ପୋଲିସ ହେବ ତ ଏମିତି ! ଟ୍ରେନରୁ ପଡି ଯାଇଥିବା ଆହତ ଯୁବକଙ୍କୁ କାନ୍ଧରେ ଧରି ଦେଢ କିଲୋମିଟର ଦୌଡିବା ପରେ ପହଞ୍ଚାଇଲେ ହସ୍ପିଟାଲରେ, ସୋସିଆଲ ମିଡିଆରେ ପାଲଟିଲେ ହିରୋ
ପୋଲିସ ହେବ ତ ଏମିତି । ମଧ୍ୟପ୍ରଦେଶ ହୋସଙ୍ଗାବାଦର ପୋଲିସକର୍ମୀ ନିଜ ସାହସିକତା ବଳରେ ଦୁର୍ଘଟଣାରେ ଆହତ ହୋଇଥିବା ବ୍ୟକ୍ତିଙ୍କର ଜୀବନ ବଞ୍ଚାଇଛନ୍ତି । ପୋଲିସ କର୍ମୀ ପୁନମ ଚନ୍ଦ୍ର ବିଲ୍ଲୋର ଚଳନ୍ତା ଟ୍ରେନରେ ତଳକୁ ପଡିଯାଇଥିବା ଜଣେ ଆହତ ବ୍ୟକ୍ତିଙ୍କୁ କାନ୍ଧରେ ପକାଇ ପ୍ରାୟ ଦେଢ କିଲୋମିଟର ରେଳ ଧାରଣାରେ ଦୌଡିବା ପରେ ହସ୍ପିଟାଲରେ ପହଞ୍ଚାଇଥିଲେ । ଆଉ ଠିକ୍ ସମୟରେ ଆହତ ବ୍ୟକ୍ତିଙ୍କୁ ହସ୍ପିଟାଲରେ ପହଞ୍ଚାଇବା ଯୋଗୁଁ ଉକ୍ତ ବ୍ୟକ୍ତିଙ୍କର ଜୀବନ ରକ୍ଷା ପାଇଯାଇଥିଲା ।
Kanak News is now on WhatsApp
Join and get latest news updates delivered to you via WhatsApp
ମଧ୍ୟପ୍ରଦେଶର ହୋସଙ୍ଗାବାଦରୁ ପାଖାପାଖି ୬୦ କିଲୋମିଟର ଦୂରରେ ଶନିବାର ଭାଗଲପୁର ଏକ୍ସପ୍ରେସରୁ ଜଣେ ବ୍ୟକ୍ତି ତଳକୁ ପଡି ଯାଇଥିଲେ । ଚଳନ୍ତା ଟ୍ରେନରୁ ଖସି ପଡିବା କାରଣରୁ ଉକ୍ତ ବ୍ୟକ୍ତିଙ୍କୁ ଗଭୀର ଆଘାତ ଲାଗିଥିଲା । ଏହି ଘଟଣା ଜଣାପଡିବା ପରେ ରେଳବିଭାଗ ପକ୍ଷରୁ ପୋଲିସକୁ ସୂଚନା ଦିଆଯାଇଥିଲା । ସୂଚନା ମିଳିବା ପରେ ଡ୍ୟୁଟିରେ ଥିବା ପୋଲିସ କର୍ମୀ ପୁନମ ଚନ୍ଦ୍ର ବିଲ୍ଲୋର ଓ ଗାଡି ଚାଳକ ରାହୁଲ ସାକଲ୍ଲେ ଘଟଣସ୍ଥଳ ଅଭିମୁଖେ ବାହାରିଥିଲେ । ତେବେ ଘଟଣାସ୍ଥଳରୁ ପ୍ରାୟ ଦେଢ କିଲୋମିଟର ପୂର୍ବରୁ ଗାଡି ଯାଇ ପାରିବ ନାହିଁ ବୋଲି ଜାଣିବା ପରେ ଚାଲି ଚାଲି ଘଟଣାସ୍ଥଳରେ ପହଞ୍ଚିଥିଲେ ପୁନମ । ସେଠାରେ ଗୁରୁତର ଭାବେ ଆହତ ବ୍ୟକ୍ତିଙ୍କୁ ଦେଖିବା ପରେ କାଳବିଳମ୍ବ ନ କରି ତତକ୍ଷଣାତ କାନ୍ଧ ଉପରେ ପକାଇ ଗାଡି ପାଖକୁ ଦୌଡିଥିଲେ ।
ପାଖାପାଖି ଦେଢ କିଲୋମିଟର ରେଳ ଟ୍ରାକରେ ଦୌଡିବା ପରେ ଗାଡି ପାଖରେ ପହଞ୍ଚିଥିଲେ ପୁନମ । ପରେ ତାଙ୍କୁ ଚିକିତ୍ସା ପାଇଁ ହସ୍ପିଟାଲରେ ଭର୍ତ୍ତି କରିଥିଲେ । ଆଉ ପୋଲିସ କର୍ମୀଙ୍କ ଏଭଳି ସାହସିକତା ଯୋଗୁଁ ବଞ୍ଚି ଯାଇଥିଲା ଉକ୍ତ ବ୍ୟକ୍ତିଙ୍କ ଜୀବନ । ତେବେ ଏହାର ଭିଡିଓ ସୋସିଆଲ ମିଡିଆରେ ଭାଇରାଲ ହେବା ପରେ ମଧ୍ୟପ୍ରଦେଶ ପୋଲିସ ଡିଜି ବିକେ ସିଂ ସାହସୀ ପୋଲିସ ଅଧିକାରୀ ପୁନମ ଚନ୍ଦ୍ରଙ୍କୁ ପୁରସ୍କାର ଦେବାକୁ ଘୋଷଣା କରିଛନ୍ତି ।