୁ ମିଳିନି । ଅନ୍ୟପକ୍ଷରେ କଟକ, ଯାଜପୁର, ନବରଙ୍ଗପୁର, ନୀଳଗିରି, ଧର୍ମଶାଳା, ଭଦ୍ରକ, ଅନୁଗୁଳ, କେନ୍ଦୁଝର, ବାଳେଶ୍ୱର,ବ୍ରହ୍ମପୁର, ଢ଼େଙ୍କାନାଳ, ବାରିପଦା,ମାଲକାନଗିରି ଏବଂ ଫୁଲବାଣୀ ଭଳି ସହରେ ମୁଖ୍ୟମନ୍ତ୍ରୀଙ୍କ କୁଶପୁତଳିକା ଦାହ ହୋଇଛି । କେବଳ ମୁଖ୍ୟମନ୍ତ୍ରୀ ନୁହେଁ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ କୁଶପୁତ୍ତଳିକା ମଧ୍ୟ ଦାହ କରିଛନ୍ତି ଓକିଲ । ଆଉ ଏଭଳି ଚିତ୍ର ଆସିଛି ଭଦ୍ରକରୁ । ଯେଉଁଠି ଓକିଲ ମାନେ ଧର୍ମେନ୍ଦ୍ର ପ୍ରଧାନଙ୍କ କୁଶପୁତ୍ତଳିକା ଦାହ କରିଛନ୍ତି ।
ଏପଟେ ଆନ୍ଦୋଳନର ଆଗାମୀ କାର୍ଯ୍ୟପନ୍ଥା କ’ଣ ହେବ ସେନେଇ ଗୁରୁବାର ବସୁଛି ବାର ଆସୋସିଏସନର ବୈଠକ । ଯେଉଁଠି ଆଲୋଚନା ପରେ ଚୁଡାନ୍ତ ନିଷ୍ପତି ହେବ ବୋଲି ସଂଘର ସଂପାଦକ ସୂଚନା ଦେଇଛନ୍ତି । ଗୋଟିଏ ପଟେ ବିଜେଡି ଲିଗାଲ ସେଲ୍ କାର୍ଯ୍ୟରେ ଯୋଗଦେବା ପାଇଁ ଆଗେଇ ଆସିଥିବା ବେଳେ ଅନ୍ୟପଟେ ଓଡ଼ିଶା ବାର ଆସୋସିଏସନ୍ର ନିଷ୍ପତିକୁ ଅପେକ୍ଷା କରାଯାଇଛି । ଆଉ ଏସବୁ ଭିତରେ କିନ୍ତୁ ୨ ମାସରୁ ଅଧିକ ସମୟ ହେଲାଣୀ ଠପ୍ ହୋଇ ଯାଇଛି କୋର୍ଟ କଚେରୀ କାର୍ଯ୍ୟ ।