ଆଇପିଏଲରେ ଛକା, ଜୁଆ ଆଡାରେ ଉଡୁଛି ଟଙ୍କା । ଷ୍ଟିଲ୍ ସିଟିରେ ଆଇପିଏଲ୍ ବେଟିଂ । ଅନଲାଇନରେ ଚାଲିଛି ଲକ୍ଷ ଲକ୍ଷ ଟଙ୍କାର ବେଆଇନ କାରବାର
କନକ ବ୍ୟୁରୋ: ପଡିଆରେ ଛକା-ଚୌକାର ବର୍ଷା ଆଉ ଏପଟେ ଟଙ୍କାର ବର୍ଷା । ଅନଲାଇନରେ ସରଗରମ ସଟା ବଜାର । ସହରର ଗଳି କନ୍ଦିରେ ଚାଲିଛି ଆଇପିଏଲ୍ ବେଟିଂ ରାକେଟ୍ । ଷ୍ଟିଲ୍ ସିଟି ରାଉରକେଲାରେ ଏକ ବଡ ଧରଣର ବେଟିଂ ରାକେଟକୁ ଧରିଛି ପୋଲିସ । ୩ ସଟା ବେପାରୀଙ୍କୁ ଗିରଫ କରିବା ସହ ସେମାନଙ୍କ ଠାରୁ ଜବତ କରିଛି ୯ ଲକ୍ଷରୁ ଅଧିକ ଟଙ୍କା । ପଢନ୍ତୁୁ ଅନଲାଇନରେ କିଭଳି ଚାଲିଛି ଲକ୍ଷ ଲକ୍ଷ ଟଙ୍କାର ବେଆଇନ କାରବାର ।
Kanak News is now on WhatsApp
Join and get latest news updates delivered to you via WhatsApp
ଆଇପିଏଲ୍ ମାନିଆ ଯୁବପିଢିକୁ ମତୁଆଲା କରିଥିବା ବେଳେ ସକ୍ରୀୟ ହୋଇଉଠିଛି ବେଆଇନ ବେଟିଂ ର୍ୟାକେଟ୍ ରାଉରକେଲାରେ ଏପରି ଏକ ର୍ୟାକେଟର ପର୍ଦ୍ଦାଫାସ ହେବା ପରେ ସାମନାକୁ ଆସିଛି ଏହି ସାଂଘାତିକ ସତ । ଗତକାଲିଠାରୁ ରାଉରକେଲା ପ୍ଲାଂଟସାଇଟ୍ ଥାନା ଅଂଚଳରେ ତୁହାକୁ ତୁହା ଚଢାଉ କରିବା ପରେ ୩ ଜଣ ସଟ୍ଟା ବେପାରୀଙ୍କୁ ଗିରଫ କରିଛି ପୋଲିସ ।
ସେମାନଙ୍କଠାରୁ ୯ଲକ୍ଷରୁ ଅଧିକ ଟଙ୍କା, ଏଲଇଡି ଟିଭି, ଲାପଟପ୍, କାଲକୁଲେଟର, ୩୩ଟି ମୋବାଇଲ ଫୋନ ଜବତ କରାଯାଇଛି । ଫଟାଫଟ କ୍ରିକେଟରେ ପଡ଼ିଆରେ ବ୍ୟାଟସମ୍ୟାନ ରନ୍ ବର୍ଷା କରୁଥିବା ବେଳେ ଅନଲାଇନ୍ ସଟ୍ଟାବଜାରରେ ହେଉଛି ଟଙ୍କା ବର୍ଷା । ଗୋଟିଏ ପଟେ ପଡିଆରେ ଛକା ଚୌକା ମାଡରେ ସ୍କୋର ଆଗକୁ ବଢୁଛି, ଅନ୍ୟପଟେ ଲକ୍ଷ ଲକ୍ଷ ଟଙ୍କା ରୋଜଗାର କରି ଚାଲିଛନ୍ତି ସଟ୍ଟା ବେପାରୀ ।
ବହୁ ଦିନରୁ ରାଉରକେଲାରେ ଏହି ବେଆଇନ କାରବାର ଚାଲିଥିବା ନେଇ ଅଭିଯୋଗ ହୋଇ ଆସୁଥିଲା । ସବୁ ଜାଣି ଏଥିପ୍ରତି ଆଖି ବୁଜି ଦେଇଥିଲେ ସ୍ଥାନୀୟ ପୋଲିସ । ତେବେ ପୋଲିସ ଉଚ୍ଚ କର୍ତୃପକ୍ଷ ଜାଣିବା ପରେ ଏସପିଙ୍କ ନିର୍ଦ୍ଦେଶରେ ଆରମ୍ଭ ହୋଇଥିଲା ତନାଘନା । ବିଭିନ୍ନ ସ୍ଥାନରେ ଚଢାଉ ଓ ଫୋନ ଟ୍ରାକିଂ ପରେ ଧରା ପଡିଥିଲା ଏହି ର୍ୟାକେଟ୍ । ତେବେ ପୂର୍ବରୁ ସୂଚନା ପାଇଁ କିଛି କୁଖ୍ୟାତ ସଟ୍ଟା ବ୍ୟବସାୟୀ ଖସି ପଳାଇ ଯାଇଥିବା ଚର୍ଚ୍ଚା ହେଉଛି ।