ଫୋନରେ ଆମେରିକା ରାଷ୍ଟ୍ରପତିଙ୍କ ସହ କଥା ହେଲେ ମୋଦି : ଅଧା ଘଣ୍ଟା ଧରି ହେଲା ଆଲୋଚନା, ପରୋକ୍ଷରେ ପାକିସ୍ତାନକୁ ନିଶାନା
କନକ ବ୍ୟୁରୋ : ଜମ୍ମୁକଶ୍ମୀରକୁ ନେଇ ଭାରତ ପାକିସ୍ତାନ ଟେନସନ ଭିତରେ ଆମେରିକା ରାଷ୍ଟ୍ରପତିଙ୍କ ସହ କଥା ହୋଇଛନ୍ତି ମୋଦି । ଜମ୍ମୁକଶ୍ମୀରରୁ ଧାରା ୩୭୦ ହଟାଇବା ପରେ ପ୍ରଥମ ଥର ପାଇଁ ଡୋନାଲ୍ଡ ଟ୍ରମ୍ପଙ୍କ ସହ କଥା ହୋଇଛନ୍ତି ନରେନ୍ଦ୍ର ମୋଦି । ଦୁଇ ନେତା ଫୋନରେ ପ୍ରାୟ ଅଧ ଘଂଟା କଥା ହୋଇଛନ୍ତି । ଉଭୟ ନେତାଙ୍କ ମଧ୍ୟରେ କ୍ଷେତ୍ରିୟ ଶାନ୍ତି ସହ ଦ୍ୱିପାକ୍ଷିକ ଆଲୋଚନା ହୋଇଥିଲା । ଫୋନରେ ପାକିସ୍ତାନ ସହ ସଂପର୍କକୁ ନେଇ ନାମ ନନେଇ ଇମ୍ରାନ ଖାନଙ୍କୁ ଟାର୍ଗେଟ କରିଥିଲେ ପ୍ରଧାନମନ୍ତ୍ରୀ । ଟ୍ରମ୍ପଙ୍କୁ ଫୋନରେ ମୋଦି କହିଥିଲେ, କିଛି ନେତାଙ୍କ ଭାରତ ବିରୋଧରେ ହିଂସା ସୃଷ୍ଟିକାରୀ ବୟାନ ଶାନ୍ତି ପ୍ରକ୍ରିୟାରେ ବଡ ବାଧକ ।
Kanak News is now on WhatsApp
Join and get latest news updates delivered to you via WhatsApp
ମୋଦିଙ୍କ ଇସାରା ଇମ୍ରାନଙ୍କ ଆଡକୁ ଥିଲା, ଯିଏ କଶ୍ମୀରରୁ ୩୭୦ ଧାରା ହଟିବା ପରେ ଭାରତ ବିରୋଧରେ ବିଷୋଦଗାର କରିଥିଲେ । ଏଥିସହ ପ୍ରଧାନମନ୍ତ୍ରୀ ମୋଦି ଜୋର ଦେଇ କହିଥିଲେ ଆଂଚଳିକ ଶାନ୍ତି ପାଇଁ ଆତଙ୍କ ଓ ହିଂସାମୁକ୍ତ ପରିବେଶ ସୃଷ୍ଟି କରିବା ଜରୁରୀ । ଆଉ ଏହା ସୀମାପାର ଆତଙ୍କବାଦ ଉପରେ ଲଗାମ ନଲଗାଇଲେ ସମ୍ଭବ ନୁହେଁ । ଯଦି କୌଣସି ରାଷ୍ଟ୍ର ଶାନ୍ତିର ଏହି ରାସ୍ତାରେ ଚାଲିବ, ତେବେ ଭାରତ ତାକୁ ସହଯୋଗ କରିବାକୁ ତତ୍ପର ବୋଲି କହିଛନ୍ତି ମୋଦି । ଏହି ଶାନ୍ତି ରାସ୍ତା ଦେଇ ହିଁ ଗରିବି, ନିରକ୍ଷରତା ଓ ରୋଗ ସହ ମୁକାବିଲା କରାଯାଇପାରିବ ।
ଡୋନାଲ୍ଡ ଟ୍ରମ୍ପଙ୍କ ଆଲୋଚନା ବେଳେ ଆଫଗାନିସ୍ତାନ ସ୍ୱାଧିନତାର ଶହେବର୍ଷ ପୂର୍ତି କଥା ମନେ ପକାଇଥିଲେ ମୋଦି । ଆଉ କହିଥିଲେ, ସଂଗଠିତ, ସୁରକ୍ଷିତ ଗଣତାନ୍ତ୍ରିକ, ସ୍ୱତନ୍ତ୍ର ଆଫଗାନିସ୍ତାନ ପାଇଁ ଭାରତ ପ୍ରତିଶ୍ରୁତିବଦ୍ଧ । ଏହାଛଡା ପ୍ରେସିଡେଂଟ ଟ୍ରମ୍ପଙ୍କ ସହ ଭାରତ-ଆମେରିକା ବାଣିଜ୍ୟ କାରବାର ନେଇ ମଧ୍ୟ ଆଲୋଚନା କରିଥିଲେ ଭାରତର ପ୍ରଧାନମନ୍ତ୍ରୀ । ଜି-୨୦ ଅବସରରେ ଓସାକାରେ ହୋଇଥିବା ଦ୍ୱିପାକ୍ଷିକ ବାର୍ତା କଥାକୁ ମନେପକେଇ ଦେଇ ମୋଦି ଆଶାବ୍ୟକ୍ତ କରିଥିଲେ, ଶୀଘ୍ର ଭାରତର ବାଣିଜ୍ୟ ମନ୍ତ୍ରୀ ଆମେରିକୀୟ ପ୍ରତିପକ୍ଷଙ୍କୁ ଭେଟିବେ । ଜମ୍ମୁକଶ୍ମୀରରୁ ଧାରା ୩୭୦ ହଟିବା ପରେ ଏହାକୁ ନେଇ ଜାତିସଂଘ ସୁରକ୍ଷା ପରିଷଦ ଯାଇଥିଲା ପାକିସ୍ତାନ । ସେହିପରି ପୂର୍ବରୁ କଶ୍ମୀର ପ୍ରସଙ୍ଗରେ ମଧ୍ୟସ୍ଥତା ପାଇଁ ଆଗ୍ରହୀ କହି ଟ୍ରମ୍ପ ନୂଆ ବିବାଦ ସୃଷ୍ଟି କରିଥିଲେ । ତେଣୁ ଏସବୁ ଦୃଷ୍ଟିରୁ ଗତକାଲି ଟ୍ରମ୍ପ ଓ ମୋଦିଙ୍କ ଫୋନରେ ବାର୍ତାଳାପ କୁଟନୈତିକସ୍ତରରେ ଭାରତକୁ ଫାଇଦା ଦେବ ବୋଲି ଚର୍ଚ୍ଚା ହେଉଛି ।