ଘର ଢିଙ୍କି କୁମ୍ଭୀର… । ଦୁର୍ଦ୍ଦାନ୍ତ ଆତଙ୍କବାଦୀଙ୍କୁ ଦିଲ୍ଲୀରେ ପହଞ୍ଚାଇବାକୁ ଡିଏସପି ଦେବେନ୍ଦ୍ର କରିଥିଲେ ଲକ୍ଷାଧିକ ଟଙ୍କାର ଡିଲ୍, ଦୁଇ ଆତଙ୍କବାଦୀଙ୍କ ସହ କାରରେ ଆସୁଥିବା ବେଳେ ଧରିଲା ପୋଲିସ ।
ଯଦି ଘର ଢିଙ୍କି କୁମ୍ଭୀର ହୁଏ ତେବେ କାହାକୁ ଭରସା କରିବ । ଠିକ୍ ସେହିଭଳି ଜଣେ ଗୃହଭେଦୀ ବିଭୀଷଣ ହେଉଛନ୍ତି ଜମ୍ମୁ-କାଶ୍ମୀରର ଡିଏସପି ଦେବେନ୍ଦ୍ର ସିଂ । ଯିଏ ଆତଙ୍କବାଦୀଙ୍କୁ ଦିଲ୍ଲୀ ପହଞ୍ଚାଇବାକୁ ଦେଶ ସହ ଧୋକା କରିବାକୁ ମଧ୍ୟ ଟିକିଏ ପଛାଇନଥିଲେ । ଜମ୍ମୁ-କାଶ୍ମୀରରୁ ହିଜବୁଲ ମୁଜାହିଦ୍ଦିନ ଓ ଲସ୍କର-ଇ-ତୋଇବାର ଦୁଦ୍ଦାନ୍ତ ଆତଙ୍କବାଦୀଙ୍କ ସହ ଡିଏସପି ଦେବେନ୍ଦ୍ର ସିଂଙ୍କ ଲିଙ୍କ ନେଇ ଆଉ ଏକ ବଡ ସୁରାକ ପାଇଛି ପୋଲିସ । ଡିଏସପିଙ୍କୁ ଗିରଫ କରାଯିବା ପରେ ବଡ ଖୁଲାସା ହୋଇଛି । ଏହି ଆତଙ୍କବାଦୀଙ୍କୁ ଚଣ୍ଡିଗଡ ବାଟ ଦେଇ ଦିଲ୍ଲୀ ନେଇଯିବାକୁ ଲକ୍ଷାଧିକ ଟଙ୍କାର ଡିଲ୍ କରିଥିଲେ ଡିଏସପି । ଏପରିକି ସଂସଦ ଆକ୍ରମଣର ମୁଖ୍ୟ ଅଭିଯୁକ୍ତ ଆତଙ୍କବାଦୀ ଅଫଜଲ ଗୁରୁ ସହ ମଧ୍ୟ ଡିଏସପି ଦେବେନ୍ଦ୍ର ସିଂର ଲିଙ୍କ୍ ଥିବା ନେଇ ଖବର ସାମ୍ନାକୁ ଆସିଛି ।
Kanak News is now on WhatsApp
Join and get latest news updates delivered to you via WhatsApp
ଡିଏସପି ଦେବେନ୍ଦ୍ର ସିଂ ଶ୍ରୀନଗର ବିମାନବନ୍ଦର ସୁରକ୍ଷାରେ ନିୟୋଜିତ ଥିବା ବେଳେ ଗତ ଦୁଇ ଦିନ ତଳେ ଆସିଥିବା ବିଦେଶ ରାଷ୍ଟ୍ରଦୂତଙ୍କ ସୁରକ୍ଷାରେ ମଧ୍ୟ ସାମିଲ ଥିଲେ । ଆଣ୍ଟି ହାଇଜାକିଙ୍ଗ ସ୍କ୍ୱାର୍ଡର ଦେବେନ୍ଦ୍ରଙ୍କୁ ସଫଳ ଆତଙ୍କବାଦୀ ଅପରେଶନ ପାଇଁ ରାଷ୍ଟ୍ରପତି ପୁରସ୍କାରରେ ମଧ୍ୟ ସମ୍ମାନିତ କରାଯାଇଛି ।
ଦେବେନ୍ଦ୍ରଙ୍କୁ ଗିରଫ ପରେ ଜମ୍ମୁ-କାଶ୍ମୀର ପୋଲିସ ମହାନିର୍ଦ୍ଦେଶକ ବିଜୟ କୁମାର କହିଛନ୍ତି, ଦେବେନ୍ଦ୍ରଙ୍କୁ ମଧ୍ୟ ଆତଙ୍କବାଦୀଙ୍କ ଭଳି ପଚରାଉଚରା କରାଯିବ । କାରଣ ଯାଞ୍ଚ ସମୟରେ ତାଙ୍କ ଘରୁ ୩ଟି ଏକେ-୪୭ ରାଇଫଲ ସହ ୫ଟି ହ୍ୟାଣ୍ଡ ଗ୍ରେନେଡ ମଧ୍ୟ ଜବତ କରାଯାଇଛି । ଆତଙ୍କବାଦୀଙ୍କ ସହ କାରରେ ଯାଉଥିବା ବେଳେ ଡିଏସପି ଦେବେନ୍ଦ୍ର ସିଂଙ୍କୁ ଗିରଫ କରିଥିଲା ପୋଲିସ । ଏପରିକି ସ୍ଥାନୀୟ ଯୁବକଙ୍କୁ ଆତଙ୍କବାଦୀ ସଙ୍ଗଠନରେ ସାମିଲ କରାଇବା ପଛରେ ଦେବେନ୍ଦ୍ରଙ୍କର ବଡ ଭୂମିକା ରହିଥିଲା ବୋଲି କୁହାଯାଉଛି । ଯାହାକୁ ନେଇ ତଦନ୍ତ ଆରମ୍ଭ ହୋଇଛି ।