ପିଏନବି ମହାଦୁର୍ନୀତି ମାମଲା : ୨ ପୂର୍ବତନ ବ୍ୟାଙ୍କ କର୍ମଚାରୀଙ୍କ ସମେତ ୩ଗିରଫ
କନକ ବ୍ୟୁରୋ : ପିଏନବି ମହାଦୁର୍ନୀତି ମାମଲାରେ ୩ଜଣ ଗିରଫ । ଆଜି ସିବିଆଇ ପଂଜାବ ନ୍ୟାସନାଲ ବ୍ୟାଙ୍କର ପୂର୍ବତନ ଉପ ପ୍ରବନ୍ଧକ ଗୋକୁଳନାଥ ସେଠୀ ଓ ମନୋଜ ଖରାଟଙ୍କୁ ଗିରଫ କରିଛି । ଏହାସହ ନିରଭ ମୋଦିଙ୍କ ସହଯୋଗୀ ହେମନ୍ତ ଭଟ୍ଟଙ୍କୁ ମଧ୍ୟ ଗିରଫ କରିଛି ସିବିଆଇ । ପିଏନବି ଓ ଅନ୍ୟ କମ୍ପାନୀର ୪ହଜାର ୮୮୬ କୋଟି ୭୦ଲକ୍ଷ ଟଙ୍କାର ଠକେଇରେ ନିରଭ ମୋଦିଙ୍କୁ ସହଯୋଗ କରିଥିବା ଅଭିଯୋଗରେ ଗୋକୁଳନାଥ ସେଠୀ ଓ ମନୋଜ ଖରାଟଙ୍କୁ ସିବିଆଇ ଆଜି ଗିରଫ କରିଛି । ୩ଅଭିଯୁକ୍ତଙ୍କୁ ଆଜି ମୁମ୍ବାଇ ସ୍ଥିତ ସିବିଆଇ ସ୍ପେଶାଲ କୋର୍ଟରେ ହାଜର କରାଯିବ ବୋଲି ସୂଚନା ମିଳିଛି । ଗୋକୁଳନାଇ ସେଠୀଙ୍କ ପରିବାର ଓ ସମ୍ପର୍କୀୟଙ୍କୁ ଗତ ଦୁଇ ଦିନ ଧରି ସିବିଆଇ ପଚରାଉଚର କରିବା ପରେ ଆଜି ତାଙ୍କୁ ଗିରଫ କରିଛି ।
Kanak News is now on WhatsApp
Join and get latest news updates delivered to you via WhatsApp
ଏହି ସମୟରେ ତଦନ୍ତକାରୀ ସଂସ୍ଥା ତାଙ୍କର ବିଭିନ୍ନ ସମ୍ପତି ବ୍ୟାଙ୍କ ଆକାଉଂଟ, ଲକର ଆଦିର ତଥ୍ୟ ସଂଗ୍ରହ କରିବା ବେଳେ ବେଆଇନ କାରବାର ବିଷୟରେ ଜାଣିପାରିଛି । ପଞ୍ଜାବ ନ୍ୟାସନାଲ ବ୍ୟାଙ୍କରେ ୧୧ ହଜାର ୩ ଶହ କୋଟି ଟଙ୍କା ଦୁର୍ନୀତି ମାମଲାରେ ନିରଭ ମୋଦି ଓ ଗୀତାଞ୍ଜଳି ସମୂହର ୫୧ ଟି ଠିକଣାରେ ଚଢାଉ କରିଛି ପ୍ରବର୍ତନ ନିର୍ଦ୍ଦେଶାଳୟ । ମାମଲାର ମୁଖ୍ୟ ଅଭିଯୁକ୍ତ ନିରଭ ମୋଦି ଓ ମେହୁଲ ଚୋକସେଙ୍କ ପାସପୋର୍ଟକୁ ୪ ସପ୍ତାହ ପାଇଁ ରଦ୍ଦ କରାଯାଇଛି । ଏହି ଦୁର୍ନୀତି ଜଣାପଡିବା ପରେ ଜାନୁଆରୀ ୩୧ରେ ସିବିଆଇ ଲୁକ ଆଉଟ ସର୍କୁଲାର ଜାରି କରିଥିଲା । ହେଲେ ଏହା ପୂର୍ବରୁ ଭାରତରୁ ଖସିଯାଇଛନ୍ତି ଧୂର୍ତ ନିରଭ ମୋଦି । ପଞ୍ଜାବ ନ୍ୟାସନାଲ ବ୍ୟାଙ୍କର ଜାଲ ଗ୍ୟାରେଂଟି ହାସଲ କରି ଅନ୍ୟ ଭାରତୀୟ ବ୍ୟାଙ୍କର ବିଦେଶୀ ଶାଖାରୁ ୧୧ହଜାର ୩ଶହ କୋଟି ଟଙ୍କା ଚୁନା ଲଗାଇଛନ୍ତି ପ୍ରଖ୍ୟାତ ହୀରା ବ୍ୟବସାୟୀ ନିରଭ ମୋଦି ।