ଅମିତ ଶାହାଙ୍କ ଗସ୍ତକୁ ନେଇ ବିଜେପି ଶିବିର ଚଳଚଂଚଳ, ବିରୋଧ ପାଇଁ ଅଂଟା ଭିଡିଲା ଯୁବ କଂଗ୍ରେସ, ବିଜେଡି କହିଲା, ପଡିବନି ପ୍ରଭାବ ।
କନକ ବ୍ୟୁରୋ : ବିଜେପି ରାଷ୍ଟ୍ରୀୟ ଅଧ୍ୟକ୍ଷ ଅମିତ ଶାହାଙ୍କ ଓଡ଼ିଶା ଗସ୍ତକୁ ନେଇ ଜୋରଧରିଛି ରାଜନୀତି । ଅମିତଶାହାଙ୍କ ଓଡିଶା ଗସ୍ତକୁ ଯୁବ କଂଗ୍ରେସ ବିରୋଧ କରିବ ବୋଲି ଚେତାବନୀ ଦେଇଥିବା କଂଗ୍ରେସର ଆଭିମୁଖ୍ୟକୁ ସମାଲୋଚନା କରିଛି ବିଜେପି । ଆଉ ଏସବୁ ଭିତରେ ଅମିତ ଶାହାଙ୍କ ଗୃର ପ୍ରଭାବ ନେଇ ଆରମ୍ଭ ହୋଇଛି ଆକଳନ । ଉଭୟ ବିଜେଡି ଓ କଂଗ୍ରେସ ଏହାର କୌଣସି ପ୍ରଭାବ ପଡ଼ିବ ନାହିଁ ବୋଲି ଯୁକ୍ତି ରଖିଥିବା ବେଳେ ବିଜେପି କହୁଛି-ସମୀକ୍ଷା ପାଇଁ ଆସୁଛନ୍ତି ରାଷ୍ଟ୍ରୀୟ ଅଧ୍ୟକ୍ଷ ।
Kanak News is now on WhatsApp
Join and get latest news updates delivered to you via WhatsApp
ପୂର୍ବ ଭାରତ, ବିଶେଷ କରି ଓଡ଼ିଶାକୁ ଫୋକସରେ ରଖିଥିବା ବିଜେପି, ୨୦୧୯ ପାଇଁ ଏକ ବଡ ଲକ୍ଷ୍ୟ ରଖିଥିବା ବେଳେ ଏହାକୁ ସଫଳରୂପ ଦେବା ପାଇଁ ଆପ୍ରାଣ ଉଦ୍ୟମ କରୁଛି ଦଳ । ଆଉ ଏହି କ୍ରମରେ ଆସନ୍ତା ୧ ତାରିଖରେ ପୁଣି ଓଡ଼ିଶା ଆସୁଛନ୍ତି ବିଜେପି ରାଷ୍ଟ୍ରୀୟ ଅଧ୍ୟକ୍ଷ । ୨୦୧୯ ପୂର୍ବରୁ କେମିତି ହେବ ରଣନୀତି? ଲକ୍ଷ୍ୟ ପୂରଣରେ କେତେ ବାଟ ଆଗେଇଲା ଓଡ଼ିଶା ସଂଗଠନ ? ଏହି ସବୁ ପ୍ରସଙ୍ଗରେ ଜୋର ଦେବେ ଅମିତ ଶାହା ।
ଅମିତ ଶାହାଙ୍କ ଏହି ଓଡ଼ିଶା ଗସ୍ତ କିନ୍ତୁ ପୂର୍ବ ଭଳି ଏତେ ସହଜ ହେଲା ଭଳି ମନେ ହେଉ ନାହିଁ । କାରଣ ଏଥର ଅମିତ ଶାହାଙ୍କ ବାଟ ଓଗାଳିବାକୁ ପ୍ରସ୍ତୁତ ହେଉଛନ୍ତି ବିରୋଧୀ । ବିଶେଷ କରି କଂଗ୍ରେସ, ଅମିତ ଶାହାଙ୍କ ଗସ୍ତକୁ ବିରୋଧ କରିବ ବୋଲି ସ୍ପଷ୍ଟ କରି ଦେଇଛି । ଯାହାର ଏକ ଝଲକ୍ ଅମିତ ଶାହାଙ୍କ ଗସ୍ତ ପୂର୍ବରୁ ଦେଖିବାକୁ ମିଳିଛି । ଯୁବ କଂଗ୍ରେସ ପକ୍ଷରୁ ଭୁବନେଶ୍ୱରରେ ମୋଦି ସରକାରଙ୍କ ଆଭିମୁଖ୍ୟକୁ ବିରୋଧ କରାଯାଇଛି । ବଡ କଥା ହେଉଛି ବିଜେପି ଦେଶବ୍ୟାପୀ ଦଳୀୟ ସଂଗଠନକୁ ମଜବୁତ କରି, ୨୦୧୪ର ସଫଳତାକୁ ୨୦୧୯ରେ ଦୋହରାଇବାକୁ ଲକ୍ଷ୍ୟ ରଖିଥିବା ବେଳେ ସମସ୍ତ ୫୪୩ଟି ଆସନରେ ପ୍ରଭାରୀ ନିଯୁକ୍ତି ପାଇଁ ଘୋଷଣା କରିଛି । ଠିକ୍ ଏମିତି ବେଳେ ପ୍ରଶ୍ନ ହେଉଛି- ଓଡ଼ିଶା ଉପରେ କ’ଣ ପଡ଼ିବ ଅମିତ ଶାହାଙ୍କ ଗସ୍ତର ପ୍ରଭାବ ?
କେନ୍ଦ୍ରୀୟ ନେତାଙ୍କ ଓଡ଼ିଶା ଉପସ୍ଥିତି ରାଜନୀତିକୁ କେତେ ପ୍ରଭାବିତ କରିବ ତାହା ତ’ ଆଗାମୀ ଦିନରେ ସ୍ପଷ୍ଟ ହୋଇଯିବ । ହେଲେ ଓଡ଼ିଶାରେ ବିଜେପି, ନିଜ ଲକ୍ଷ୍ୟ ପୂରଣ କରିବା ଏତେଟା ସହଜ ହେବ ନାହିଁ । କାରଣ କଳାଧନ ଏବଂ ଦରବୃଦ୍ଧିକୁ ନେଇ କଂଗ୍ରେସ ମୋଦି ସରକାରଙ୍କୁ ଘେରୁଥିବା ବେଳେ ମହାନଦୀ ପ୍ରସଙ୍ଗରେ ବିଜେଡିର ମୁଖ୍ୟ ଟାର୍ଗେଟରେ ରହିଛି ବିଜେପି ।