ପଶ୍ଚିମବଙ୍ଗ ପାଇଁ ହଜାରେ କୋଟିର ସହାୟତା ଘୋଷଣା: ବାତ୍ୟାରେ ମୃତକଙ୍କ ପରିବାରକୁ ୨ ଲକ୍ଷ ଟଙ୍କା, ଆହତଙ୍କ ପାଇଁ ୫୦ ହଜାର ଟଙ୍କା ସହାୟତା ରାଶି ଘୋଷଣା କଲେ ପ୍ରଧାନମନ୍ତ୍ରୀ
ସ୍ଥିତି ସୁଧାରିବାକୁ ସମସ୍ତ ପ୍ରକାର ସହଯୋଗ ଯୋଗାଇ ଦେବାକୁ ମୋଦୀଙ୍କ ପ୍ରତିଶ୍ରୁତି । କହିଲେ, କେନ୍ଦ୍ରୀୟ ଟିମ୍ ଆସି କରିବେ କ୍ଷୟକ୍ଷତିର ଆକଳନ
କନକ ବ୍ୟୁରୋ: ଆକାଶମାର୍ଗରୁ ବାତ୍ୟାଂଚଳ ପରିଦର୍ଶନ କରିବା ପରେ ପଶ୍ଚିମବଙ୍ଗ ପାଇଁ ଆଗୁଆ ହଜାରେ କୋଟି ଟଙ୍କାର ସହାୟତା ଘୋଷଣା କରିଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । କ୍ଷୟକ୍ଷତିର ଆକଳନ ପରେ ସମସ୍ତ ପ୍ରକାର ସହଯୋଗ ଯୋଗାଇ ଦେବାକୁ ସେ ପ୍ରତିଶ୍ରୁତି ଦେଇଛନ୍ତି । କହିଛନ୍ତି, ପଶ୍ଚିମବଙ୍ଗ କିଭଳି ଖୁବଶୀଘ୍ର ପୁଣି ଆଗକୁ ବଢ଼ିବ ସେଥିପାଇଁ ସାରାଦେଶ ସେମାନଙ୍କ ସହିତ ଅଛି । ଖୁବ୍ ଶୀଘ୍ର କେନ୍ଦ୍ର ସରକାରଙ୍କ ଏକ ଟିମ ଆସି କ୍ଷୟକ୍ଷତିର ସମସ୍ତ ପ୍ରକାର ଆକଳନ କରିବେ । କେନ୍ଦ୍ରୀୟ ଟିମର ରିପୋର୍ଟ ପରେ ରାଜ୍ୟକୁ ସମସ୍ତ ପ୍ରକାର ସହଯୋଗ ଦିଆଯିବ । ଏବଂ ପୁନଃରୁଦ୍ଧାର ଓ ପୁନଃନିର୍ମାଣ କାର୍ଯ୍ୟକୁ ଗୁରୁତ୍ୱ ଦିଆଯିବ । ଏଥିସହ ବାତ୍ୟା ଅମ୍ଫାନରେ ଜୀବନ ଯାଇଥିବା ମୃତକଙ୍କ ପରିବାରକୁ ୨ଲକ୍ଷ ଟଙ୍କା ଓ ଆହତଙ୍କ ପରିବାରକୁ ୫୦ ହଜାର ଟଙ୍କା ଲେଖାଏଁ ସହାୟତା ଦେବାକୁ ଘୋଷଣା କରିଛନ୍ତି । ଏବଂ ଏଭଳି ଦୁଃଖ ସମୟରେ କାନ୍ଧକୁ କାନ୍ଧ ମିଳାଇ କାର୍ଯ୍ୟ କରିବାକୁ ପ୍ରତିଶ୍ରୁତି ଦେଇଛନ୍ତି ।
Kanak News is now on WhatsApp
Join and get latest news updates delivered to you via WhatsApp
Rs. 1000 crore advance assurance will be given to West Bengal.
Rs. 2 lakh would be given to the next of kin of the persons deceased and Rs 50,000 each to the persons who got seriously injured due to the cyclone in parts of West Bengal: PM @narendramodi
— PMO India (@PMOIndia) May 22, 2020
ବାତ୍ୟା ଅମ୍ଫାନ ଚାଲିଯିବାପରେ ଆଜି ଆକାଶମାର୍ଗରୁ ପଶ୍ଚିମବଙ୍ଗର ବାତ୍ୟା ପ୍ରଭାବିତ ଅଂଚଳର ଅନୁଧ୍ୟାନ କରିଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । ଆକାଶମାର୍ଗରୁ ବିନାଶକାରୀ ବାତ୍ୟା ଅମ୍ଫାନ ପଶ୍ଚିମବଙ୍ଗରେ ଘଟାଇଥିବା କ୍ଷତିଗ୍ରସ୍ତ ବିଭିନ୍ନ ଅଂଚଳକୁ ବୁଲଦେଖିଛନ୍ତି ମୋଦି । ହାତରେ ନକ୍ସା ଧରି କ୍ଷତିଗ୍ରସ୍ତ ଅଂଚଳକୁ ତନତନ କରି ଦେଖିଛନ୍ତି ପ୍ରଧାନମନ୍ତ୍ରୀ । ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜି, ରାଜ୍ୟପାଳ ଜଗଦୀପ ଧନଖଡ ମଧ୍ୟ ମୋଦିଙ୍କ ସହ ଆକାଶମାର୍ଗରୁ ବାତ୍ୟାଂଚଳ ବୁଲି ଦେଖିଛନ୍ତି । ଏହାପରେ ମମତା ବାନାର୍ଜୀ ଓ ଉଚ୍ଚସ୍ତରୀୟ ପ୍ରତିନିଧିଙ୍କ ସହ କ୍ଷୟକ୍ଷତିର ସମୀକ୍ଷା କରିଛନ୍ତି ।
ଶହ ଶହ ବର୍ଷର ସହରରେ ବାତ୍ୟା ଅମ୍ଫାନ ଯେଉଁଭଳି କ୍ଷତି ଘଟାଇଛି ତାହା ସମସ୍ତଙ୍କୁ ସ୍ତବ୍ଧ କରିଦେଇଛି । ପଶ୍ଚିମବଙ୍ଗରେ ୮୦ ଜଣଙ୍କ ଜୀବନ ନେଇଛି ଏହି ଭୟଙ୍କର ବାତ୍ୟା । ଆଉ ଅନେକ ଲୋକ ଗୁରୁତର ଭାବେ ଆହତ ହୋଇଛନ୍ତି । ବିଦ୍ୟୁତ୍ ସରବରାହ ଓ ଭିତିଭୂମି ସମ୍ପୂର୍ଣ୍ଣ ଭାବେ ପ୍ରଭାବିତ ହୋଇଛି । ବାତ୍ୟା ଯୋଗୁଁ ପଶ୍ଚିମବଙ୍ଗରେ ପ୍ରାୟ ଲକ୍ଷେ କୋଟି ଟଙ୍କାର କ୍ଷତି ହୋଇଛି ବୋଲି ପ୍ରାଥମିକ ଭାବେ କୁହାଯାଉଛି ।