କଦଳୀରେ ମିଶୁଛି ଭୟଙ୍କର ବିଷ ! ଇଥେଫୋନ ସ୍ପ୍ରେର ୬ ଘଣ୍ଟାରେ କଞ୍ଚା କଦଳୀ ପାଲଟୁଛି ପାଚିଲା କଦଳୀ, ପ୍ରଭାବରେ ହେଉଛି ସାଂଘାତିକ ରୋଗ । କନକ ନ୍ୟୁଜର ଅନୁସନ୍ଧାନମୂଳକ ରିପୋର୍ଟ
କନକ ବ୍ୟୁରୋ : ବଜାରରେ ମିଳୁଛି ବିଷ କଦଳୀ । ଶୁଣିବାକୁ ଆଶ୍ଚର୍ଯ୍ୟ ଲାଗୁଥିଲେ ବି ଘଟଣାଟି ବିଲକୁଲ୍ ସତ । କଞ୍ଚ କଦଳୀକୁ ପଚାଇବା ପାଇଁ ବ୍ୟବହାର ହେଉଛି ମାରାତ୍ମକ ରାସାୟନିକ ପଦାର୍ଥ । ବଜାର ଚାହିଦା ମେଂଟାଇବା ପାଇଁ କଦଳୀକୁ କଂଚା କଟାଯାଇ କାଲସିୟମ କାରବାଇଡ୍ ପ୍ରଲେପ ଦେଇ କିମ୍ବା ଇଥେଫୋନ ନାମକ କେମିକାଲ୍୍ ସ୍ପ୍ରେ କରି ପଚାଯାଉଛି । ଏହିସବୁ ରାସାୟନିକ ପଦାର୍ଥରେ ସଂସ୍ପର୍ଶରେ ଆସିଲେ ହଳଦୀ ଗୁରୁଗୁରୁ ହୋଇ କଦଳୀ ପାଚିଯାଉଛି । ଦେଖିବାକୁ ଗଛ ପାଚିଲା କଦଳୀ ଠାରୁ ଆହୁରି ସୁନ୍ଦର ଦେଖାଯାଉଛି । ଆମେ ସ୍ୱାସ୍ଥ୍ୟକର ଭାବି ପାଚିଲା କଦଳୀ ଖାଉଛୁ ମାତ୍ର ଅସଲ କଥା ହେଉଛି ପାଚିଲା କଦଳୀରେ ବିଷ ଖାଇ ଆମେ ମାରାତ୍ମକ ରୋଗକୁ ଆମନ୍ତ୍ରଣ କରୁଛୁ ।
Kanak News is now on WhatsApp
Join and get latest news updates delivered to you via WhatsApp
ଆପଣ ଖାଉଥିବା କଦଳୀ କେତେ ସୁରକ୍ଷିତ! ଏହାର ଯାଞ୍ଚ କରିବା ପାଇଁ କନକ ନ୍ୟୁଜ ଆରମ୍ଭ କରିଥିଲା ଅନୁସନ୍ଧାନ । ଆଉ ଏହାର ଖିଅ ଖିଅ ଖୋଜୁ ସାଂଘାତିକ ତଥ୍ୟ ସାମ୍ନାକୁ ଆସିଥିଲା । ହଳଦୀ ଗୁରୁଗୁରୁ ଦେଖାଯାଉଥିବା କଦଳୀ ସ୍ୱାସ୍ଥ୍ୟପକ୍ଷେ କେତେ କ୍ଷତିକାରକ ତାହାର ସମ୍ପୂର୍ଣ୍ଣ ତଥ୍ୟ ସାମ୍ନାକୁ ଆସିଥିଲା । କଂଚା କଦଳୀ ଉପରେ ଇଥେଫୋନ ସ୍ପ୍ରେ କରାଯାଉଛି । କାରଣ ଖୁବ କମ ସମୟ ମଧ୍ୟରେ କଦଳୀ ପାଚିବା ଦରକାର । ସ୍ପ୍ରେ ହେବା ପରେ ମାତ୍ର ୨୪ ଘଂଟା ଭିତରେ କଦଳୀ ପାଚିଯିବ ଓ ବିକ୍ରି ଉପଯୋଗୀ ହୋଇଯିବ । ରଙ୍ଗ ଠାରୁ ଆରମ୍ଭ କରି କଦଳୀର ସ୍ୱାଦ ଦୃଷ୍ଟିରୁ ଦେଖିଲେ ଏହି କଦଳୀ କୌଣସି ଗୁଣରେ କମ ନୁହେଁ । ମାତ୍ର ଇଥେଫୋନ୍ ଭଳି ମାରାତ୍ମକ ରାସାୟନିକ କଦଳୀକୁ ବିଷାକ୍ତ କରିଦେଉଛି । ସ୍ୱାସ୍ଥ୍ୟ ପାଇଁ ଅତି ହିତକର ପାଚିଲା କଦଳୀ ହୋଇଯାଉଛି ବିଷାକ୍ତ । ଅନେକପ୍ରକାର ମାରାତ୍ମକ ରୋଗର କାରଣ ସାଜୁଛି ଏହି ଇଥେଫୋନ୍ । ଏଭଳି ରାସାୟନିକର ମାତ୍ରାଧିକ ବ୍ୟବହାର ଘାତକ ମଧ୍ୟ ହୋଇପାରେ ।
ଇଥେଫୋନ ହେଉଛି ଏକ ରାସାୟନିକ ମିଶ୍ରଣ । ଇଥେରୋନ୍. ପ୍ରୋପାଇଲିନ୍ କ୍ଲାଇକୋନ୍ ଓ ଡିଷ୍ଟିଲ୍ ୱାଟର୍ ମିଶି ଇଥେଫୋନ୍ ସୃଷ୍ଟି ହୁଏ । ରୁସପୋନ୍ ଭଳି ବିଭିନ୍ନ ବ୍ରାଣ୍ଡରେ ବଜାରରେ ଉପଲବ୍ଧ ହେଉଛି ଏହି କେମିକାଲସ । କେମିକାଲ୍ ପ୍ରଭାବରେ ସାଧାରଣ ଭାବେ ୨୪ ଘଂଟାରେ କଦଳୀ ପାଚୁଥିବା ବେଳେ ଅଧିକ ମାତ୍ରାରେ ଇଥେଫୋନ ସ୍ପ୍ରେ କଲେ ୬ ଘଂଟାରେ ବି ପାଚିଯାଇଥାଏ କଂଚା କଦଳୀ । ଯାହା ସ୍ୱାସ୍ଥ୍ୟ ପାଇଁ ଅତି ହାନିକାରକ ।ଇଥେଫୋନ ଦ୍ୱାରା ପଚାଯାଉଥିବା କଦଳୀ ଅନେକ ରୋଗ ସୃଷ୍ଟି କରିଥାଏ । ବିଭିନ୍ନ ପ୍ରକାର ପେଟରୋଗ, ଶ୍ୱାସକ୍ରିୟାରେ ସମସ୍ୟା, ଚର୍ମରୋଗ ଆଦି ରୋଗ ଆକ୍ରାନ୍ତ କରିଥାଏ । ଗର୍ଭସ୍ଥ ଶିଶୁ ଉପରେ ମଧ୍ୟ ଏହାର କୁପ୍ରଭାବ ପଡିଥାଏ । ଛୋଟ ଛୋଟ ଶିଶୁଙ୍କ ମାନସିକ ବିକାଶରେ ମଧ୍ୟ ବାଧା ପହଁଚାଇଥାଏ ।
କଦଳୀ ପାଚିବାର ଆଉ ଏକ ପଦ୍ଧତି ମଧ୍ୟ ଜାଣି ରଖନ୍ତୁ । କାଲସିୟମ୍ କାରବାଇଡ୍ ଦେଇ ପଚାଯାଉଛି କଦଳୀ । ତେବେ ଏହାର ମାରାତ୍ମକ ପ୍ରଭାବ ଯୋଗୁଁ ଫୁଡ୍ ସେଫ୍ଟି ଆଣ୍ଡ୍ ଷ୍ଟାଣ୍ଡାର୍ଡ ଅଥରିଟି ଅଫ୍ ଇଣ୍ଡିଆ ଏହାକୁ ବ୍ୟାନ୍ କରିଛି । ମାତ୍ର ଏହାକୁ ମଧ୍ୟ ସଂପୂର୍ଣ୍ଣ ରୋକାଯାଇ ପାରିନାହିଁ । ସେପଟେ ମନଇଚ୍ଛା ଇଥେଫୋନ୍ ବ୍ୟବହାର କରୁଛନ୍ତି ବ୍ୟବସାୟୀ । କଦଳୀ ବିକିବା ପାଇଁ ଲୋକଙ୍କ ଜୀବନ ସହ ଖେଳୁଛନ୍ତି ବ୍ୟବସାୟୀ । ଏଥିରେ ନା ଅଛି ସରକାର ଅଙ୍କୁଶ ଓ ନା ଅଛି ଲୋକଙ୍କ ମଧ୍ୟରେ ସଚେତନତା । ଖାଉଟି ନାଚାର, କାରଣ ବିନା କେମିକାଲରେ ପାଚିଥିବା କଦଳୀ ଏବଂ କେମିକାଲ୍ରେ ପାଚିଥିବା କଦଳୀ ଚିହ୍ନିବା ପାଇଁ ଉପାୟ ନାହିଁ ।