ବାରିପଦାରେ ପ୍ରଧାନମନ୍ତ୍ରୀଙ୍କ ଖୋର୍ଦ୍ଧା ଷ୍ଟାଇଲ, ନାଁ ନନେଇ ରାଜ୍ୟ ସରକାରଙ୍କୁ ଟାର୍ଗେଟ୍ ! ପୁରୀରେ ମହିଳାଙ୍କୁ ନେଇ ବିଜେଡିର ଶକ୍ତି ପ୍ରଦର୍ଶନକୁ କାଉଣ୍ଟର କଲେ ମୋଦି
ଉଠାଇଲେ ପିପିଲି ପୀଡିତାଙ୍କୁ ନ୍ୟାୟ ପ୍ରସଙ୍ଗ
କନକ ବ୍ୟୁରୋ: ବାରିପଦାରେ ବିରୋଧୀଙ୍କ ଉପରେ ବର୍ଷିଲେ ମୋଦି । ହେଲେ ଏହି ରାଜନୈତିକ ଆକ୍ରମଣ କଂଗ୍ରେସ ଆଡକୁ ଯେଭଳି ତୀବ୍ର ଥିଲା, ବିଜେଡି ଆଡକୁ ସେଭଳି ମନ୍ତର ଥିଲା । ହାତ ଗଣତି ଦୁଇ ଚାରିଟି ପ୍ରସଙ୍ଗକୁ ଛାଡି ଦେଲେ ସବୁ ଆକ୍ଷେପ ଓ ଅଭିଯୋଗ ସିଧାସଳଖ କଂଗ୍ରେସ ଶିବିରକୁ ଯାଇଛି । ବାରିପଦା ସଭାରେ ମୋଦିଙ୍କ ଅଭିଭାଷଣକୁ ଯଦି ଗୋଟିଏ ଲାଇନ୍ରେ କୁହାଯାଏ, ତେବେ ହୁଏତ, ବିଜେପିର ଶତ୍ରୁ ନମ୍ବର ୱାନ୍ ବିଜେଡି ନୁହେଁ ବରଂ କଂଗ୍ରେସ ବୋଲି ଧରି ନେବାକୁ ହେବ । ଆଉ ଏସବୁ ଭିତରେ ମହିଳା ସୁରକ୍ଷା, ଆୟୁଷ୍ମାନ ଯୋଜନା ଏବଂ ପିପିଲି ପୀଡ଼ିତା ପ୍ରସଙ୍ଗରେ ରାଜ୍ୟ ସରକାରଙ୍କୁ ଆକ୍ରମଣ କରିଛନ୍ତି ପ୍ରଧାନମନ୍ତ୍ରୀ ।
Kanak News is now on WhatsApp
Join and get latest news updates delivered to you via WhatsApp
ଯେଉଁ ପ୍ରସଙ୍ଗକୁ ନେଇ ରାଜ୍ୟ ସରକାର ଏକ ପ୍ରକାର ବେକଫୁଟରେ ଅଛନ୍ତି ସେହି ପିପିଲି ହତ୍ୟା ପ୍ରସଙ୍ଗ ଉଠାଇ, କଟା ଘା’ରେ ଚୁନ ଦେଲା ଭଳି ରାଜନୈତିକ ଆକ୍ରମଣ କରିଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । ଓଡ଼ିଶାରେ ମହିଳାଙ୍କ ସୁରକ୍ଷା ନେଇ ପ୍ରଶ୍ନ ଉଠାଇବା ସହ ସିଧାସଳଖ ରାଜ୍ୟ ସରକାରଙ୍କୁ କାଠଗଡ଼ାକୁ ଟାଣିଛନ୍ତି ପ୍ରଧାନମନ୍ତ୍ରୀ । ପିପିଲି ହତ୍ୟା ଘଟଣା ସହ ମହିଳାଙ୍କ ସ୍ୱାସ୍ଥ୍ୟ ପ୍ରସଙ୍ଗରେ ମଧ୍ୟ ରାଜ୍ୟ ସରକାରଙ୍କୁ ଟାର୍ଗେଟ୍ କରିଛନ୍ତି ମୋଦି । ଆୟୁଷ୍ମାନ ଭାରତ ଯୋଜନକୁ ଆୟୁଧ କରି ପରୋକ୍ଷରେ ରାଜ୍ୟ ସରକାରଙ୍କୁ ଟାର୍ଗେଟ୍ କରିବା ସହ ଏହି ଯୋଜନାରେ ସାମିଲ ହେବାକୁ ଆହ୍ୱାନ ଦେଇଛନ୍ତି ।
ମହିଳା ସଶକ୍ତିକରଣ ନେଇ ରାଜ୍ୟ ସରକାର ପୁରୀରେ ବିଶାଳ ସମାବେଶ କରୁଥିବା ବେଳେ ମହିଳାଙ୍କ ପ୍ରସଙ୍ଗରେ କେନ୍ଦ୍ର ସରକାରଙ୍କ ଯୋଜନାର ଲମ୍ବା ତାଲିକା ରଖିଛନ୍ତି ମୋଦି । ଉଦାହରଣ ଦେବାକୁ ଯାଇ ମିଶନ୍ ଇନ୍ଦ୍ରଧନୁସ୍, ଉଜ୍ଜଳା, ବେଟି ପଢ଼ାଓ-ବେଟି ବଚାଓ ଭଳି କେନ୍ଦ୍ର ସରକାରଙ୍କ ଅଭିଜ୍ଞତାକୁ ସାମ୍ନାରେ ରଖିଛନ୍ତି ମୋଦି । ହେଲେ ବଡ କଥା ହେଉଛି ମୋଦିଙ୍କ ପ୍ରାୟ ୪୦ ମିନିଟ୍ର ଏହି ଭାଷଣରେ ନବୀନଙ୍କ ଅପେକ୍ଷା ରାହୁଲ ଗାନ୍ଧୀ ଅଧିକ ଟାର୍ଗେଟ୍ରେ ରହିଥିଲେ । କଂଗ୍ରେସ ଅମଳର ଦୁର୍ନୀତିକୁ ପ୍ରସଙ୍ଗ କରି ସିଧାସଳଖ ମୋଦି କହିଛନ୍ତି-ଚୌକିଦାରଙ୍କୁ ଚୋର ଗୋଷ୍ଠୀ ହଟାଇବାକୁ ଚାହୁଁଛନ୍ତି ।
ସେହିପରି ରାଫେଲ ଡିଲ୍ ପ୍ରସଙ୍ଗରେ ବି କଂଗ୍ରେସ ଉପରେ ଖୋଲାଖୋଲି ଆକ୍ରମଣ କରିଛନ୍ତି ପ୍ରଧାନମନ୍ତ୍ରୀ । ଭାଷଣର ଆରମ୍ଭରୁ ହିଁ ମୋଦି କଂଗ୍ରେସକୁ ସିଧାସଳଖ ଆକ୍ରମଣ କରିଥିଲେ । ଆଉ ଏହାର ଆରମ୍ଭ ହୋଇଥିଲା ମଧ୍ୟପ୍ରଦେଶରୁ । ବନ୍ଦେ ମାତରମ୍ ସଂଗୀତ ଉପରେ କଟକଣା ଏବଂ ଜରୁରୀକାଳୀନ ସ୍ଥିତି ସମୟରେ ଲଢ଼ିଥିବା ସଂଗ୍ରାମୀଙ୍କ ପେନସନ୍ ବନ୍ଦ ନେଇ କଂଗ୍ରେସ ଉପରେ ବର୍ଷିଥିଲେ ମୋଦି ।
ଆଗକୁ ୨୦୧୯ ନିର୍ବାଚନ । ବିଜେପି ନେତୃତ୍ୱାଧିନ ଏନ୍ଡିଏର ଲକ୍ଷ୍ୟ ପୁଣିରେ କ୍ଷମତାକୁ ଫେରିବା । ଏହିକ୍ରମରେ ଦେଶବ୍ୟାପି ଚର୍ଚ୍ଚିତ ପ୍ରସଙ୍ଗରେ କଂଗ୍ରେସକୁ ଟର୍ଗେଟ୍ କରିଛନ୍ତି ମୋଦି । କଂଗ୍ରେସକୁ ଏହି ଟାର୍ଗେଟ୍ ଭିତରେ ଗୌଣ ହୋଇଯାଇଛି ନବୀନଙ୍କ ଉପରେ ହମଲା ।
ତେବେ ପିପିଲି ହତ୍ୟା ମାମଲାରେ ପ୍ରଧାନମନ୍ତ୍ରୀ, ରାଜ୍ୟ ସରକାରଙ୍କୁ କାଠଗଡ଼ାକୁ ଟାଣିଥିବା ବେଳେ ମୋଦିଙ୍କ ଏହି ଆକ୍ରମଣ ଉପରେ ପ୍ରତିକ୍ରିୟା ରଖିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ମୁଖ୍ୟମନ୍ତ୍ରୀ କହିଛନ୍ତି-ଆମେ ଦୃଢ଼ତାର ସହ ଏହି ମାମଲାକୁ ତଦାରଖ କରୁଛୁ ।