କନକ ବ୍ୟୁରୋ: ଓଡ଼ିଶାରେ ମୋଦିଙ୍କ ଶେଷ ପ୍ରଚାର । ଚତୁର୍ଥ ପର୍ଯ୍ୟାୟ ନିର୍ବାଚନ ପାଇଁ କେନ୍ଦ୍ରାପଡ଼ା କୁରୁକ୍ଷେତ୍ରରୁ ମାରାଥନ ପ୍ରଚାର କଲେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । ଆସନ୍ତା ୨୯ ତଥା ଶେଷ ପର୍ଯ୍ୟାୟ ମତଦାନ ପାଇଁ ଜନ ସମାବେଶରେ ଭୋଟ୍ ଭିକ୍ଷା କଲେ ମୋଦି । କେନ୍ଦ୍ରାପଡ଼ା ବାରୁଅ ଠାରେ ହୋଇଥିବା ସମାବେଶରେ ଯୋଗଦେଇ ମୋଦି ପୁଣି ଥରେ ଡ଼ବଲ ଇଞ୍ଜିନ୍ କଥା ଦୋହରାଇଛନ୍ତି । କହିଛନ୍ତି କି, ଓଡ଼ିଶାରେ ବିକାଶ ଯେଉଁ ପରିମାଣରେ ହେବାରଥିଲା ହୋଇନାହିଁ, କିନ୍ତୁ ବିଗତ ୫ ବର୍ଷରେ ଦେଶରେ ଯେଉଁଭଳି ବିଜେପି ସରକାର ଶାସନରେ ବିକାଶ ହୋଇଛି ତେଣୁ ଦିଲ୍ଲୀରେ ପୁଣି ବିଜେପି ସରକାର ଇଂଜିନ୍ ଆଉ ଭୁବନେଶ୍ୱରରେ ମଧ୍ୟ ବିକାଶର ଡବଲ ଇଂଜିନ୍ ଲଗାଇବାକୁ ପଡ଼ିବ ବୋଲି ଆହ୍ୱାନ ଦେଇଛନ୍ତି ମୋଦି ।
Kanak News is now on WhatsApp
Join and get latest news updates delivered to you via WhatsApp
ଅନ୍ୟପଟେ କେନ୍ଦ୍ରାପଡ଼ା ସଂସଦୀୟ କ୍ଷେତ୍ର ସହ ଏହା ଅଧିନରେ ଥିବା ୭ଟି ବିଧାନସଭା କ୍ଷେତ୍ର ପାଇଁ ‘ପଦ୍ମ ଫୁଲ’ ସହ ବିକାଶର ଡ଼ଲ ଇଂଜିନ୍ ଲଗାଇବା ପାଇଁ ଅନୁରୋଧ କରିଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । ଓଡ଼ିଶା ଖଣିଜ ସମ୍ପଦ ଭରା ରାଜ୍ୟ ବିଜେପି କ୍ଷମତାକୁ ଆସିଲା, ଖଣିଜ ସମ୍ପଦ ଭରା ଓଡ଼ିଶାକୁ ବିକାଶର କେନ୍ଦ୍ର ବିନ୍ଦୁ କରିବୁ ବୋଲି ନିର୍ବାଚନୀ ଥୋପ ଛାଡ଼ିଛନ୍ତି ମୋଦି । ସେହିଭଳି ସ୍ୱାସ୍ଥ୍ୟ, ସଡ଼କ, ନିଯୁକ୍ତି ଓ ଜନହିତକାରୀ ଯୋଜନା ଓଡ଼ିଶା ଅପେକ୍ଷାରେ ରହିଛି ବୋଲି ମାଳ ମାଳ ପ୍ରତିଶ୍ରୁତି ଦେଇଛନ୍ତି ମୋଦି । ଆଉ ଏହି ପ୍ରତିଶ୍ରୁତି ବଦଳରେ ଲୋକଙ୍କୁ ପଦ୍ମ ଫୁଲରେ ଭୋଟ୍ ଦେବାକୁ ଆହ୍ୱାନ ଦେଇଛନ୍ତି ପ୍ରଧାନମନ୍ତ୍ରୀ ମୋଦି ।
ସେହିପରି ପ୍ରତିଥର ଭଳି କେନ୍ଦ୍ରାପଡ଼ାରେ ମଧ୍ୟ ବିଜେଡି ସରକାରଙ୍କ ଉପରେ ବର୍ଷିଛନ୍ତି ମୋଦି । କହିଛନ୍ତି, ଏତେଦିନ ଧରି ଓଡ଼ିଶାରେ ବିଜେଡି ସରକାର ରହିଛି କିନ୍ତୁ ବିକାଶ ହୋଇନାହିଁ । ଚଳିତ ଥର କିନ୍ତୁ ଓଡ଼ିଶାବାସୀ ବିଜେଡିକୁ ପ୍ରତ୍ୟାଖାନ କରି ବିଜେପିକୁ ଭୋଟ୍ ଦେଇ ଡ଼ବଲ୍ ଇଞ୍ଜନ୍ ଲଗାଇବେ ବୋଲି ମନବଳାଇଛନ୍ତି । ଯାହାକି ବିଜେଡି ସରକାର ବିଦା ହେବାର ସଙ୍କେତ ଦେଉଛି ବୋଲି କହି ବିଜେଡିକୁ ସମାଲୋଚନା କରିଛନ୍ତି ମୋଦି । ତେବେ ଚତୁର୍ଥ ପର୍ଯ୍ୟାୟ ନିର୍ବାଚନ ପାଇଁ ଆସନ୍ତା ୨୭ ତାରିଖ ସନ୍ଧ୍ୟାରେ ଶେଷ ହେବାକୁଥିବାବେଳେ ପ୍ରଧାନମନ୍ତ୍ରୀ ମୋଦି ଆଜି କେନ୍ଦ୍ରାପଡ଼ା କ୍ଷେତ୍ରରେ ନିର୍ବାଚନୀ ପ୍ରଚାର ଜୋରଦାର କରିଛନ୍ତି ।